Genesis 3:6 - Tagbanwa

⁶ Ta, it namuyaan it babay ngayti nga palan magayeng kaꞌnen i buwaꞌ it iting kayu, ka magaye-gayeng pagletganan, baw iti na ngayti, mapisiꞌan it ega basta-bastang kasepsep, miyuꞌpuꞌ na kanya ka kimnaꞌen na. Binggayan ya gasiꞌ i iba ya ngayting lalaki nga minlep duꞌut kanya. Pagkabgay it kanya, kiyaꞌen ya na gasiꞌ.

Genesis 3:6 Iomraidhean Croise

Genesis 3:12

Maat i tubag it lalaki ngayti, “Ay babay ngaytu bang ibinggay mut aken nga iba ku, kanya bay minggay it aken it buwat kayu ngayan. Pagkabgay ya, kiyaꞌen ku na.”

Genesis 3:17

Bawnga lalaki siꞌ ngayti, nga yanayti si Adan, i inaat it AMPUꞌANG DIYUS. “Kayti it namayaꞌ ka it inaat it asawa mu baw kimnaꞌen kat buwat kayu nga ipiyagpina-pinaꞌ ku nga ega kaꞌnen mu, paliꞌ mu nagay sumpaan ku nay lugtaꞌ. Kaꞌilangan magpaꞌres ka nga pirmi it dakulang paꞌres isaꞌun makapisiꞌ ka it ipagkaꞌgen, mintras egen ka paꞌ.

Genesis 39:7

Aypaꞌ ka liyangkaan kanya it agalen ya nga babay nga asawa ngayti ni Potifar. Kaꞌsa inaat ya si Jose, “Uliden mu aku!”

Genesis 6:2

Paribasay mga daraga i mga babay ngayti nga anak it taw, naꞌirgan it mga anak it Ampuꞌang Diyus. Egay beken, siyari nira nat asawa i kanya-kanyang naꞌigut mata.

2 Samuel 11:2

Kaꞌsang apun, minigaꞌ si David. Pagkasulag ya it apu-apun na, miyapyat duꞌut mapatag nga atep it mabakas ngayting balay ya. Ta it duꞌun na kanya magpanaw-panaw, may nalawag ya nga magpamaꞌyuꞌ nga babay nga masyadung kadaraga.

Mateo 5:28

Temed kayti, aku na i magꞌaat it imyu, in siyu-siyuy panenyekan yat esang babay may antap it nakem ya, subung it napakunan ya na.

1 Timoteo 2:14

Baw ega si Adan i naꞌakalan ni Satanas, in daꞌga si Eva ngayti. Kanyay uꞌnang nagkasalaꞌan ka nagpasaꞌli it inaat it Ampuꞌang Diyus.

Josue 7:21

Sabap kat mga bagay nga narangpas ku duꞌun it Jerico nga maat antengen, may naltegan ku nga talagang piyakamagayeng gulamen nga garing duꞌun it Babilonia. Baw may walung kilu i pirak baw sang turung i bulawan nga siguru adeꞌdeng it duwang kilu i beꞌgat ya. Pinsiꞌ kuy mga iti ngayti bawnga ilimbeng ku na duꞌun it pagbabala-balayan ku ngayti. Ipiyabuliꞌ ku i pirak ngayti.”

1 Juan 2:16

Sabap muꞌsang karaꞌe-raꞌetan situt sinirungat langit, kuntraꞌ talaga it Ampuꞌang Diyus. Subung it adat nga pagsumbayaꞌen i sadiling kaꞌirgan nga maraꞌe-raꞌet, adat nga kupisiꞌen nay muꞌsang bagay nga magkaltegan, baw adat nga ipagpalandi-landi i mga bagay kat pangaꞌgenan ta. Ega yan garing duꞌut Diyus Amaꞌ i itung mga adat, in daꞌga garing situt sinirungat langit.

Mga Pagbayaꞌen 14:17

Sigi nang pasuga-sugaw baw paꞌaluk-aluk it babay ngayti duꞌut ki Samson it seledan it pitung aldaw ngayti nga pagkasagyaan nira. Aypaꞌ ka iyan ikapitu nang aldaw, nakasugid na ni Samson i pagpintuꞌun it inigem ya ngayti, sabap it sigi-sigi na ngayti nga ingeꞌret it babay ngayti. Ta it isiyugid na ni Samson i pagpintuꞌun, dayun it isiyugid it babay ngayti duꞌut mga kabilug ya ngayti.