Genesis 17:1 - Tagbanwa

¹ Iyan siyam nang puluꞌ baw siyam nga taꞌun i idad ni Abram, nagpakikita siꞌ i AMPUꞌANG DIYUS it kanya. Maat i inaat ya, “Aku i Ampuꞌang Diyus nga landaw nga gunaan. Kayti, ituy ipagꞌaat kut imu, mangaꞌgenan ka it uyun kat kaꞌirgan ku. Magpakataldeng ka.

Genesis 17:1 Iomraidhean Croise

Genesis 12:1

Bawnga inaat it AMPUꞌANG DIYUS si Abram nga maat ya, “Limꞌid ka na situt pagtataꞌidan mu ngaytung banwa. Tananan mu nay mga kaduguꞌan mu, baw pamalay-balay it amaꞌ mu, ka paꞌaduꞌun kat banwa nga itulduꞌ ku it imu.

Genesis 12:7

temed nagpakikita i AMPUꞌANG DIYUS it ki Abram baw maat ya, “Ibgay kut kaꞌanak-anakan mu i itung banwa.” Aypaꞌ binwat ni Abram duꞌun, nagpatindeg it esang papangantengan it ipagsamba duꞌun it AMPUꞌANG DIYUS nga nagpakikita it kanya.

Genesis 16:16

Walung puluꞌ may enem nang taꞌun i idad ni Abram, pagkaꞌanak ya ngayti duꞌut ki Agar it ki Ismael.

Genesis 18:1

Saꞌup siꞌ nga pakikita it AMPUꞌANG DIYUS it ki Abraham, duꞌun it pagbabalayan ngayti na Abraham nga duꞌut kakakayuwan ni Mamre, kaꞌsang magꞌaꞌdung si Abraham duꞌun it salakwatan it balay ya ngayting magkapuru-purun. Magpaderes-deres kanya ka masgay aldaw.

Genesis 18:14

“Unu, may maski unung bagay nga ega magkakayaan it AMPUꞌANG DIYUS? Kamatuudan talagaytu, pagtaꞌlib it sang taꞌun nga miyabut nay ipiyagtirminu ku nga timpu, paꞌuliꞌ aku naga situt imyu, baw manganak naga kanyat lalaki.”

Genesis 24:40

Yagay tubag yat aken, maat ya, ‘Talagang pagsisiguruun ku nga AMPUꞌANG DIYUS nga pagsirbiyan kung pirmi, pabayaꞌan ya ikaw it anghil ya isaꞌun magmagayen i panaw mu ngaytu. Aypaꞌ may maparagan mu naga nga asawaen it anak ku nga duꞌut kaduguꞌan ku nga kaꞌanakan naga ni Amaꞌ.’ Itu naytu i taꞌeg yat aken nga piyanaw ku ngaytu situ.

Genesis 26:2

Ka nagpakikita it ki Isaac i AMPUꞌANG DIYUS baw inaat kanya, “Isaac, ayaw kat paꞌaduꞌun it Egipto. Duꞌun i aduꞌunan mu it rugar nga iꞌaat ku it imu ka duꞌun i taꞌidan mu.

Genesis 28:3

Pagkatupus ya, isiyunud ya nga inampang, paꞌildaw siꞌ, nga magꞌaat, “Sana ildawan ka it Ampuꞌang Diyus nga landaw nga gunaan. Padaklen ya nga banar i mga tungtung-inapuꞌ mu seked it magbaraꞌ nga mabagiꞌ-bagiꞌ nga bangsa, lamang sang puꞌun sira.

Genesis 35:11

Maat siꞌ i beken nga ipiyagꞌaat yat kanya, “Aku i Ampuꞌang Diyus nga landaw nga gunaan. Dumakel ka nga taw, anak-inapuꞌ mu, magdadaklan sira nga mga taw. Manggaring-garing kat mga tungtung-inapuꞌ mu i subuk dakel na nga bangsa, lamang esa-esay puꞌun nira. Baw limiꞌwan kat mga inapuꞌ mu i mga magꞌadiꞌ.

