Genesis 1:1 - Tagbanwa

¹ Puꞌun-puꞌun it langit baw banwa, giyuna it Ampuꞌang Diyus.

Genesis 1:1 Iomraidhean Croise

Exodo 20:11

Sabap seledat enem nga aldaw, kiyumplitu ku i mga kugunaen ku nga langit, banwa, dagat baw muꞌsang betang nira. Pagꞌabut it ikapitu ngaytu nga aldaw, ega nay binwat ku ka nakumplitu nay muꞌsa. Aypaꞌ ka ipiyablag ku na i itung aldaw, ka ipagpabetang ku nga ega basta-bastang aldaw.

Exodo 31:18

Pagkatupus it AMPUꞌANG DIYUS it muꞌsang kuꞌaaten ya it ki Moises duꞌut Bukid ngayti it Sinai, ibinggay ya nay duwa ngayting dapiꞌpis nga batu nga pagsusuratan it mga urdin, nga kanya mismu i nagsurat.

Isaias 40:21

Unu, ega magkaꞌrutan mi? Unu, garing paꞌ it kapuꞌun-puꞌunan egay nagbaritaꞌ it imyu it ega basta-bastang kabantug it Ampuꞌang Diyus? Unu, kagayen it banwa ngaytu nga giyuna ya, ega paꞌ magpatantu it imyu it kabantug ya?

Isaias 40:26

Timingaraꞌ kamu duꞌun it kalayawan it langit. Siyu i nagguna it kadakel it mga bituꞌun? Siyu baꞌ i tumaꞌwag it kanira nga manresa it delem-delem kat kanya-kanyang timpu? Kat keseg it guna ya pagtaꞌwagen yay kada esat kanira kat kanya-kanyang pangaran. Egay maski sangbat nga daꞌga remsa nga simingkar.

Isaias 40:28

Unu baꞌ, ega makaꞌrutan mi? Unu, ega nabaritaꞌan mi nga AMPUꞌANG DIYUS ngaytu nga egay pinꞌunan baw egay kaskedan, kanya nga nagguna it muꞌsang banwa, talagang ega kanya magkalpuꞌan, baw ega pagtaluun? Baw egay maski siyu nga kataꞌseb it pikir ya.

Isaias 65:17

Maat it Ampuꞌang Diyus, “Gumuna akuytu it baꞌgung langit baw baꞌgung banwa. Iyan mga bagay kat tagnaꞌ nga mga timpu, talagang ega na mademdeman it taw. Ega na talaga mangbit kat nakem nira.”

Mateo 11:25

Kat iti nga timpu, nanalangin si Jesus nga maat ya, “Pagpasalamatan ku ikaw, Amaꞌ, ikaw nga Ampuꞌan it langit baw banwa, sabap itiyagu-taguꞌ muy itu nga mga kamatuudan isaꞌun ega matantuwan it mga magpataꞌas-taꞌas it sadiling kiyaꞌrutan baw pasepsep. Iyan i piyaꞌyagan mu, mga raꞌyat lamang nga may palulus.

Marcos 13:19

Sabap kat timpu ngayan nga iyanꞌen, dakulaꞌ talaga nga kakuriꞌan i malabayan it katataawan. Eeꞌ baꞌ, mabut i timpu nga lumabay talagay mga taw it ega basta-basta nga kakuriꞌan, nga ega paꞌ nalabayan garing it giyuna it Ampuꞌang Diyus i banwa seked kayti ngaytu, baw ega na gasiꞌ tu malabayan paꞌ it seked it kaꞌnu-kaꞌnu.

Mga Binwat 14:15

“Kadakel mi, beteꞌ, ega buwaten mi tu. Ka kami, kasubung mi nagang taw. Ipagpaꞌrut namen ngaytut imyu nga kaꞌilangan indiꞌan mi nay mga pamagsambaen mi ngayan nga egay kamatuudan, ka ega yay mapulus. Kaꞌilangan nga pasakep kamu nat Ampuꞌang Diyus nga talagang egen, kanya nga gimnuna it langit baw lugtaꞌ baw dagat, pati muꞌsang paryaman nira.

Mga Binwat 17:24

Kanya ngaytu nga Ampuꞌang Diyus i gimnuna it langit baw banwa, baw muꞌsang paryaman nira. Baw paribasay kanya i Ampuꞌan nga magbebegbeg it langit baw banwa, ega magtaꞌid kanya duꞌun it papagsambaan nga binwat lamang it taw.

Mga Binwat 4:24

Pagkagneg it mga kaꞌibaan nira ngayti, puꞌsa sirang nanalangin duꞌun it Ampuꞌang Diyus, nga magꞌaat, “Agalen namen, egay beken nga gimnuna it langit, lugtaꞌ, dagat baw muꞌsang paryaman nira in daꞌga ikaw lamang.

Roma 11:36

Sabap muꞌsa ngaytu nga betang it banwa, kanya lamang i garing. Kanya i nagguna, kanya i magbebegbeg, baw egay beken nga uliꞌan it muꞌsa ngaytung giyuna ya in daꞌga purus kat ikabantug ya. Aypaꞌ bantugun kanya it egay katupusan seked it kaꞌnu-kaꞌnu. Kamatuudan talagaytu.

