Genesis 8:21 - Tagbanwa

²¹ Siyagyaan it AMPUꞌANG DIYUS nga inarek ya, bawnga maat it AMPUꞌANG DIYUS kat sadili ya, “Ega na sumpaan kut sumaꞌup i banwa sabap it kasalaꞌan it taw. Pagꞌuꞌrutan ku nga karaꞌe-raꞌetan i nakapnuꞌ it nakem it taw garing pat pagwaꞌwaꞌ ya. Temed ega na puuꞌun ku i muꞌsang maginawa nga subung it binwat ku ngaytu.

Genesis 8:21 Iomraidhean Croise

Genesis 3:17

Bawnga lalaki siꞌ ngayti, nga yanayti si Adan, i inaat it AMPUꞌANG DIYUS. “Kayti it namayaꞌ ka it inaat it asawa mu baw kimnaꞌen kat buwat kayu nga ipiyagpina-pinaꞌ ku nga ega kaꞌnen mu, paliꞌ mu nagay sumpaan ku nay lugtaꞌ. Kaꞌilangan magpaꞌres ka nga pirmi it dakulang paꞌres isaꞌun makapisiꞌ ka it ipagkaꞌgen, mintras egen ka paꞌ.

Genesis 4:12

Garing kayti, maski magpaꞌres ka it panguma-uma mu, talagang ega manggayen. Magluꞌug-luꞌug nay baraꞌan mu.”

Genesis 5:29

Piyangaranan yat ki Noe, ka maat ya, “Ituy inu-inu it aten kat makuriꞌ ngaytu nga buwat ta, nga magpakariga kat pangarigrat lugtaꞌ nga siyumpaan it AMPUꞌANG DIYUS.”

Genesis 6:13

Iyan atnakayti, inaat it Ampuꞌang Diyus si Noe, “Kayti puuꞌun ku nay muꞌsang taw, pati banwa ngaytu, tunawun ku na, sabap talagang punung-punuꞌ nay banwa ngaytu it karaꞌe-raꞌetan nira.

Genesis 6:17

Atkaytuy buwaten mu sabap magꞌaꞌabut talaga nga ipapanaw ku kat muꞌsang banwa i ega basta-bastang lenep, isaꞌun mapuuꞌ i muꞌsang maginawa kat sinirungat langit. Matay sirang muꞌsa.

Genesis 6:5

Namuyaan it Ampuꞌang Diyus nga karaꞌe-raꞌetan nay nakapnuꞌ duꞌun it katataawan ngayti, ka pagsumbayaꞌen na nira nga banar i muꞌsang karaꞌe-raꞌetan kat nakem nira.

Genesis 6:7

Iyan atnakayti, maat it AMPUꞌANG DIYUS, “Puuꞌun kuy katataawan nga giyuna ku kat sinirungat langit. Ega lamang taw, pati mga ramu-ramu baw manu-manuk, ka magkasmekan kuy in unuka giyuna ku sira.”

Isaias 53:6

Kitang muꞌsa, subuk mga tupa nga namagkateꞌag-teꞌag na nga nanganya-kanya nat piyanawan. Temed, iyan ukuman nga panriga nga pagꞌangutun it kasalaꞌan tami nga muꞌsa, ipiyalabay na it AMPUꞌANG DIYUS it kanya.

Mateo 15:19

Sabap magpanggaring kat nakem i muꞌsang maraꞌe-raꞌet nga pagpikiren nga magtaban it taw kat mga itu ngaytung pagbuwaten, nga pangimatay, muꞌsang kalasit pamakun duꞌun it ega asawa mu, panakaw, pamuwat-buwat baw panibabaꞌ.

Juan 3:6

Sabap iyan ipiyanganak it taw, taw naga yan nga uripen pat kasalaꞌan. Temed iyan ipiyanganak it sumaꞌup, ka ipiyanganak nat Espiritu Santo, ribri na kat magpanguripen ngayti.

Roma 1:21

Ka lamang magpangbit kat nakem nira nga may Ampuꞌang Diyus, ega ga lamang paggalangen baw pagbantugun nira. Ega gasiꞌ pagpasalamatan nira i kadakulat ildaw ya ngaytut kanira. Aypaꞌ, liꞌwan ya, nagbalyung ega nay kakapulusan it mga pagpikiren nira baw, nakem nirang egay kasepsep, nadleman nang banar.

Roma 3:23

Makasalaꞌan talagay muꞌsa baw alaid kat ega basta-bastang kataldengan it Ampuꞌang Diyus.

2 Corinto 2:15

Ka sabap it pangadal namen it Magayeng Baritaꞌ pasar it ki Cristo, subung kami it piyakamabanglu nga pagsagyaan it Ampuꞌang Diyus, nga magkaꞌarek it mga taw nga may karibriyan na, baw sira nga kamatayneng panriga nga egay kaskedan i abutun.

Efeso 5:2

Mangaꞌgenan kamu it pirming pagbegbegan it raras mi it maꞌiba mi. Pasbung kamut ki Cristo nga, kat kadakulat raras ya it aten, ipiyagtas yay ginawa ya, nga ipiyasbung yay sadili ya it piyakamabanglu nga panalisi nga pagsagyaan nga banar it Ampuꞌang Diyus.

Filipos 4:18

Ta kayti, it natanggap ku nay ipiyaduꞌlung mi it ki Epafrodito, magbastanti aku sit muꞌsa, ka subray basta naytu. Talagang kabilangan it mga tabang mi ngaytu, babangluun nga ipagsamba duꞌun it Ampuꞌang Diyus nga magkasagyaan ya, ka pagsagyaan ya talaga i buwat mi ngaytu.

1 Juan 5:19

Magkaꞌrutan ta nga kita, mga anak nat Ampuꞌang Diyus. Temed si Satanas pay magsasakep situt sinirungat langit.