Genesis 43:14

Sana ildawan kamu it Ampuꞌang Diyus nga landaw nga gunaan, isaꞌun masanguꞌan kamu nagat iting taw, nga makaꞌuliꞌ naga situt aken si Simeon baw si Benjamin ngaytu. Takaꞌ in iyan i pabetang-betang ya, nga ikaꞌilang it mga anak ku, isan paꞌ sugiden, kanya nay baalaꞌ.”

Genesis 46:3

“Aku i Ampuꞌang Diyus it amaꞌ mu,” maat ya. “Ayaw kat iꞌlam it paꞌaduꞌun it Egipto, ka duꞌun padaklen ku kamung padaklen seked it dakulaꞌ na nga bangsa.

Genesis 5:22

Garing it pagpanganak it ki Matusalem, may tulu pang gatus nga taꞌun nga magsisiging magpangaꞌgenan si Enoc uyun kat kaꞌirgan it Ampuꞌang Diyus nga bilang kaꞌiba-iba yang pirmi. May beken naga nga anak na Enoc nga babay, lalaki, nga simnunud it ki Matusalem.

Genesis 5:24

Pagkaꞌbut yat iting idad, paribasay bilang kaꞌiba-iba it Ampuꞌang Diyus si Enoc ngayti, nagsipat na lamang kanya. Daꞌna magkaparagan ka pinsiꞌ na kanya it Ampuꞌang Diyus.

Genesis 6:9

Talagang si Noe ngayti, mataldeng kanya kat panleteg it Ampuꞌang Diyus. Kat iting timpu, kanya lamang i magayen nga adat it taw, ega nay beken. Talagang pagpaꞌresan ni Noe i kaꞌirgan it Ampuꞌang Diyus nga bilang kaꞌiba-iba ya nga pirmi.

1 Mga Adiꞌ 2:4

Baw pagsisiguruun ku gasiꞌ nga tumanen it AMPUꞌANG DIYUS i iyan nga mga isiyanggup yat aken ngayan nga magꞌaat, ‘In sukur gat mga anak-inapuꞌ mu, inturun nira i pangaꞌgenan nira nga maneꞌteꞌ nga matuud i pagsunud nirat aken it pagsunud nga tingled talagay nakem nira, talagang magtungtung-magꞌinapuꞌ nga, kaduguꞌan mu, magsisigi naga nga may kapagꞌadiꞌ it bangsa ngaytu nga Israel.’”

1 Mga Adiꞌ 3:6

Katubag si Solomon, maat ya, “Inildawan mu nga banar baw siyanguꞌan it kamatuudan i amaꞌ ku nga si David sabap it naneꞌteꞌ gasiꞌ i kanyang pagsirbi it imu, masunud kanya nga banar baw mataldeng kat panleteg mu. Ta kayti ipiyasigi mu naga i ildaw mu it kanya, kayti nga piyapagꞌadiꞌ mu naga nga sumubli it kanya i sang kataawan nga anak ya.

2 Mga Adiꞌ 20:3

“AMPUꞌANG DIYUS,” maat ya, “sanguꞌan mu naga aku ngayni nga nangaꞌgenan nga magsunud it imu it kamatuudan. Magkaltegan mu nga talagang pagbuwaten ku it tingled i nakem ku i kumpur mga bagay nga uyun it kaꞌirgan mu.” Siminggaw kanya nga banar kat kadakulaꞌ it kasmek ya.

Exodo 6:3

Nagpakikita aku it ki Abraham, ki Isaac baw ki Jacob. Ipiyagsugid ku nga aku i Ampuꞌang Diyus nga landaw nga gunaan. Temed egay ipiyalteg ku it kanira nga adat ku nga magbayaꞌ it ngaran ku nga AMPUꞌANG DIYUS, adat ku nga magtuman it ipiyakiꞌupakat ku.