1 Corinto 8:6

temed in aten, esa-esa lamang talagay kamatuudan nga Ampuꞌang Diyus nga Amaꞌ tami. Kanyay garing it muꞌsa baw magpangaꞌgenan tami kat ikabantug ya baw kat ikasirbi it kanya. Esa-esa lamang gasiꞌ i Ampuꞌan nga si Jesu-Cristo, kanya nga nagguna it muꞌsang bagay, baw kanya nga puꞌun it baꞌgung kaꞌgenan tami.

Efeso 3:9

Baw ipiyakarguꞌ ya gasit aken i buwat nga ipaꞌyag ku kat muꞌsang taw in magꞌuꞌunu matuman ya i pabetang-betang ya nga garing pat ega pay banwa ipagtagu-taguꞌ ya, kanya nga nagguna it muꞌsa.

Hebreo 1:10

Maat pay beken nga inaat it Ampuꞌang Diyus kat Anak ya, “Puꞌun-puꞌun it banwa ikaw, Ampuꞌan, i giyaringan. Atnaga i kalayawan it langit, ikaw talaga i nagguna.

Hebreo 1:2

Temed kayti, kat aten na ngaytu nga timpu, mismu Anak ya na i magtataban it ampang ya nga miyabut situt aten. Anak ya ngaytu i ipiyatindeg ya nga tumagpuꞌun it muꞌsang bagay baw egay beken nga piyaguna yat muꞌsang mga paryaman nga magkaltegan ta in daꞌga Anak ya naga ngaytu.

Hebreo 11:3

Ka pamayaꞌ tami it inaat it Ampuꞌang Diyus i ikiyasepsep ta nga, banwa ngaytu baw muꞌsang mga paryaman, giyuna ya kat keseg it ampang ya lamang. Magsugid tu nga mga bagay nga magkaltegan, egaytu gimnaring kat mga bagay nga magkaltegan naga, in daꞌga giyuna lamang.

Hebreo 3:4

Urut tami nga muꞌsa nga basta may balay, simpri may nagbuwat it balay ngayti. Temed may tagbuwat it muꞌsa, Ampuꞌang Diyus.

2 Pedro 3:5

Temed iyan pagꞌaaten nira nga egay piyagbelagan, talagang egay matuud ya kayan. Ka paglipaten nira lamang i panriga nga tiyunaw i banwa. Ka daꞌga baꞌ, iyan langit baw banwa, giyuna kat keseg it ampang it Ampuꞌang Diyus? Giyuna yang danum i giyamit ya kat pagguna ya it banwa, baw sabap it danum magpaneꞌteꞌ i muꞌsa ngaytu nga giyuna.

1 Juan 1:1

Pagsuratan ku kamu pasar it ki Jesu-Cristo, kanya nga pagpangaranat Ampang nga magbegay it kaꞌgenan nga egay kaskedan. May kanya naytung lagi it tagnaꞌ paꞌ, iyan ega pay banwa. Baw kami nga mga alagad ya, talagang nagnegan namen i mga ampang ya, baw talagang naltegan namen kanya. Naꞌeket-eket namen baw naꞌipuꞌ it alima namen.

Mga Ipiyalteg 10:6

Ka simnumpa kanya kat ngaran it Ampuꞌang Diyus nga egen it egay kaskedan, kanya nga gimnuna it langit baw banwa baw dagat, baw muꞌsang betang nira. Maat i nagnegan ku nga isiyumpa ya, “Ega nay elaten. Tumanen nay muꞌsa.

Mga Ipiyalteg 14:7

Miyampang kanyat dadakulaꞌ nga magꞌaat, “Galangen baw iꞌlaman mi i Ampuꞌang Diyus, baw bantugun mi i ega basta-bastang keseg it guna ya. Sabap naꞌbut nay timpu nga ukumanan ya nay muꞌsang mga taw. Kaꞌilangan nga sambaen mi i Ampuꞌang Diyus ngaytu nga nagguna it langit baw banwa, dagat baw muꞌsang mga pagtumbudan it danum.”

Mga Ipiyalteg 21:6

Baw maat pay beken nga inaat yat aken, “Kayti natuman naytung muꞌsa. Ka akuy uꞌna it muꞌsa baw aku naga i kat sinauryan. Aku i gimnuna it muꞌsa baw kat pudir ku i kaꞌbusan ya. In siyu nga pagbaꞌnekan, siguradu nga begayan ku kanyat danum nga egay bayad nga garing duꞌun it tumbud nga magbegay it kaꞌgenan.

Mga Ipiyalteg 22:13

Sabap aku ngaytu i uꞌna it muꞌsa baw aku naga i kat sinauryan. Aku i gimnuna it muꞌsa baw kat pudir ku i kaꞌbusan nira.

Mga Ipiyalteg 3:14

“Ituy ibtang mu duꞌun it surat nga ipataban mu duꞌut manigpamaalaꞌ it mga magpamayaꞌ it aken duꞌun it Laodicea. Aaten mu nga, ‘Ituy ipagkusugid it iyan kanya nga magngangaran it Kamatuudan, kanya nga talagang egay pagbaꞌgu ka purus kamatuudan i ipagsugid ya, kanya naga nga manigpamegbeg it muꞌsang giyuna it Ampuꞌang Diyus.

Mga Ipiyalteg 4:11

“Ampuꞌang Diyus namen, bagay talaga it imu nga bantugun ka, galangen baw kilalaen nga gunaan. Sabap ikaw i nagguna it muꞌsang bagay, baw ta uyun kat kaꞌirgan mu giyuna mu sira, baw piyatinir mu.”