Exodo 18:11 - Tagbanwa

¹¹ Natantuwan ku kayti nga AMPUꞌANG DIYUS talaga i mabantug, subraꞌ paꞌ it maski unu nga beken nga pagkilalaen nga diyus. Ka lamang ereꞌeret i pataꞌas-taꞌas it mga taga Egipto ngayti nga simnarit pakuriꞌ it mga Israelita, temed diyaꞌeg sira nga banar it AMPUꞌANG DIYUS.”

Exodo 18:11 Iomraidhean Croise

1 Mga Adiꞌ 17:24

Yamanay nakatubag it babay ngayti, maat ya, “Kayti ku natantuwan nga talagang manigsirbi kang matuud it Ampuꞌang Diyus. Purus talaga kamatuudan i ipagsugid mu nga ampang it AMPUꞌANG DIYUS.”

2 Mga Adiꞌ 5:15

Egay beken nagpaꞌuliꞌ na Naaman duꞌut ki Eliseo ngayting prupitaꞌ it Ampuꞌang Diyus. Pagꞌabut nira, maat ya, “Kayti natantuwan ku nga talagang egay beken nga Diyus situt sinirungat langit in daꞌga itu lamang nga Ampuꞌang Diyus it Israel. Aypaꞌ kayti waytu i begay kut imu nga seked it nakaya-kayaan ku.”

Nehemias 9:29

Saꞌup-saꞌup gasiꞌ nga ipiyagsasar mu it kanira nga paꞌuliꞌan nira siꞌ nga sunudun i mga urdin mu. Temed kat kapiyasubraꞌ nira subraꞌ sira nga nagpasngel nga nagbuwat it kasalaꞌan nga kuntraꞌ it mga urdin mu ngaytu. Lamang makanira i kamatuudan nga kaꞌgenan in sunudun nira it kaꞌustuꞌan i mga urdin mu, temed lamwat sira ga nga piyadsen i ulu nira baw talagang daꞌsira nagpagneg.

Exodo 1:10

Kaꞌilangan ipaꞌabwatay tami i pikiran ta isaꞌun mapeꞌtek tami i pandakel nira ngaytu. Ka in beteꞌ mabut nga rumpakan tami it mga kalaban ta, barang kumampiꞌ i mga Israelita ngaytu it mga manrumpak ngayan. Daꞌga sikayan makalꞌid na sira situt Egipto ngaytu?”

Exodo 1:16

“Kamu nga mga panday, basta mamanday kamu duꞌun it mga Hebreo, basta sumakit, lalaki, puꞌtun mi isaꞌun matay. Temed in babay, pataꞌnan mi lamang nga maꞌgen.”

Exodo 1:22

Ta it atkayti, ipiyagꞌurdin na it adiꞌ it muꞌsang mga sinakepan ya, nga magꞌaat, “Iyan kada lalaki nga ipanganak it mga Hebreo, ibuntal mi duꞌun it danum it Nilo. Takaꞌ in babay, pataꞌnan mi lamang nga egen sira.”

Exodo 10:3

Aypaꞌ naꞌaduꞌun siꞌ na Moises, duwa ni Aaron, it adiꞌ ngayti. Maat i inaat nira, “Pagnegan mu i ampang it AMPUꞌANG DIYUS namen nga mga Hebreo, nga magꞌaat, ‘Sang unu pay kaꞌlay bawnga pababaꞌ ka it aken? Kaꞌilangan ipalugut mu na nga mapanaw nay mga taawan ku ka sumamba sira it aken.

Exodo 12:12

Kat iti naga nga delem, lekpen ku na i banwa nga Egipto. Imatayen ku nay kada panganay nira, taw, ramu-ramu, baw betanganan ku na it ukuman i muꞌsang mga pagbete-beteꞌen nga diyus duꞌun it Egipto. Aku ngaytu i AMPUꞌANG DIYUS.

Exodo 14:8

Piyaꞌuliꞌnan siꞌ it AMPUꞌANG DIYUS i pagmategas it adiꞌ ngayti. Egay beken, inusig ya nagay mga Israelita ngayti nga duꞌun nat pagpanawan nira, nga mamagsasagyay magpanaw.

Exodo 5:2

Temed maat i tubag it adiꞌ ngayti, “Ay siyuy AMPUꞌANG DIYUS? Siyu kanya nga magꞌurdin-urdin it aken nga ipalugut ku nga mapanaw i mga Israelita? Egay kilala ku nga paꞌaaten ngayan nga AMPUꞌANG DIYUS. Talagang ega, ega maat ipasugu-sugut ku nga mapanaw i mga Israelita ngaytu!”

Exodo 5:7

“Iyan mga manigbuwat ngayan, ega na gastuꞌan mi it kuꞌut nga ipagtimplaꞌ nirat pagpadsenen nira ngayan nga lugtaꞌ nga ipagbuwat-buwat it balay. Pabayaꞌan mi sira nga sira nay mamisiꞌ it gamiten nira.

Daniel 4:37

Aypaꞌ ka aku nga si Nabucodonosor, magbantug baw magbegay it galang baw magpamatuud it kataꞌasan it Adiꞌ nga duꞌun it langit. Sabap muꞌsa nga buwat ya, purus tamaꞌ baw mataldeng. Baw talagang magkabwat ya nga ipagpababaꞌ i mga mapiyataꞌas-taꞌas.”

Lucas 1:51

Kat mga pagbuwaten ya, ipagpatantu yay ega masbungan nga guna ya. Ka tiyariwanak ya na i mga taw nga subraꞌan kat nakem nira.

Santiago 4:6

Temed subraꞌ paꞌ kaytu i ildaw nga ipagbegay it Ampuꞌang Diyus. Aypaꞌ ka magsusurat kat kasuratan nga magꞌaat, “Talagang pagkuntraꞌen it Ampuꞌang Diyus i mga mapiyataꞌas-taꞌas, temed dakulay ildaw nga ipagbegay ya kat mga mapiyababaꞌ.”

1 Pedro 5:5

Ta kamu gasiꞌ nga mga kamangaꞌwaꞌan, pasakep kamut magayen it padisir it mga magugurang nga magpamaalaꞌ it imyu. Baw kaꞌilangan nga mapiyababaꞌ kamu nga muꞌsa, nga magsigsirbi it esa may esa. Sabap inaat ngayan duꞌun it kasuratan, “Talagang pagkuntraꞌen it Ampuꞌang Diyus i mga mapiyataꞌas-taꞌas, temed dakulay ildaw nga ipagbegay ya kat mga mapiyababaꞌ.”