Daniel 4:35

Muꞌsa palan nga taw situt sinirungat langit, egay kuwintaꞌ. In unuy kaꞌirgan ya, iyan i pagbuwaten ya kat mga anghil duꞌun it langit baw kat katataawan situt denaꞌ. Ega talagay mapakay nga mamasul it kanya u makaparuri it pagbuwaten ya.

Mateo 19:26

Tiyermek sira ni Jesus it semyek baw miyampang nga magꞌaat, “Talagang egay maski unu nga mabwat it taw nga ipagkaribri it kanya. Temed in Ampuꞌang Diyus, mabwat yay muꞌsang bagay. Kanyay magkaribri it mga taw.”

Mateo 5:48

Aypaꞌ kaꞌilangan pasbung kamu it Amaꞌ mi nga duꞌun it langit, nga kagayen it buwat ya, egay kakurangan.”

Lucas 1:6

Baw talagang duwa sira ngayti magꞌasawa, mataldeng i pangaꞌgenan nira kat panleteg it Ampuꞌang Diyus. Pagsunudun nirat magayen i mga urdin baw kaꞌirgan ya.

Mga Binwat 23:1

Tiyermek ni Pablo it semyek i mga kaꞌuyutan ngaytit Sanedrin, bawnga miyampang. “Mga kabilug ku,” maat ya, “kat muꞌsang kaꞌgenan ku, garik tagnaꞌ seked it kayti, iyan lamang i pagbuwaten ku, in unuy pagpipikiren ku nga magayen kat panleteg it Ampuꞌang Diyus.”

Mga Binwat 24:16

Sabap it itung mga bagay nga pagpamayaꞌnen ku, pagpaꞌresan ku nga egay mabwat kung kamaliꞌ kat panleteg it Ampuꞌang Diyus u masigkataw ku.

Efeso 3:20

Aypaꞌ, kaꞌilangan, talagang bantugun tami i Ampuꞌang Diyus ngaytu, kanya nga magkabwat it bastanting-bastanti baw subrang-subraꞌ kat muꞌsa nga pagꞌangutun ta duꞌut kanya, u kat maski pagpikiren ta, sigun kat guna ya ngaytu nga paglabayen ta kat pangaꞌgenan tami.

Deuteronomio 10:17

Sabap AMPUꞌANG DIYUS mi, kanya lamang i piyakamataꞌas kat muꞌsang pagtaꞌwagan it taw. Kanya i Ampuꞌan it muꞌsang mga agalen. Kanya i Ampuꞌang Diyus nga piyakamataꞌas, landaw nga gunaan baw subrang mabantug. Talagang surubung i leteg yat taw, egay pagbidaꞌen ya, baw ega magkabgayan it pabur.

Deuteronomio 18:13

Temed kamu, kaꞌilangan masunud kamu it AMPUꞌANG DIYUS mi, nga sana egay magkaꞌiway ya nga maski unu.”

Filipos 4:13

Iyan muꞌsa ngaytu, magkabwat ku sabap it keseg nga ipagꞌildaw ni Cristo it aken.

Hebreo 12:28

Ta, kaꞌadiꞌan ya ngaytu, iyan i egay kaꞌawaꞌan. Aypaꞌ, paribasay may kaꞌuyutan tay aten it kaꞌadiꞌan ngaytu, kaꞌilangan seklen tat maꞌingget i ildaw ngaytut Ampuꞌang Diyus it aten, isaꞌun kasirbi tat kanya it pagsirbi nga magkasagyaan ya, pagsirbi nga may iꞌlam nga paggalang it kanya.

Hebreo 7:25

Aypaꞌ, sabap it muꞌsa ngaytu, kayang-kaya ya nga iribri it kaꞌustuꞌang karibriyan i muꞌsa nga, kat keseg it pamayaꞌ nirat binwat ya, magpasakep duꞌut Ampuꞌang Diyus. Magkapanindegan ya sirang pirmi ka egen kanya it egay kaskedan.