Genesis 2:9 - Tagbanwa

⁹ Garing siꞌ sikayti, piyatubuꞌ it AMPUꞌANG DIYUS sikayting rugar i muꞌsang kalasit kayu nga, buwaꞌ nira, magayen nga pagletganan baw magayen gasing pagkaꞌnen. May ipiyatubuꞌ ya gasiꞌ duꞌun it tengaꞌ it kalulwakan ngayti nga esang kayu nga pagpangaranan it Kayu nga Magpaꞌabwatay it Kaꞌgenan baw sang puꞌun nga kayu, Kayu nga Ipagkakilala it Magayen baw Maraꞌe-raꞌet.

Genesis 2:9 Iomraidhean Croise

Genesis 2:17

Temed iyan sang puꞌun nga kayu nga magkapisiꞌan ngaytut ipagkakilala it magayen baw maraꞌe-raꞌet, ega salyaen mut kumaꞌen. Sabap kat aldaw nga kumaꞌen ka it iyan ngayan, egay pagduwa-duwa nga kamataynen i panriga it imu.”

Genesis 3:22

Iyan atnakayti, maat siꞌ it AMPUꞌANG DIYUS, “Nakasubung-subung nat aten i taw ngaytu, nga magkaꞌrut nat magayen baw maraꞌe-raꞌet. Ta, it atkayan na, kaꞌilangan palꞌiden na sira isaꞌun ega na kapuꞌpuꞌ baw kumaꞌen it buwat kayu ngayang magpaꞌabwatay it kaꞌgenan, isaꞌun ega na maneꞌteꞌ nga egay kaskedan it kaꞌgenan nira.”

Genesis 3:24

Egay beken, inimugaw na sira. Pagkalꞌid nira, bintangan it AMPUꞌANG DIYUS i ayun duꞌut lebatan it kalulwakan ngayti it pagpangaranat kerubin nga bilang guwardiya, baw may subung it karis nga magdeleg i tarem ya nga magꞌebeg nga pirmi isaꞌun ega na malapasan i dalan nga magꞌaduꞌut kayu ngayting magpaꞌabwatay it kaꞌgenan.

Genesis 3:3

Temed iyan esa ngayang asat tengaꞌ it kalulwakan ngaytu, iyan i ipiyagꞌaat it Ampuꞌang Diyus it amen nga ega salyaen namen it kumaꞌen. Maꞌunu baꞌ kaꞌnen na, maski sekel, daꞌkami semkel, ka kamataynen i panriga yat amen.”

Genesis 3:5

Takaꞌ atkayan i inaat it Ampuꞌang Diyus it imyu ka magkaꞌrutan ya nga kat uras nga kumaꞌen kamu kayan, subuk kamukrat nga banar i mata mi. Egay beken, makasbung kamu nat Ampuꞌang Diyus nga magkakilala nat magayen baw maraꞌe-raꞌet.”

Juan 6:48

Aku i pangaꞌen nga magbegay it kaꞌgenan.

1 Corinto 8:1

Ta kayti, tubagen ku nay inaat mi pasar it karniꞌ nga maat ipagsalisi it mga taw duꞌut pagbete-beteꞌen nirang diyus. Matuud i inaat mi nga, magkaꞌrutan tami nga muꞌsa i kamatuudan pasar it mga pagbete-beteꞌen ngaytu. Temed dedemdemen mi tu, iyan mga magkaꞌrutan ta, yay magtaban it taw kat palandi-landi. Temed iyan pagmaꞌal baw kararas, sana yay magpupuꞌgun it aten ka yay magpapaꞌgen it pamayaꞌ it esa may esa.

Mga Ipiyalteg 2:7

Aypaꞌ it pagꞌargan it talinga, ipagpagneg, kaꞌilangan pagnegan mit magayen i pagꞌaaten ngaytu, nga ipagpatantu it Espiritu Santo kat mga magpamayaꞌ baw magsarig it aken. Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, begayan ku kanyat pudir nga makakaꞌen it buwaꞌ it kayu nga magbegay it kaꞌgenan, nga duꞌun it kalu-kalulwakan it Ampuꞌang Diyus.’ ”

Mga Ipiyalteg 22:14

Magkasagya talaga sira nga pirmi nga maglimpiyuꞌ it mga pakayan nira, nga ireg sugiden, pagsinguliꞌan i kada kasalaꞌan isaꞌun maꞌawaꞌ. Ka mabgayan sirat pudir nga semled situt siyudad ngaytu baw kumaꞌen it buwaꞌ it kayu ngaytu nga magbegay it kaꞌgenan.

Mga Ipiyalteg 22:2

Baw duꞌun nay burus ya it tengaꞌ it dakulang karsadaꞌ it siyudad ngayti. Padipag-dipag may magtutubuꞌ nga kayu nga magbegay gasiꞌ it kaꞌgenan. Bulan-bulan magbuwaꞌ i iting mga kayu, aypaꞌ ka sang puluꞌ baw duwang bisis it sang taꞌun may baꞌgung buwaꞌ nira. Baw mga daꞌun nira, ipagkagayen it katataawan isaꞌun egay magsarut.