1 Juan 4:4 - Tagbanwa

⁴ Kamu, mga bilang anak ku, mga anak kamu na it Ampuꞌang Diyus. Baw nakaꞌindaꞌeg kamu nat mga maꞌambut ngayang magpapru-prupitaꞌ. Naꞌindaꞌeg mi na sabap subraꞌ pang gunaan i Espiritu Santo nga magsasarum asat bilug mi, subraꞌ pat maraꞌe-raꞌet ngayting si Satanas nga magpanakem it mga taw nga ega nagpasakep it Ampuꞌang Diyus.

1 Juan 4:4 Iomraidhean Croise

Juan 12:31

Ka naꞌbut nay timpu, kayti na ngaytu, nga betanganan nat ukuman i kumpur kakuntraꞌ ku. Daꞌgen na si Satanas nga magsasakep na situt sinirungat langit.

Juan 14:30

Ega abwatayen ku nga pakisugi-sugid it imyu, ka magꞌaꞌabut na si Satanas nga magsasakep na situt sinirungat langit. Temed yay matuud, egay pudir yat aken.

Juan 16:11

Pasar it pangukuman sabap it kasalaꞌan, itanyag ya nga inukumanan na si Satanas ngaytu nga magsasakep situt sinirungat langit.

Juan 17:23

nga aku baw sira, ega nay beblagan sabap it pasarum duꞌut kanira nga Espiritu Santo, ka ikaw baw aku, sang kagina-ginawaan ta lamang. Sana buwaten mu sira nga magꞌuyun-uyunun nga banar, ka sikaytu makilalaan it mga katataawan ngayni nga ikaw i nagtaꞌeg it aken, baw sira pagmaꞌalen mu, subung gasiꞌ it pagmaꞌal mut aken.

Roma 8:31

Ta it atkaytu na nga kampiꞌ na situt aten i Ampuꞌang Diyus, maꞌyag nga maꞌyag nga maski siyu i kakuntraꞌ ta, ega talaga daꞌgen nira kita.

Roma 8:37

Temed, kat muꞌsa ngaytung mga kakuriꞌan nga magkalabayan tami, kabilangan ta, landaw talaga it piyakamagayen nga mandadaꞌeg, sabap it subraꞌ nga pagsisiguruun tami i ega basta-basta ngaytung raras ni Cristo it aten.

1 Corinto 2:12

Kita nga magpamayaꞌ, egaytu binggayan tami it pasepsep nga subung lamang it pasepsep it mga taw situt banwa nga ega magpamayaꞌ. Kamatuudan talaga i aten nga kasepsep kayti ka Espiritu Santo i ipiyapasarum it Ampuꞌang Diyus situt bilug ta, isaꞌun matantuwan tami nga banar i mga bagay nga ipiyagꞌatag ya it aten.

1 Corinto 6:13

Maat siꞌ it beken, “Iyan pangaꞌen, talagang ipagbetang lamang kat tinaꞌi, baw egay beken nga pagꞌargan it tinaꞌi in daꞌga pagbetangan it pangaꞌen. Aypaꞌ in paggetmanan, simpri kumaꞌen. Tutal, mabut i aldaw nga awaꞌen it Ampuꞌang Diyus i pangaꞌen, pati tinaꞌi ta ka ega nay pagꞌargan. Atkayan naga i bilug ta. Unuka ega sumbayaꞌen tami i kaꞌirgan ya nga manguꞌi-kuꞌit it maski siyu nga magꞌireg gasiꞌ? Tutal, mabut i aldaw nga maꞌawaꞌ gasiꞌ i bilug ta, pati mga kaꞌirgan ya ngaytu.” Temed ega talaga magayen yan. Sabap ega yay pagꞌargan it bilug ta, pamakun duꞌun it ega asawa ta. In daꞌga iyan i pagꞌargan, ikabantug it Ampuꞌan. Baw Ampuꞌan ngaytu i kat ikagayen it bilug ta.

2 Corinto 4:4

Itung mga taw, daꞌsira magpamayaꞌ sabap, mga pikir nira, piyadlem ni Satanas, kanya nga magpaDiyu-Diyus situt sinirungat langit ngaytu. Pagpadlemen yay pikir nira isaꞌun ega masepsepan nira i kaꞌyagan it Magayen ngaytung Baritaꞌ sabap it kabantugan ni Cristo, kanya nga ladawan it Ampuꞌang Diyus.

2 Corinto 6:16

Unuytu, egay piyagbelagan it papagsambaang balay it Ampuꞌang Diyus baw papagsambaang balay it pagbete-beteꞌen nga diyus? Talagang dakulay piyagbelagan ya. Ka kita ngaytu i bilang balay it Ampuꞌang Diyus nga talagang egen it egay kaskedan, ka daꞌga baꞌ kanya naga i nagꞌaat, “Manaꞌidan aku duꞌut kanira baw mangaꞌgenan aku nga maꞌiba-iba nira nga pirmi. Aku na i Ampuꞌang Diyus nga sirbiyan nira, baw sira, buwaten ku na nga taawan ku.”

