Genesis 26:5 - Tagbanwa

⁵ Buwaten kuytu sabap siyunud it amaꞌ mu nga si Abraham i mga ipiyagꞌaat ku it kanya. Talagang siyunud yay muꞌsang mga taꞌeg baw mga ipiyagꞌurdin ku it kanya.”

Genesis 26:5 Iomraidhean Croise

Genesis 12:4

Ega maat diyaꞌga ni Abram i inaat ngaytit AMPUꞌANG DIYUS. Miyayaꞌ it kanya i kamanaken ya nga si Lot. Pitung puluꞌ may lima nang taꞌun i idad ni Abram it liminꞌid na ngayti duꞌut Haran.

Genesis 17:23

Iti nga laging aldaw, uyun kat inaat ngaytit Ampuꞌang Diyus, tiyuriꞌan nga lagi ni Abraham si Ismael baw muꞌsang kalalakiyan duꞌut seled it pamalay-balay ya, pati mga anak it uripen ya nga duꞌun nay siyakitan it seled it pamalay-balay ya, baw iyan mga ipiyaꞌalang duꞌun it kanya, basta lalaki piyamagturiꞌan ya na.

Genesis 18:19

Piniliꞌ ku kanya nga bilang magayeng iba-iba ku isaꞌun tulduꞌan yay kaꞌanakan ya nga sunudun nira i kaꞌirgan ku ngaytu baw mangaꞌgenan sira it mataldeng kat panleteg ku. Ka basta sunudun ga nira, tumanen kuy muꞌsang isiyanggup ku it ki Abraham ngaytu.”

Genesis 22:16

Magꞌaat i inaat, “Aku nga AMPUꞌANG DIYUS mismu i magsanggup it imu. Kayti nga ega ipiyagꞌimet mut aken i paeꞌesa-esang anak mu, talagang ildawan ku ikaw nga banar.

Genesis 22:18

Baw manggaring kat mga tungtung-inapuꞌ mu, maꞌildawan i muꞌsang bangsa situt sinirungat langit, sabap siyunud mu i inaat ku it imu.”

Genesis 26:6

Aypaꞌ duꞌun nay tiyaꞌidan ni Isaac it Gerar ngayti.

Mateo 5:19

Aypaꞌ in siyu-siyu nga ega pagsunudun ya i maski dekeyeꞌ lamang nga inaat it mga urdin ngaytu, baw gasiꞌ nga ipanulduꞌ ya it beken nga taw nga ega gasiꞌ sunudun nira, ipabetang kanya nga timawaꞌ duꞌun it kaꞌadiꞌan it Ampuꞌang Diyus. Temed iyan magsunud it mga urdin baw tulduꞌan ya gasiꞌ i beken it sumunud sira, ipabetang kanya nga matanug duꞌun.

Mateo 7:24

“Aypaꞌ in siyu-siyu nga magpagneg baw magsunud it mga ipagpanulduꞌ ku ngaytu, subung kanya it mapikir nga taw nga piyatindegan yat balay ya duꞌun it lugtaꞌ nga nagragiꞌ it batu baw ipiyatꞌed ya.

1 Corinto 15:58

Aypaꞌ, mga pagmaꞌaleng sulsug ku kat pamayaꞌ, magmapaꞌgen kamu nga banar nga ega magꞌugad-ugad i pamayaꞌ, baw paꞌresan mi nga pirmi i buwaten it Ampuꞌan. Tutal magkaꞌrutan mi na nga ega salaud i maski unu nga paꞌres mi sabap it kanya.

Galacia 5:6

In maglalagpit tami nat ki Cristo Jesus talagang ega nay kuwintaꞌ it pagturiꞌ ngaytu in naturiꞌan u ega. Iyan i ega matuduꞌ, kamatuudang pamayaꞌ baw pagsarig it ki Cristo ngaytu nga magkamuyaan kat kadakulat raras tat masigkataw ta.

Hebreo 11:8

Ta, sabap gasiꞌ it pamayaꞌ baw pagsarig ya it Ampuꞌang Diyus, siyunud ni Abraham i inaat it Ampuꞌang Diyus it kanya nga paꞌugad duꞌun it ipasadilit kanya nga rugar. Talagang ega diyaꞌga ya maski egay uru-urut ya pasar it rugar ngayti nga paꞌaduꞌunan ya.

Santiago 2:21

Ka panawun it pikiran mi si Abraham nga kiyaꞌapuꞌ-apuꞌan tami. Daꞌga baꞌ ipiyagpabetang kanya nga mataldeng it Ampuꞌang Diyus sabap duꞌun it buwat ya, iyan siyunud yay inaat nga ibgay yat Ampuꞌang Diyus i anak ya nga si Isaac nga buwateng ipagsamba nga antengen duꞌun it papangantengan?