1 Juan 3:9 - Tagbanwa

⁹ Ka in siyu-siyuy bilang ipiyanganak nat Ampuꞌang Diyus, ega nayan magpasigi pat muwat it kasalaꞌan. Simpri ega na mamlag kanya it bilang nanganak ngaytut kanya. Ta it Amaꞌ ya nay Ampuꞌang Diyus, ega na mapakay nga pasigi paꞌ kanyat muwat it kasalaꞌan.

1 Juan 3:9 Iomraidhean Croise

Mateo 7:18

Ka ega mapakay nga muwaꞌ it maraꞌe-raꞌet nga buwaꞌ i kayu nga magayen. Baw ega gasiꞌ mapakay nga muwaꞌ it magagayeng buwaꞌ i kayu nga maraꞌe-raꞌet.

Juan 1:13

Ega maat naꞌanak sirat Ampuꞌang Diyus sabap it ipiyanganak ya sira nga subung it panganak it taw u sabap it adat u kaꞌirgan it nagꞌasawa, in daꞌga naꞌanak sira kat kaꞌirgan it Ampuꞌang Diyus.

Juan 3:3

Katubag si Jesus, nga maat ya, “Itu talagay kamatuudan nga isugid kut imu. Egay makaꞌuyut duꞌun it kaꞌadiꞌan it Ampuꞌang Diyus, in daꞌga iyan lamang nga ipiyanganak it sumaꞌup.”

Mga Binwat 4:20

Kami ngaytu, maꞌyag it amen in ari kaꞌilangan nameng buwaten, ka ega mapakay nga ega ipanuturan namen i kumpur naltegan nameng binwat ni Jesus baw muꞌsang ipiyanulduꞌ yat amen.”

Roma 6:2

Talagang ega atkayan. Ka kabilangan ta kayti, atnat miyatay na kat tagnang pangaꞌgenan ta nga makasalaꞌan, baw ipiyagꞌugad na kat baꞌgung pangaꞌgenan. Ta unuka mangaꞌgenan ta paꞌ kat kasalaꞌan ngayti?

Galacia 5:17

Sabap iyan mga singkadan tang kaꞌiꞌirgan nga maraꞌe-raꞌet baw mga kaꞌiꞌirgan nga ipagpanakem it Espiritu Santo it aten, magkukuntraꞌ sira nga pirmi. Talagang nagkalaban tu i duwa ngaytu. Aypaꞌ ka iyan mga kubwaten ta, ega naga magkatabusan.

Tito 1:2

Baw matantuwan nira nga sabap it pamayaꞌ baw pagpasakep nirat Magayen ngaytung Baritaꞌ, makanira talaga i kaꞌgenan nga egay kaskedan. Ka itu ngaytu, talagang isiyanggup naytu nga lagi it Ampuꞌang Diyus parabir giyuna yay banwa. Baw basta Ampuꞌang Diyus, talagang ega kanya magꞌambut.

1 Pedro 1:23

Sabap kayti, subuk ipiyanganak kamu it sumaꞌup, nga ega maat ipiyanganak it taw nga may kamataynen, in daꞌga kat keseg it egay kaꞌawaꞌan nga ampang it Ampuꞌang Diyus nga subuk ilinwak ya kat nakem mi. Ampang ya ngaytu, maneꞌteꞌ seked it kaꞌnu-kaꞌnu, baw subung talagat egen ka dakulay magkabwat ya kat nakem it taw.

1 Juan 2:29

Urut mi na nga talagang mataldeng i Ampuꞌang Diyus. Aypaꞌ sikayan matantuwan mi nga sira nga magbuwat nat mataldeng kat panleteg it Ampuꞌang Diyus ngaytu, sira i ipagpabetang ya nga mga anak ya na.

1 Juan 3:6

Iyan magpangaꞌgenan it teꞌteꞌ nay pamayaꞌ yat ki Jesu-Cristo, ega nayan magpasigi pat muwat it kasalaꞌan. Temed iyan nga magsisigi pay buwat yat kasalaꞌan, ega yan nakatantu in maꞌunu si Jesu-Cristo baw egay tantung pagkilala yat kanya.

1 Juan 4:7

Mga pagmaꞌalen ku, siguruun ta nga magsigraras tami it esa may esa, sabap Ampuꞌang Diyus, kanyay puꞌun it kararas ngaytu. Ta kada may raras na ngaytu, maꞌyag nga bilang ipiyanganak na kanya it Ampuꞌang Diyus baw kilalang-kilala ya na kanya.

1 Juan 5:1

In siyu-siyuy magpamayaꞌ nga si Jesus, kanya nay paꞌaateng Cristo ngayti nga Manriribring Adiꞌ nga isiyanggup, subung na kanyat ipiyanganak it Ampuꞌang Diyus. Baw yay matuud, in pagmaꞌalen ta kanya ngaytu nga bilang nanganak, simpri rarasan ta na i kumpur bilang ipiyanganak ya nga beken.

1 Juan 5:18

Talagang magkaꞌrutan ta na nga iyan mga bilang ipiyanganak nat Ampuꞌang Diyus, ega na maat magpasigi pat muwat it kasalaꞌan, sabap pagtatarimaen na sira ni Jesu-Cristo ngayting Anak it Ampuꞌang Diyus. Ega na mapakay nga sakpen siꞌ ni Satanas.

1 Juan 5:4

Sabap kada bilang ipiyanganak nat Ampuꞌang Diyus, magkaꞌindaꞌeg ya na i pagsakep it kanya it karaꞌe-raꞌetan situt banwa ngaytu. Magkaꞌindaꞌeg ta naytu kat keseg it pamayaꞌ baw pagsarig tat ki Jesu-Cristo.

3 Juan 1:11

Pagmaꞌaleng iba-iba, ega mu guruun i maraꞌe-raꞌet nga buwat it beken, in daꞌga ari-ari magayen, iyan i imu. Ka iyan magbuwat it magayen, magpakiꞌuyun kanyat Ampuꞌang Diyus. Temed iyan magbuwat ngayat maraꞌe-raꞌet, ega yan nakatantu it in unuy adat it Ampuꞌang Diyus.