Juan 10:3 - Tagbanwa

³ Pagpasleden kanya it guwardiya it puwirtaꞌan, baw pagpapagnegan nga pirmi it mga tupa i gaꞌmaran ya. Saꞌnulun yay sadiling mga tupa it ingaranen ya, ka ipaliꞌwan ya sira duꞌut antur.

Juan 10:3 Iomraidhean Croise

Exodo 33:17

“Ta, buwaten ku nayan i kaꞌirgan mu ngayan,” maat it AMPUꞌANG DIYUS, “sabap matuud nga pagsagyaan ku ikaw baw kilala ku nay adat mu.”

Juan 10:14

Aku i magayen nga manigꞌeper. In magꞌuꞌunu magkakilalaan akut Amaꞌ baw kanya kilala ku gasiꞌ, atkayan naga magkakilalaan ku i sadili ku nga mga tupa, baw magkakilalaan nira gasiꞌ aku. Baw talagang ibgay ku i ginawa ku sabap lamang it kanira.

Juan 10:16

May mga tupa ku pang beken nga magpuyrat mga itu ngaytu nga kat antur na ngaytu. Kaꞌilangan ipaꞌuyut ku gasiꞌ sira it pagꞌaypeten ku. Pagnegan nira gasiꞌ i gaꞌmaran ku, isaꞌun sang siraan nat dati nga mga tupa, baw esa-esa gasiꞌ i manigꞌeper nira.

Juan 10:4

Basta yan nakapaliꞌwan yay kumpur sadili ya, kanya nay duꞌut uꞌnaan baw dumasun nay mga tupa, ka magkatandaꞌan na niray gaꞌmaran ya.

Juan 10:9

Aku i bilang puwirtaꞌan. Kumpur semled situt aken, ka aku nay pagpamayaꞌnen baw pagsarigan ya, siguradung maribri. Tarimaen ku kanyat magayen, nga subuk pagtarima it manigꞌeper it mga tupa it magseled, magliꞌwan, isaꞌun ega maꞌunu, in daꞌga maparagan yang pirmi i magagayen nga pagpasturan.

Juan 6:37

Pasakep it aken i kumpur ipagbegay it Amaꞌ it aken. Talagang egay imugawun ku nga maski siyu nga magpasakep it aken.

Juan 6:45

Sabap magsusurat duꞌun it mga kasuratan it mga prupitaꞌ, nga magꞌaat, ‘Sirang muꞌsa, tulduꞌan sira it Ampuꞌang Diyus.’ Iyan nga magpagneg it Amaꞌ baw ipagdawaꞌ ya kat ulu ya i itiyulduꞌ it kanya, ega na magꞌaliꞌ nga pasakep it aken.

Roma 8:30

Ta itu, mga ipiyasiguru ya ngaytu, miyabut i aldaw nga piyanakman ya nga pasakep it kanya. Bawnga, sabap it pamayaꞌ baw pagsarig nirat binwat ni Cristo, ipiyabetang ya sira nga ega nay kakasalaꞌan kat panleteg ya. Baw sira ngaytu i begayan ya paꞌ it ega basta-bastang kabantugan.

1 Corinto 16:9

Ka dakel i kupagneg it panulduꞌ ku sini, baw talagang dakulay paglapusan ya. Temed dakel gasiꞌ i kalaban.

Filipos 4:3

Baw ikaw, Susugus, nga matuud nga katabyang ku, may ipagpakiꞌupakat ku gasiꞌ it imu. Beteꞌ tabangen mu i duwang kababayan ngaytu nga magkagayen na sira. Ka sira ngaytu, dakulaꞌ talagay tabang nirat aken kat pangadal ku it Magayen ngaytu nga Baritaꞌ. Subung gasit ki Clemente baw beken paꞌ nga magtabang it aken. Talagang pagsisiguruun ku nga mamagsusurat nay mga ngaran nira duꞌun it pagsuratat mga ngaran it kumpur mabgayan it kaꞌgenan nga egay kaskedan.

Colosas 4:3

Baw kada magpanalangin kamu, pagsangpiten mi gasiꞌ kami. Angutun mi nga abriyan kamit Ampuꞌang Diyus it dalan nga makapasigi namen nagat pangadal i ampang ya pasar it karibriyan duꞌut ki Cristo. Tagnaꞌ, madlem paytu, temed kayti ipiyaꞌrut ya nang banar. Sabap it pangadal ku it itung mga bagay pagpipirisuun aku na.

2 Timoteo 2:19

Temed talagang mapaꞌgeng-mapaꞌgen i kamatuudan nga garing duꞌut Ampuꞌang Diyus baw magꞌuꞌunay sikaytu i pamayaꞌ it mga taawan ya. Binggayan ya paꞌ sirat kariꞌgenan nga magꞌaat, “Magkakilalaan it Ampuꞌang Diyus i kumpur taawan ya nga matuud.” Baw paꞌugdun ya paꞌ, “Kaꞌilangan nga in siyuy magpamatuud nga nagpasakep na kanyat Ampuꞌan, paꞌalaidan yay muꞌsang karaꞌe-raꞌetan.”

1 Pedro 1:12

Temed piyaꞌyagan sirat Ampuꞌang Diyus nga, ega kat kanirang timpu in daꞌga aten mana ngaytung timpu kayti, matuman i mga bagay ngaytu nga ipiyagpasugid it kanira. Itung mga bagay, yanagaytuy ipagpangadal it imyu it mga magpangadal it Magayeng Baritaꞌ kat tabang it Espiritu Santo nga ipiyapasarum it Ampuꞌang Diyus kat bilug ta. Talagang maski mga anghil, pagpasepsepan nirang banar i mga bagay ngaytu.

1 Juan 4:6

Temed kita, sakep ta nat Ampuꞌang Diyus. Baw in siyuy magkilala it Ampuꞌang Diyus, iyan i magpagneg it aten. Iyan ega sakep it Ampuꞌang Diyus, ega magpagneg kanyat aten. Sikayan ta maꞌrutan i kamatuudang ampang nga garing duꞌun it Espiritu Santo baw kaꞌambutang ampang nga garing duꞌun it ki Satanas.

3 Juan 1:14

Pagꞌiꞌinawaren ku sana nga kapaꞌasan aku it imyu it madaliꞌ, isaꞌun kapagsugi-sugid tat nagꞌadap.

Mga Ipiyalteg 20:15

Baw iyan ega magsusurat i ngaran duꞌun it pagsuratan it mga mabgayan it kaꞌgenang egay kaskedan, itiyalpak na gasiꞌ duꞌun.

Mga Ipiyalteg 3:20

Ka wayni aku na. Subung it magtitindeg aku asat salakwatan, magpaꞌungaꞌ-ungaꞌ nga pasleden. Ka in siyu-siyuy sumambung, nga mabri it talaꞌep ya ka pasleden ya aku, daꞌnay kasasawan it pagꞌiba-iba namen.

Mga Ipiyalteg 7:17

Sabap kanya ngaytung paꞌaaten nga Uꞌuybun It Tupa nga situt tepad it araꞌdungan ngaytut adiꞌ, kanya ngaytuy marigra nat kanira. Talagang tabanen ya na sira duꞌun it pagtumbudan it danum nga magbegay it kaꞌgenan. Baw daꞌnay tumuruꞌ nga luwaꞌ kat mga mata nira ka subuk panisen nat Ampuꞌang Diyus, ka awaꞌen ya nay kasmek nira.”