Exodo 9:23 - Tagbanwa

²³ Aypaꞌ ipiyatindeg na ni Moises i alima ya nga magseskel it sungkud ya. Duldug i tubag it AMPUꞌANG DIYUS baw kilat nga magpanaytay nat lugtaꞌ. Bawnga inuranan nay banwa nga Egipto nga yanayti i magtedag, yilu ngayti nga subuk kadsen it batu.

Exodo 9:23 Iomraidhean Croise

Genesis 19:24

Bawnga iyan duꞌun na na Lot it iting lansangan, subuk inuranan nay Sodoma baw Gomorra, temed yay magtedag, magdedleg nga asupri nga garing duꞌut langit ka ipiyatdag it AMPUꞌANG DIYUS.

Exodo 19:16

Pagꞌikatlung eyag, magpanduldug nay duꞌut bukid ngayti baw magꞌaluꞌalug sabaten nay kilat. Bukid ngayti, pagbubuꞌtungan na it maꞌpal na nga kunum. Ega naꞌlay nagnegan niray tingeg it taburi nga piyadayuyung it diyadakulaꞌ. Muꞌsat mga taw ngayti, namagyegyeg nat iꞌlam.

Exodo 20:18

Namagyegyeg it iꞌlam i mga Israelita ngayti, pagkagneg nira it pamsar it duldug ngayti baw tingeg ngaytit taburi, baw pagkalteg it kilat, pati tabuk ngayti duꞌun it bukid. Timnitindeg na lamang sira duꞌut pagtitindegan nira ngayti nga duꞌut ala-alaid.

Exodo 9:18

Aypaꞌ dedelem nga kadedelman, paꞌuranan kuy situt Egipto, nga iyan i temdag, yilu nga subuk kadsen it batu. Talagang garing paꞌ it katagnaꞌ-tagnaꞌan, ega pay namasaan situt Egipto nga atkaytung kasesleg.

Exodo 9:24

Talagang masleg i tedag it yilu, baw kilat ngayti, ega na magdelem. Yay matuud, garing paꞌ it puꞌun-puꞌun it bangsa nga Egipto, ega pay miyabut duꞌun nga atnakayting panele-seleg it yilu, yapayti.

Josue 10:11

Mintras magpalagyu i pagtataraꞌusigen ngayti it mga Israelita, piyaꞌuranan sira it AMPUꞌANG DIYUS it dadakulang bilugun it yilu. Dakel nga banar i miyatay. Dakel pat natay it basiꞌ it mga Israelita i natay it magtedag ngayti nga yilu nga subuk desen it batu.

Mga Ipiyalteg 16:18

Bawnga sakaling nangilat baw nanduldug nat dadakulaꞌ nang pamsar baw yimnegyeg nay lugtaꞌ it yanay keseg. Itu na talagay piyakamakseg nga yegyeg it lugtaꞌ nga ega na namasaan it katataawan it yanaytuy kaꞌlay. Piyakamakseg na talaga.

Mga Ipiyalteg 16:21

Bawnga miyuran it talagang dadakulaꞌ na, nga piꞌsang it yilu i magtedag nga mamagtimbang nat agen-agen it limang puluꞌ nga kilu i sang piꞌsang. Unupat pagsariyan nat tedag i mga taw. Aypaꞌ diniyampaꞌ niray Ampuꞌang Diyus sabap it iti ngayti, ka ereꞌeret talaga nga kakuriꞌan.

Mga Ipiyalteg 8:7

Pagꞌeyep it uꞌnang anghil it kanya ngayting taburi, miyuran, takaꞌ magtedag, yilu nga subuk deset batu baw apuy nga may uyut nga duguꞌ. Naꞌanteng i ikatlung bagiꞌ it banwa baw ikatlung bagiꞌ it talun baw muꞌsang dikut.