Genesis 24:7 - Tagbanwa

⁷ Ka yay matuud, nalꞌidan ku na i rugar ni Amaꞌ baw tiyananan ku nay mga kasulsugan ku, ka piyapaꞌasitu aku na ngaytut AMPUꞌANG DIYUS nga duꞌut langit nga magbebegbeg it muꞌsa. Ta kanya ngaytu i simnanggup it aken it may sumpa, nga ibgay yat aken baw mga anak-inapuꞌ ku i itung banwa. Tumaꞌeg yan kanyat anghil ya nga yay manguꞌna it panaw mu. Kanya i tumabang it imu isaꞌun may maparagan mu nga maꞌasawa it anak ku.

Genesis 24:7 Iomraidhean Croise

Genesis 13:15

Sabap kat paꞌari-ari ngaytung ayun nga ipagpalawag kut imu, ibgay kuytung muꞌsa it imu, subliyen it anak-inapuꞌ mu seked it maꞌlay.

Genesis 15:18

Sikayti ipiyamatuud it AMPUꞌANG DIYUS nga talagang tumanen yay pakiꞌupakat ya ngaytit ki Abram. Maat ya, “Talagang ibgay kut mga tungtung-inapuꞌ mu i itung banwa, garing duꞌut matanug nga danum it banwa nga Egipto mabut duꞌut kadanuman it Eufrates.

Genesis 16:7

Nagpakikita it ki Agar i Anghil it AMPUꞌANG DIYUS duꞌut esang tumbud it danum nga duꞌun it kapupuyangtan nga rugar. Iti i tumbud nga duꞌut dalan nga magpaꞌaduꞌut Shur.

Genesis 17:8

Talagang ibgay kut imu baw mga tungtung-inapuꞌ mu i mga rugar nga pagpanaw-panawan mu, muꞌsa ngaytung banwa nga Canaan, nga piyakakusas nira it seked maꞌlay nga banar. Baw talagang tarimaen ku sira, aku nga Ampuꞌang Diyus nira.”

Genesis 21:17

Nagnegan it Ampuꞌang Diyus i sugaw ngaytit waꞌwaꞌ. Pagkagneg ya, nanggaꞌmaran i Anghil it Ampuꞌang Diyusnga duꞌun it langit i garing it ampang ngayti. Maat ya, “Agar, unuy magkasmekan mu? Ayaw kat regen. Nagnegan it Ampuꞌang Diyus i sugaw it anak mu.

Genesis 22:11

sakaliꞌ nga nakagneg kanyat taꞌwag nga duꞌun it langit i garing. Anghil it AMPUꞌANG DIYUS i magpataꞌwag it kanya, nga magꞌaat, “Abraham, Abraham!” Maat i tubag ya, “Wayni aku, Agalen ku.”

Genesis 24:3

Ireg ku nga sumumpa ka, nga pagdedngegen it AMPUꞌANG DIYUS, kanya nga magbebegbeg it banwa may langit. Isumpa mu nga ega situt Canaan ngaytung pagtataꞌidan ta kayti i piliꞌan mut asawaen it anak ku nga si Isaac.

Genesis 24:40

Yagay tubag yat aken, maat ya, ‘Talagang pagsisiguruun ku nga AMPUꞌANG DIYUS nga pagsirbiyan kung pirmi, pabayaꞌan ya ikaw it anghil ya isaꞌun magmagayen i panaw mu ngaytu. Aypaꞌ may maparagan mu naga nga asawaen it anak ku nga duꞌut kaduguꞌan ku nga kaꞌanakan naga ni Amaꞌ.’ Itu naytu i taꞌeg yat aken nga piyanaw ku ngaytu situ.

Genesis 26:24

Pagꞌabut ya duꞌun, nagpakikita siꞌ it kanya i AMPUꞌANG DIYUS it iti nga lagi nga delem baw inaat kanya, nga magꞌaat, “Aku i Ampuꞌang Diyus it amaꞌ mu nga si Abraham. Ayaw kat iꞌlam ka pagtatarimaen kuytu ikaw. Talagang ildawan ku ikaw baw padaklen ku nga banar i mga tungtung-inapuꞌ mu uyun kat isiyanggup ku it ki Abraham ngayti nga manigsirbi ku.”

Esdras 1:2

“Ituy ipagsugid ni Ciro nga adiꞌ it Persia, Iyan AMPUꞌANG DIYUS nga duꞌun it langit, ipiyagꞌildaw ya it aken nga masakep ku i muꞌsang bangsa situt sinirungat langit. Baw ipiyagꞌaat yat aken nga kaꞌilangan nga pabwat aku it balay nga papagsambaan it kanya duꞌun it Jerusalem nga duꞌun it Juda.

Exodo 32:13

Demdemen mu naga i mga manigsirbi mu nga si Abraham, si Isaac baw si Jacob. Ka isiyanggup mu it kanira nga mga tungtung-inapuꞌ nira, padaklen mu nga subung it kadakel it mga bituꞌun duꞌut langit, baw seked it magtungtung-magꞌinapuꞌ makanira i kapuꞌsaan it banwa nga isiyanggup mu it kanira.”

