Juan 1:4 - Tagbanwa

⁴ Kanya ngaytung pagpangaranan it Ampang, kanyang kaꞌgenan, ega basta-basta, nga yanay puꞌun it kaꞌgenan it muꞌsang taw. Baw kanya ngaytu i piyakatidaw isaꞌun maꞌyagan i mga taw.

Juan 1:4 Iomraidhean Croise

Mateo 4:16

naꞌlay na nga magpangaꞌgenan kat kadleman i mga taga Galilea ngaytu, temed inyagan na sirat eyag nga ega basta-basta. Subung sirat sinakepan it kamataynen ka egay inawar nira, temed kayti, inyagan na sira.”

Lucas 2:32

Maꞌyagan yay mga bangsa nga ega Judio pasar it dalan it karibriyan. Baw sabap it kanya ngaytu, dumakulaꞌ i kabantugan nameng mga Judio nga mga taawan mu, nga tungtung-inapuꞌ ni Israel.”

Juan 11:25

Tubagen ni Jesus, maat ya, “Aku ngaytu i manigꞌegen it paꞌuliꞌ baw puꞌun it kaꞌgenan. Iyan magpamayaꞌ it aken, maski matay na kanya siguradung maꞌgen nagat paꞌuliꞌ.

Juan 12:35

Maat siꞌ ni Jesus it kanira, “Dekeyeꞌ mana nga timpu nga maꞌiba-iba mi aku nga bilang tidaw nga magꞌeyag it imyu. Kaꞌilangan magpatulduꞌ kamu mintras magkaꞌyagan kamu paꞌ. Pasbung kamut taw nga magpanaw it maꞌyag paꞌ, nga ega magpadlem. Ka ega magkaturnuwan it magpanaw it madlem in ari magayen nga panawan ya.

Juan 12:46

Ka naꞌasitu aku nga bilang tidaw it banwa ngaytu, isaꞌun ega maneꞌteꞌ kat kadleman i iyan nga mamayaꞌ it aken.

Juan 14:6

Timnubag si Jesus, maat ya, “Aku na ngaytu i dalan, aku i kamatuudan baw aku gasiꞌ i kaꞌgenan. Egay kapaꞌaduꞌun it Diyus Amaꞌ in daꞌga akuy dalan nga panawan ya.

Juan 3:19

Ukumanan sira it atkaytu sabap kanya nga paꞌaateng tidaw, naꞌasitu nat banwa, temed yagay paglabiyen it katataawan, kadleman, ega kaꞌyagan ngaytu, sabap it sigi gang buwat nirat karaꞌe-raꞌetan.

Juan 5:21

Ka in magꞌuꞌunu pagꞌegnen it Amaꞌ i mga miyatay, atkayan naga egnen naga it Anak i kumpur ireg ya nga egnen.

Juan 5:26

Iyan Amaꞌ, egay piyanggaringan it kaꞌgenan ya ka kanyay puꞌun it kaꞌgenan. Baw ipiyabetang-betang ya nga atkayan gasiꞌ i kaꞌgenan it Anak ya.

Juan 8:12

Pagsaꞌup siꞌ ni Jesus it mampang duꞌun it mga taw, maat ya, “Aku ngaytu i bilang tidaw nga magbegay it eyag kat pikiran it mga taw situt sinirungat langit. Iyan sumunud it aken, ega na subung it magpanaw it delemen, sabap pagꞌeꞌyagan na kanyat tidaw ngaytu nga magbegay it kaꞌgenan nga egay kaskedan.”

Juan 9:5

Kabilangan ku, piyakatidaw. Baw kaꞌlay ku ngaytu situt banwa, magsisigi nga pagꞌeyagan kuy pikiran it mga taw.”

Mga Binwat 26:23

Ka daꞌga basaꞌan magbebtang duꞌut mga isiyurat nira nga kaꞌilangang lumabay it dakulaꞌ nga kakuriꞌan i Cristo ngayting Manriribring Adiꞌ nga isiyanggup? Magsusurat gasiꞌ nga kanya i uꞌna-uꞌnang egnen it paꞌuliꞌ nga ega na matay it sumaꞌup. Baw kat pagꞌegen ngaytit kanya, mabgayan yat kaꞌyagan i muꞌsang taw, mga Judio baw daꞌga, pasar it karibriyan.”

1 Corinto 15:45

Ka magsusurat duꞌut kasuratan nga iyan uꞌna nga taw nga si Adan, giyuna baw binggayan it ginawa. Temed subraꞌ kaytu si Cristo, nga pangaran it kanya, sauryan nga Adan. Ka giyantiyan i bilug ya it panlangit nga bilug baw nagbaraꞌ kanya nga manigbegay it panlangit nga kaꞌgenan nga egay kaskedan.

Efeso 5:14

Subung tu it mga ampang ngayan nga magꞌaat, “Masulag ka na, ikaw nga maꞌlek pay igaꞌ. Ikaw nga patay, magꞌegen ka na. Siguradu nga eyagan kang banar ni Cristo.”

Colosas 3:4

Takaꞌ in maꞌbut na nga itanyag na i kabantugan ni Cristo, kanya nga puꞌun it kaꞌgenan ta ngaytu, duꞌun matanyag gasiꞌ i aten nga kabantugan ka mabagiꞌan tami.

1 Juan 1:1

Pagsuratan ku kamu pasar it ki Jesu-Cristo, kanya nga pagpangaranat Ampang nga magbegay it kaꞌgenan nga egay kaskedan. May kanya naytung lagi it tagnaꞌ paꞌ, iyan ega pay banwa. Baw kami nga mga alagad ya, talagang nagnegan namen i mga ampang ya, baw talagang naltegan namen kanya. Naꞌeket-eket namen baw naꞌipuꞌ it alima namen.

1 Juan 1:2

Eeꞌ baꞌ, kanya ngaytung puꞌun it kaꞌgenan, itiyanyag nat amen. Talagang naltegan namen kanya. Aypaꞌ ka ipagpamatuud namen na, baw ipagpangadal namen nat imyu i pasar it kanya ngaytu nga egen it egay kaskedan. Garing it tagnaꞌ paꞌ, duꞌun kanya nga lagi it adapan it Diyus Amaꞌ, baw kayti, itiyanyag na kanya situt amen.

1 Juan 5:11

Ka ituytu i pamatuud ya ngaytu. Kaꞌgenan nga egay kaskedan i begay it Ampuꞌang Diyus it aten, baw maꞌaten tu sabap duꞌun it pamayaꞌ baw pagsarig tat Anak ya ngaytu.

Mga Ipiyalteg 22:1

Ipiyalteg gasit aken it anghil i magburus nga danum nga magbegay it kaꞌgenan. Talagang maliꞌgaw nga maliꞌgaw subung nat pirmirang salamin. Magtumbud ti duꞌun it araꞌdungan it Ampuꞌang Diyus baw paꞌaaten ngaytung Uꞌuybun it Tupa kat pagkaꞌadiꞌ nira.

Mga Ipiyalteg 22:16

Talagang aku nga si Jesus i timnaꞌeg it anghil ku ngaytu, isaꞌun kapatantu it imyu nga mga gurupu it mga taawan ku nga magpamayaꞌ it aken i itung mga bagay. Talagang liniꞌwanan ku, adiꞌ nga si David, ka matuud nga tungtung-inapuꞌ ya naga aku. Esa gasiꞌ nga panaꞌwag it aken, Magsinggat nga Buntatalaꞌ.”