Efeso 2:2

Egay beken nga pagragaen mi it tagnaꞌ ngayti, karaꞌe-raꞌetan situt banwa ngaytu. Sabap kat iting timpu pagsasakpen kamu paꞌ it pagbayaꞌen it mga maraꞌe-raꞌet, sira nga magpupudir duꞌut lawang, iyan mga magpanlud baw daꞌga nga magbebegbeg it mga taw kayti nga magkuntraꞌ it Ampuꞌang Diyus.

Efeso 3:17

Baw gasiꞌ nga, sabap it pagsarig baw pamayaꞌ mi ngaytu, manakenaꞌ si Cristo asan it nakem mi. Ipagpanalangin ku gasiꞌ nga subuk maggagamut baw magrurugsuk i kararas baw pagmaꞌal mi,

Efeso 6:10

Ta, mga pangiyaꞌpusang sugi-sugid ku, paꞌresan mi kat pangaꞌgenan mi i egay kalandaw nga guna it Ampuꞌan isaꞌun mapaꞌgen nga pirmi i pamayaꞌ mi.

1 Juan 2:1

Kamu nga bilang mga anak ku, ipagsurat kuytuy itung mga bagay asat imyu isaꞌun baꞌ daꞌkamu na magkasalaꞌan. Takaꞌ, sumang kaꞌanu, magkabwat ta naga it kasalaꞌan, temed dedemdemen tami nga may magpanindeg it aten duꞌun it Diyus Amaꞌ. Si Jesu-Cristo, nga kanya talagay mataldeng, kanyay magpanindeg ngaytut aten.

1 Juan 2:13

Pagsuratan ku kamung magugurang sabap kilala mi naga kanya nga, garing it tagnaꞌ paꞌ nga ega pay banwa, may kanya nang lagi. Pagsuratan ku kamung mangaꞌwaꞌen sabap, kat pagsarig mit Ampuꞌan, naꞌindaꞌeg mi na si Satanas nga Gimpuꞌun it Karaꞌe-raꞌetan. Pagsuratan ku kamung mga bilang anak ku sabap kilala mi na talaga i Amaꞌ ta nga Ampuꞌang Diyus.

1 Juan 3:20

Temed in kat nake-nakem ta pagꞌukumanan tay sadili ta, ka urut ta nga ega naga kamatuudan i raras ta, magayen demdemen ta nga subraꞌ pang mataꞌas it aten i Ampuꞌang Diyus baw magkaꞌrutan yay muꞌsa, pati kat nake-nakem ta ngaytu.

1 Juan 3:24

Ta kanya nga masunud it mga urdin it Ampuꞌang Diyus, talagang teꞌteꞌ duꞌun it Ampuꞌang Diyus i pangaꞌgenan ya, baw Ampuꞌang Diyus ngaytu, teꞌteꞌ naga duꞌun it kanya. Baw tabang ngaytut aten it Espiritu Santo nga ipiyapasarum ya situt bilug tami, iyan i ipagkatantu ta nga teꞌteꞌ na situt aten i Ampuꞌang Diyus.

1 Juan 4:13

Baw magkaꞌrutan tami nga magpaneꞌteꞌ ta na duꞌun it Ampuꞌang Diyus, baw kanya, teꞌteꞌ gasiꞌ situt aten, sabap pirmi ta nga pagtabangen it Espiritu Santo nga piyapasarum ya situt bilug tami.

1 Juan 4:16

Magkaꞌrutan ta na talaga baw pagpamayaꞌnen ta nga kita, pagrarasan nga banar it Ampuꞌang Diyus. Ampuꞌang Diyus talagay puꞌun it kararas. Ta kanya nga magpaneꞌteꞌ kat raras yat masigkataw ya, pagteꞌteꞌan ya gasiꞌ i Ampuꞌang Diyus, baw Ampuꞌang Diyus, magpaneꞌteꞌ naga duꞌun it kanya.

1 Juan 4:6

Temed kita, sakep ta nat Ampuꞌang Diyus. Baw in siyuy magkilala it Ampuꞌang Diyus, iyan i magpagneg it aten. Iyan ega sakep it Ampuꞌang Diyus, ega magpagneg kanyat aten. Sikayan ta maꞌrutan i kamatuudang ampang nga garing duꞌun it Espiritu Santo baw kaꞌambutang ampang nga garing duꞌun it ki Satanas.

1 Juan 5:19

Magkaꞌrutan ta nga kita, mga anak nat Ampuꞌang Diyus. Temed si Satanas pay magsasakep situt sinirungat langit.

1 Juan 5:4

Sabap kada bilang ipiyanganak nat Ampuꞌang Diyus, magkaꞌindaꞌeg ya na i pagsakep it kanya it karaꞌe-raꞌetan situt banwa ngaytu. Magkaꞌindaꞌeg ta naytu kat keseg it pamayaꞌ baw pagsarig tat ki Jesu-Cristo.

Mga Ipiyalteg 12:11

Diyaꞌeg si Satanas it mga kasulsugan tami ngayti kat keseg it ipiyaturuꞌ nga duguꞌ it paꞌaaten nga Uꞌuybun It Tupa baw kat pamatuud nirat kamatuudan pasar it kanya ngayting si Jesu-Cristo. Ka ega talaga riyarasan niray ginawa nira, sabap lamang it pamayaꞌ nirat kanya.