Juan 1:16 - Tagbanwa

¹⁶ Kat kadakulaꞌ it raras yat aten, magꞌaꞌabut-aꞌabut situt aten i ildaw ya.

Juan 1:16 Iomraidhean Croise

Zacarias 4:7

Maski may ipagpalsa nga atnat bukid i kadakulaꞌ, letga-letganan mu yan nga maꞌawaꞌ. Talagang emanen mu i pabwat it Templo ngaytu baw in ikabit na i kiyaꞌpusan mana nga ipagpapaꞌgen nga batu, pabiba na i mga taw nga ipaggaꞌu-gaꞌuy nira, “Sana ildawan tu nga pirmi it Ampuꞌang Diyus.”’”

Mateo 13:12

Iyan magpamayaꞌ nat inadalan ya situt aken, dungagan it Ampuꞌang Diyus i kasepsep ya seked magbastanti nay magkaꞌrutan ya. Temed iyan ega magpakimatuud it nagnegan ya ngaytu, awaꞌen nat Ampuꞌang Diyus i maski iyan nga nasepsepan ya na isaꞌun egay lapusan ya.

Mateo 3:11

Pagbawtisen ku kamu situt danum, bilang tandaꞌanan lamang it pagsinguliꞌ baw pangindiꞌ mit mga kasalaꞌan mi. Temed yay matuud, iyan mabut nga magsusunud it aken, kanya nga ibawtis it imyu, Espiritu Santo baw apuy. Talagang landaw paꞌ kanya it aken. Maski mawaꞌ it talumpaꞌ ya, ega mapakay nga mabwat ku, ka subrang banar i kataꞌasan ya.

Mateo 3:14

Siyabar kanya ni Juan nga magꞌaat, “Tabing galang it imu, unuka baliswaꞌ, nga akuy mawtis it imu, it aku talagay kaꞌilangan nga bawtisen mu?”

Lucas 21:15

Sabap aku ngaytu i megay it imyu it pangangampang mi nga may ega basta-bastang kasepsep, nga ega kaya nga tubagan u pakidaꞌgan it maski siyu nga mga kakuntraꞌ mi.

Juan 3:34

Sabap iyan nga tiyaꞌeg it Ampuꞌang Diyus, simpri egay beken nga ipagsugid ya in daꞌga iyan ipagpasugid nagat Ampuꞌang Diyus, sabap may Espiritu Santo na duꞌut kanya nga egay kaskedan it tabang ya.

Roma 5:17

Maꞌyag nga sabap it kasalaꞌan it sangbat nga taw, si Adan ngaytu, nasakep nay muꞌsang taw it kamataynen. Temed sabap gasiꞌ it sangbat nagang taw nga si Jesu-Cristo, subrang piyakamagayen i matanggap it iyan magpaꞌildaw-ildaw it kanya. Ka sabap it ildaw it Ampuꞌang Diyus nga bastanting-bastanti, begayan sirat begay-matag nga maꞌiriꞌ kat panleteg ya i muꞌsang kasalaꞌan nira, baw kaꞌibaan na sira ni Cristo it magꞌadiꞌ duꞌun it langit.

Roma 5:2

Sabap it binwat ngaytu ni Jesu-Cristo nga pagpamayaꞌnen baw pagsarigan ta, pagsasakpen ta na it ildaw ngaytut Ampuꞌang Diyus nga paglabayen ta na kayti. Baw talagang pagsisiguruun tat masagyang-masagya nga sakpen ta gasiꞌ it ega basta-bastang kabantugan nga ibgay it Ampuꞌang Diyus it aten duꞌun it langit.

Roma 5:20

Iyan naꞌlay na, ipiyaꞌrut nat Ampuꞌang Diyus i mga urdin ya, isaꞌun subraꞌ nga makilalaan it taw i kadakulat pagranggaꞌ nirat mga urdin ngaytu. Temed maski sang unuy kadakulat kasalaꞌan it taw, subrang-subraꞌ nga magbastanti i ildaw it Ampuꞌang Diyus.

Roma 8:9

Temed kamu, paribasay magsasarum nay Espiritu Santo asat bilug mi, daꞌkamu na pagbebegbegan it mga singkadan mi ngaytung kaꞌiꞌirgan in daꞌga Espiritu Santo na ngaytuy magbebegbeg it imyu. (In beteꞌ ega magsasarum kat bilug it esang taw i isiyanggup ni Cristo nga Espiritu Santo, ireg sugiden talagang ega paꞌ sakep ni Cristo.)

Efeso 1:23

Sabap kabilangan it mga magpamayaꞌ ngaytu, subuk bilug ya, nga pangumplitu it kanya, kanya nga kaꞌustuꞌang kakumplituwan it muꞌsang-muꞌsa.

Efeso 3:19

Baw sana subraꞌ nga malabayan mi baw taꞌseben i nakem mi sabap it raras ya ngaytu, lamang ega ngaytu magkatangked-tangked it taw i kapuꞌsaan ya, isaꞌun makumplituwan kamu it kakayaan nga ikaguru it muꞌsang ipagpaguru it Ampuꞌang Diyus it imyu nga adat ya.

Colosas 1:19

Sabap yay ipiyabetang-betang it Ampuꞌang Diyus nga in magꞌuꞌunu i pagkaDiyus ya, maltegan kat Anak ya nga si Jesus. Aypaꞌ atkayan naga talaga i pagkaDiyus ni Jesus ngaytu.

Colosas 2:3

Talagang si Cristo lamang ngaytu i magkapisiꞌan it ustuꞌ baw kamatuudan nga kasepsep pasar it tagu-taguꞌ ngaytu nga pabetang-betang it Ampuꞌang Diyus.

1 Pedro 1:11

Ka ireg nirang ireg matantuwan in kaꞌnung timpu baw in magꞌuꞌunu-unuytu magꞌabut i mga bagay nga ipiyagpasugid it kanira it Espiritu Santo ni Cristo. Sabap egay beken nga pagpaꞌiguꞌan it mga ipiyagpasugid ngayti, mga malabayan ni Cristo nga kakuriꞌan bawnga kabantugan nga liꞌwan ya.

1 Pedro 1:2

Kamu ngaytu, piniliꞌ it Diyus Amaꞌ uyun naga kat pagnanakmen ya na nga lagi baw nakapabetang-betang ya garing paꞌ it katagnaꞌ-tagnaꞌan. Piniliꞌ ya kamu isaꞌun kat keseg it Espiritu Santo nga magsasarum kat bilug mi, buwaten kamu nga masiyunudun it ki Jesu-Cristo, nga napasinsiya nay mga kasalaꞌan mi sabap it ipiyaturuꞌ nga duguꞌ ya. Ipagpanalangin ku nga sana magbastanti nga pirmi asat imyu i ildaw baw kaꞌimbengan it nakem nga ipagbegay it Ampuꞌang Diyus.