1 Juan 4:7 - Tagbanwa

⁷ Mga pagmaꞌalen ku, siguruun ta nga magsigraras tami it esa may esa, sabap Ampuꞌang Diyus, kanyay puꞌun it kararas ngaytu. Ta kada may raras na ngaytu, maꞌyag nga bilang ipiyanganak na kanya it Ampuꞌang Diyus baw kilalang-kilala ya na kanya.

1 Juan 4:7 Iomraidhean Croise

Juan 13:34

Itu nay baꞌgung urdin nga ibgay kut imyu. Kaꞌilangan nga magsigraras kamu it esa may esa. In magꞌuꞌunu i raras kut imyu, atkayan nagang pirmi i raras mit esa may esa.

Juan 17:3

Ituy mapisiꞌan nirat kaꞌgenang egay kaskedan, kamatuudang pagkilala nira it imu nga esa-esang matuud nga Ampuꞌang Diyus baw aku nga si Jesu-Cristo gasiꞌ nga tiyaꞌeg mu.

1 Corinto 8:3

Temed iyan taw nga magraras it masigkataw ya, yay pagkilalaen it Ampuꞌang Diyus nga taw nga may kamatuudan nga kasepsep ngaytu.

2 Corinto 4:6

Kayti naꞌyagan tami na ka iyan Ampuꞌang Diyus, kanya nga nagguna it eyag kat keseg it ampang ya isaꞌun ega bulun nga kadleman, kanya nagay minggay it eyag kat pikiran tami isaꞌun makilalaan tami nga banar i kabantugan ya nga magkatantuwan duꞌun it ki Cristo.

Galacia 4:9

Temed kayti, sabap it pagkilala it Ampuꞌang Diyus it imyu, pagkilalaen mi na kanyang banar. Ta it atkaytu na, unuka magpaꞌuripen kamu siꞌ it iyan dalan nga egay keseg baw egay kuwintaꞌ?

Galacia 5:22

Temed in magpasakep i taw kat pamegbeg it Espiritu Santo itu may itu i liꞌwan ya, kamatuudang raras it masigkataw, magꞌuꞌunay nga kasagyaan baw kaꞌimbengan it nakem, masagkaꞌ it kakuriꞌan it magayen i nakem, maꞌildaw, magayen i adat, magkasarigan nga banar,

2 Timoteo 1:7

Ka iyan Espiritu Santo nga ipiyapasarum it Ampuꞌang Diyus situt bilug ta, simpri ega pagbuwaten ya kita nga talawan, in daꞌga may pagmaꞌiseg it nakem, may raras it masigkataw baw pagsupil it sadili ta.

1 Pedro 1:22

Ta kayti, kat pamayaꞌ mi it kamatuudan ngaytung Magayeng Baritaꞌ, bilang nanlimpiyuꞌ kamu na. Ka naꞌawaꞌ nay kasalaꞌan mi, iyan nagpasakep kamu na it ki Cristo. Aypaꞌ mapakay na nga kamatuudan nay raras mi it esa may esa nga subung it sang sulsugan. Aypaꞌ tingleden mi talagay nakem mi kat kamatuudang raras it esa may esa nga ega desang awam.

1 Juan 2:10

Temed, taw nga may raras ya nat sulsug ya kat pamayaꞌ, iyan i matuud nga magpangaꞌgenan kat kaꞌyagan. Talagang in atkayan, ega nay asat kanya nga ipagkakursud ya kat kasalaꞌan.

1 Juan 2:29

Urut mi na nga talagang mataldeng i Ampuꞌang Diyus. Aypaꞌ sikayan matantuwan mi nga sira nga magbuwat nat mataldeng kat panleteg it Ampuꞌang Diyus ngaytu, sira i ipagpabetang ya nga mga anak ya na.

1 Juan 2:3

Pagsisiguruun ta naytu nga kilala ta nay Ampuꞌang Diyus, basta pagsunudun tat magayen i mga ipiyagꞌurdin ya.

1 Juan 2:4

In may magꞌaat nga, “Kilala ku nayan kanya,” temed ega magsunud it mga urdin ya, ambut ya lamang. Talagang egay uru-urut yat kamatuudan.

1 Juan 2:7

Kamung mga pagmaꞌalen ku, ega nagaytuy baꞌgung urdin nga ipagsurat ku asat imyu, in daꞌga iti naga, dati ngayting ipiyagꞌurdin it imyu it tagnaꞌ paꞌ. Iyan paꞌaaten ku ngaytung dati nga urdin, iyan nga ipiyangadal ngaytung ampang nga nagnegan mi na nga magsigraras tami it esa may esa.

1 Juan 3:9

Ka in siyu-siyuy bilang ipiyanganak nat Ampuꞌang Diyus, ega nayan magpasigi pat muwat it kasalaꞌan. Simpri ega na mamlag kanya it bilang nanganak ngaytut kanya. Ta it Amaꞌ ya nay Ampuꞌang Diyus, ega na mapakay nga pasigi paꞌ kanyat muwat it kasalaꞌan.

1 Juan 4:11

Mga pagmaꞌalen ku, ta it atkaytuy kadakulat raras it Ampuꞌang Diyus it aten, kaꞌilangan magsigraras tami gasiꞌ i aten.

1 Juan 4:12

Garing it tagnaꞌ paꞌ, egay nakalteg it Ampuꞌang Diyus. Temed in talagang may raras ta nat esa may esa, maꞌyag nga magsasarum na talaga situt aten i Ampuꞌang Diyus ngaytu, baw kiyumplitu ya na i raras ta ngaytu.

1 Juan 4:16

Magkaꞌrutan ta na talaga baw pagpamayaꞌnen ta nga kita, pagrarasan nga banar it Ampuꞌang Diyus. Ampuꞌang Diyus talagay puꞌun it kararas. Ta kanya nga magpaneꞌteꞌ kat raras yat masigkataw ya, pagteꞌteꞌan ya gasiꞌ i Ampuꞌang Diyus, baw Ampuꞌang Diyus, magpaneꞌteꞌ naga duꞌun it kanya.

1 Juan 4:20

In beteꞌ may magꞌaat nga, “Pagmaꞌalen ku nay Ampuꞌang Diyus,” temed in may sulsug ya paꞌ kat pamayaꞌ nga pagpakitabugan ya, ambut ya lamang i pagmaꞌal ya ngayan. Ka in ega pay raras yat kaꞌibaan ya nga lelete-letegan ya nat kaꞌlay, magꞌuꞌunu maꞌalen yay Ampuꞌang Diyus nga ega magkaltegan ya?

1 Juan 4:8

Temed iyan ega pay raras ngaytu, ega payan magkilala it Ampuꞌang Diyus, sabap Ampuꞌang Diyus talagay puꞌun it raras ngaytu.

1 Juan 5:1

In siyu-siyuy magpamayaꞌ nga si Jesus, kanya nay paꞌaateng Cristo ngayti nga Manriribring Adiꞌ nga isiyanggup, subung na kanyat ipiyanganak it Ampuꞌang Diyus. Baw yay matuud, in pagmaꞌalen ta kanya ngaytu nga bilang nanganak, simpri rarasan ta na i kumpur bilang ipiyanganak ya nga beken.

2 Juan 1:5

Ta kayti, Bilaꞌ, sana may ipagpakiꞌupakat kut imu. Itu, ega maat baꞌgung urdin i ipagsurat ku ngaytu, in daꞌga dati nagaytung urdin nga situ na nga lagit aten garing paꞌ it tagnaꞌ, itu nga magsigraras tami it esa may esa.