Exodo 6:7 - Tagbanwa

⁷ Epe-epetan ku kamu nga mga Israelita, ka taawan ku na kamu. Aku na i Ampuꞌang Diyus mit imyu. Talagang makilalaan mi nga aku i AMPUꞌANG DIYUS, nga nagribri it imyu kat pakuriꞌ it mga taga Egipto.

Exodo 6:7 Iomraidhean Croise

Genesis 26:3

Baw mintras duꞌun ka, ildawan baw tarimaen ku ikaw. Sabap itung mga banwa ngaytu, ibgay ku it imu, nga subliyen it anak-inapuꞌ mu. Talagang tumanen ku i isiyanggup ku it amaꞌ mu nga si Abraham.

Genesis 28:13

Duꞌun it ulun-ulunan it agdan ngayti, duꞌun magtitindeg i AMPUꞌANG DIYUS. Miyampang kanya nga magꞌaat, “Aku i AMPUꞌANG DIYUS it apuꞌ mu nga si Abraham baw amaꞌ mu nga si Isaac. Kayti, rugar ngaytung naꞌigaꞌan mu, ibgay kuytu it imu baw mga anak-inapuꞌ mu.

Nehemias 1:10

Ka mga kabilug ku ngayti nga mga manigsirbi mu, mga taawan mu sira nga, kat keseg it ega basta-bastang guna mu, ipiyagꞌuliꞌ mu duꞌun it dati nga rugar nira.

Exodo 15:2

Gunaan i AMPUꞌANG DIYUS nga pagkantaꞌan ku. Kanya naga i nagribri it aken kat mga kalaban ku. Kanya naga i Ampuꞌang Diyus ku. Talagang bantugun ku kanya. Kanyay Ampuꞌang Diyus it giyaringan ku. Talagang bantugun ku i guna ya.”

Exodo 16:12

“Nagnegan ku i pakusalaꞌ it mga Israelita. Aaten mu sira nga, mabway nga apu-apun na, begayan ku sira it pagsedaꞌ. Meyag, pangaꞌen siꞌ i ibgay ku it kanira. Pagustuꞌ sira it kaꞌen. Sikayan maꞌrutan nira nga aku i AMPUꞌANG DIYUS nira.”

Exodo 16:6

Pagkatupus it pakisugi-sugid ngayti it AMPUꞌANG DIYUS, ipiyagꞌaat siꞌ na Moises, duwa ni Aaron, it mga Israelita ngayti. Maat nira, “Kayti nga apun matantuwan mi nga AMPUꞌANG DIYUS i nagpaliꞌwan it imyu duꞌut Egipto.

Exodo 2:11

Iyan ustuꞌ na nga lalaki si Moises, may esang aldaw nga namasyar kanya duꞌun it mga kabilug ya nga mga Hebreo. Naltegan ya i kakuriꞌan nga pagsagkaꞌen it mga kabilug ya ngayti kat mga mabebeꞌgat nga buwaten nira. May naltegan ya gasiꞌ nga esang Hebreo nga pagbalbagen it esang taga Egipto.

Exodo 6:6

Aypaꞌ, ituy iꞌaat mu it mga Israelita. Aaten mu nga maat ku, ‘AMPUꞌANG DIYUS aku nga matuud. Talagang iribri ku kamu kat pakuriꞌ it mga taga Egipto. Ipatanud ku it mga taga Egipto ngaytu i beꞌgat it alima ku. Rigaen ku talaga sira. Temed iyan kamu, ipaliꞌwan ku na kamu kat panguripen nira it imyu.

Exodo 7:17

Aypaꞌ itu siꞌ i tugun it AMPUꞌANG DIYUS. May buwaten ya na isaꞌun makilalaan mu in siyuy AMPUꞌANG DIYUS ngaytu nga paꞌaaten. Pakpaken ku nay danum it Nilo it pagseskelen ku ngaytu nga sungkud ku. Bawnga danum ngaytu, magbalyung duguꞌ.

Jeremias 31:33

Itu siꞌ i ipakiꞌupakat ku it bangsa nga Israel kat pagdadarapaꞌen. Mga urdin ku, idawaꞌ ku na kat ulu nira baw ipatdek ku nang banar kat nakem nira. Simirbi sirang matuud it aken nga Ampuꞌang Diyus nira, baw arigraen ku sirang banar nga mga taawan ku.

Mateo 22:32

‘Aku i Ampuꞌang Diyus ni Abraham, ni Isaac baw ni Jacob.’ Simpri ega Ampuꞌang Diyus kanya it taw nga patay, in daꞌga egen. Sikayan maꞌyag nga egen siꞌ na Abraham ngayti, maski miyatay na sira.”

Roma 8:31

Ta it atkaytu na nga kampiꞌ na situt aten i Ampuꞌang Diyus, maꞌyag nga maꞌyag nga maski siyu i kakuntraꞌ ta, ega talaga daꞌgen nira kita.

Hebreo 11:16

Temed ega, in daꞌga subraꞌ pang magayen nga banwa i pagpaꞌbutun nira, nga egay beken, langit tuy paꞌaaten ngaytu. Aypaꞌ talagang ega ipagꞌeyaꞌ it Ampuꞌang Diyus nga mataꞌwag kanya nga kanirang Ampuꞌan, sabap talagang inargan ya sira it pirmaminting banwa nga mataꞌidan nira.

1 Pedro 2:10

Yay matuud, tagnaꞌ ngayti ega paꞌ taawan kamu it Ampuꞌang Diyus. Temed kayti, mga taawan ya na kamu. Katꞌesa subuk daꞌkamuy imyu pagꞌildawan yat karibriyan, temed kayti naꞌimyu nay ildaw ya ngaytu.

Mga Ipiyalteg 21:3

Baw siꞌ nga may nagnegan ku nga panggaꞌmarang dadakulaꞌ nga duꞌun it araꞌdungan ngaytit adiꞌ i sinraꞌan, nga magꞌaat, “Kayti iyan pamalay-balay it Ampuꞌang Diyus, asan nat mga taw. Pakisagpun na kanyat kanira ka mga taawan ya na sira. Baw talagang kanya ngaytu i Ampuꞌang Diyus nira, nga maꞌiba-iba nira nang pirmi.

Mga Ipiyalteg 21:7

Siguradung tumbasan ku i iyan nga nakaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, ka aku nay Ampuꞌang Diyus ya baw kanya nayan i anak ku.