Exodo 33:2

Papanguꞌnaan ku kamu it esang anghil, nga kanya i mimugaw it mga taw duꞌut abutun mi ngayti, mga Cananeo, mga Amorreo, mga Heteo, mga Perezeo, mga Heveo baw mga Jebuseo, nga taga duꞌun.

Daniel 2:44

Kat timpu it mga adiꞌ it ikaꞌpat ngaytu nga kaꞌadiꞌan, iyan Ampuꞌang Diyus nga duꞌut langit nga magbebegbeg it muꞌsa, patindeg kanyat kaꞌadiꞌan nga egay karanggaꞌan ya seked it kaꞌnu-kaꞌnu, baw egay maski siyu nga makasakep kaytu. Baw mabut nga ranggaꞌen yay beken ngaytu nga mga kaꞌadiꞌan, temed ega talagay kaꞌawaꞌan it itu ngaytung kaꞌadiꞌan nga ipatindeg it Ampuꞌang Diyus.

Mga Bilang 14:30

Egay maski esa nga makaꞌbut duꞌun it banwa ngayan nga isiyanggup ku, magpuyra it kana Caleb nga anak ni Jefone baw si Josue nga anak ni Nun.

Mga Binwat 7:5

Temed, lamang piyapaꞌugad situ si Abraham ngayti, maski sang tapal nga lugtaꞌ, egay ibinggay it Ampuꞌang Diyus it kanya nga sadili ya. Temed, lamang atkayti, isiyanggup it Ampuꞌang Diyus nga talagang ipasadili ya it kanya i banwa ngaytu, nga subliyen it mga tungtung-inapuꞌ ya, lamang ega pay aꞌanak yat iting timpu.

Deuteronomio 34:4

Inaat kanyat AMPUꞌANG DIYUS, “Iyan i banwa ngayan nga isiyanggup ku it mga kagiyaringanan mu nga si Abraham, si Isaac baw si Jacob, subliyen it mga tungtung-inapuꞌ nira. Ipiyalteg kuytu it imu temed daꞌka na kaꞌbut duꞌun.”

Hebreo 1:14

Aypaꞌ unuy pagꞌargan it mga anghil? Daꞌga baꞌ, mga anghil ngaytu, mga manigsirbi duꞌun it Ampuꞌang Diyus? Egaytu magkaltegan tami temed, muꞌsa sira ngaytu, mga pagtaꞌgen ya nga magtabang it kumpur ipiyabetang-betang ya nga begayan it karibriyan.

Hebreo 11:9

Kat keseg it pamayaꞌ baw pagsarig ya nanaꞌidan kanya nga subung it dayuꞌan lamang duꞌun it rugar nga iti na i isiyanggup it kanya it Ampuꞌang Diyus. Balay nga pagꞌiꞌistaran ya, magkapuru-purun lamang, atnaga si Isaac baw si Jacob nga timnanggap gasiꞌ it sanggup it Ampuꞌang Diyus nga atkayti naga.

Josue 1:6

Siguruun mu nga daꞌka gugumir-gumiren, magpakalalaki kang banar, ka ikaw siꞌ i manguꞌna it mga kadakel ngaytu it sakpen i banwa ngaytu nga ibgay kut imyu subung nat isiyanggup ku it mga kiyaꞌapuꞌ-apuꞌan mi.

Josue 24:3

Temed tiyaban ku si Abraham ngayti garing duꞌun it iting rugar baw piyapanaw ku kanya it pagtatarimaen ku duꞌut kalayawan it Canaan. Baw talagang inildawan ku kanya it dakel nga banar nga inapuꞌ. Sabap kat ildaw ku, nanganak sirat ki Isaac.

Mga Ipiyalteg 11:13

Bawnga sakaling yimnegyeg nay lugtaꞌ it ereꞌeret nga keseg, aypaꞌ ka gimnesneb i ikasang pulung bagiꞌ it siyudad ngayti. Pitung ribu i kadakel it taw nga natay. Iyan naꞌped nga mga taw, namagꞌiꞌlam na sirang ereꞌeret. Biyantug na niray Ampuꞌang Diyus nga duꞌun it langit.

Mga Pagbayaꞌen 2:1

Esang aldaw, iyan Anghil it AMPUꞌANG DIYUS, garing duꞌun it Gilgal naꞌaduꞌun kanyat Boquim, ka may aaten ya duꞌun it mga Israelita. Maat ya, “Ipiyaliꞌwan ku kamu duꞌun it Egipto, baw tiyaban ku kamu situt banwa ngaytu nga isiyanggup ku duꞌun it mga kagiyaringanan mi. Baw maat ku nga talagang ega ranggaꞌen ku i ipiyakiꞌupakat ku ngaytit imyu seked it kaꞌnu-kaꞌnu.