Esdras 4:3 - Tagbanwa

³ Temed katubag it kanira si Zorobabel, si Jesua, baw mga ginuꞌu ngayti it mga kuyunan, “Ayaw kamut pasilabet it amen ngaytu nga magpatindeg it balay it Ampuꞌang Diyus namen. Kaya namen tu nga buwaten i Templo ngaytu it AMPUꞌANG DIYUS it bangsa namen nga Israel. Kami ngaytuy piyakarguꞌan it buwaten ngaytu, uyun kat urdin it amen it adiꞌ it Persia nga si Ciro.”

Esdras 4:3 Iomraidhean Croise

Esdras 1:1

Iyan uꞌnang taꞌun it pagꞌadiꞌ duꞌun it Babilonia ni Ciro nga adiꞌ it Persia, piyanakman kanya it AMPUꞌANG DIYUS it ipapanaw ya nga urdin kat muꞌsang sinakepan ya. Nagꞌabut tu isaꞌun matuman i inampang it AMPUꞌANG DIYUS it tagnaꞌ nga ipiyasugid ya it prupitaꞌ nga si Jeremias. Egay beken, ipiyasurat it adiꞌ ngayti i ipapanaw ya nga urdin ya nga magꞌaat,

Esdras 1:2

“Ituy ipagsugid ni Ciro nga adiꞌ it Persia, Iyan AMPUꞌANG DIYUS nga duꞌun it langit, ipiyagꞌildaw ya it aken nga masakep ku i muꞌsang bangsa situt sinirungat langit. Baw ipiyagꞌaat yat aken nga kaꞌilangan nga pabwat aku it balay nga papagsambaan it kanya duꞌun it Jerusalem nga duꞌun it Juda.

Esdras 1:3

Aypaꞌ ka in siyu-siyu nga mga taawan it Ampuꞌang Diyus ngaytu, sana ildawan ya kamu, ka pagpaꞌintulutan ku na kamu nga muliꞌ na duꞌun it Jerusalem nga sakep it Juda, ka ayusun mi naga i Templo nga papagsambaan mi nga balay it AMPUꞌANG DIYUS ngaytu it bangsa mi nga Israel, kanya nga kamatuudan nga Ampuꞌan.

Esdras 3:8

Iyan ikadwa na nga bulan it ikadwa nira na nga taꞌun it pagkaꞌuliꞌ nira ngayti duꞌun it Jerusalem nga patindeg it baꞌgung Templo, piyapuꞌnan na niray iting buwaten. Piyanguꞌnaan sira ni Zorobabel nga anak ni Sealtiel, baw ni Jesua nga anak ni Josadac. Katabang nira nga minwat, mga sasirduti, mga Levita, baw muꞌsa nga mga kabanwa nira nga miyuliꞌ naga duꞌun it Jerusalem nga nadakepan ngayti. Iyan mga Levita, gimnaring kat idad nga duwang puluꞌ padibwat, iyan i ipiyatindeg nira nga mamaalaꞌ it buwaten ngayti.

Nehemias 2:20

Katubag akut kanira, “Pagsisiguruun ku nga, iyan Ampuꞌang Diyus duꞌut langit nga magbebegbeg it muꞌsa, kanya i tumabang it amen nga mga manigsirbi ya. Aypaꞌ, talagang makapatabus namen i buwaten namen ngaytu. Temed kamu, egay lalabeten mi it maski unu nga kusas situt Jerusalem. Ega gasiꞌ i kariꞌgenan mi situt itung siyudad, baw ega maꞌimyu i maski unu situ nga arandeman it imyu it mga kaꞌanakan mi.”

Isaias 45:4

Ituy ampang kut kanya, ‘Ipatindeg ku ikaw kat ikagayen it mga tungtung-inapuꞌ ni Jacob nga manigsirbi ku, iyan bangsa nga Israel nga piniliꞌ ku. Akuy nagpabetang-betang it in siyu ka nga taw nga binggayan ku ikaw it dakulaꞌ nga kabantugan, maski egay uru-urut mu it aken.’”

Mateo 10:16

Maat paꞌ ni Jesus, “Ta kayti, pagtaꞌgen ku kamu nga subung kamu it mga tupa kat reet-reet it mga bunglun. Aypaꞌ kaꞌilangan maꞌulu kamu nga subung it mga dukul baw magnek nga subung it mga kalapatiꞌ.

Juan 4:9

Kaꞌampang i babay ngayti nga Samaritano, maat ya, “Unuka magꞌangut kat danum nga imnun mu, it Judio ka, aku Samaritano?” (Ka iyan mga Judio, pagliꞌyan niray mga ipagkaꞌen baw ipagꞌinum it mga Samaritano.)

Mga Binwat 8:21

Talagang egay kabagiꞌan mu kat ipagpabwat ngaytut amen baw daꞌka kaꞌuyut kaytu, sabap kat panleteg it Ampuꞌang Diyus, talagang ega mataldeng i kat nakem mu.