1 Juan 3:5 - Tagbanwa

⁵ Magkaꞌrutan mi nga piyalampud na pasiꞌ si Jesu-Cristo situt banwa isaꞌun matanggung ya nay mga kasalaꞌan ta. Baw kanya, talagang egay kakasalaꞌan.

1 Juan 3:5 Iomraidhean Croise

Mateo 1:21

Lalaki yan i sumakit. Si Jesus i ipangaran mu, sabap kanya i rimibri it mga taawan ya kat mga kasalaꞌan nira.”

Lucas 23:41

Talagang bagay it aten nga duwa i ukuman ngaytu nga panriga sabap duꞌun it mga nabwat ta, temed in kat itung taw, ega talagay maraꞌe-raꞌet nga nabwat ya.”

Lucas 23:47

Pagkamuya it kapitan it mga sundaluꞌ it iti nga mga biyaraꞌan, biyantug yay Ampuꞌang Diyus, nga magꞌaat, “Matuud talaga nga mataldeng i itung taw.”

Juan 1:29

Pagꞌeyag it aldaw, nalawag ni Juan si Jesus nga magꞌelep duꞌun it kanya. Pagkalteg ya, maat ya, “Wayan na, kanya nga ibinggay it Ampuꞌang Diyus, nga subuk uꞌuybun it tupa nga ipagsalisi, sabap kanya na ngayan i mangawaꞌ it kasalaꞌan it mga katataawan.

Juan 1:31

Tagnaꞌ maski aku ngaytu, ega naꞌrutan ku in siyuy mabut ngayan, temed pagbuwaten ku ngaytu kayti, nga magpamawtis situt danum, ipagpakilala kuytu kanya it bangsa nga Israel.”

Juan 14:30

Ega abwatayen ku nga pakisugi-sugid it imyu, ka magꞌaꞌabut na si Satanas nga magsasakep na situt sinirungat langit. Temed yay matuud, egay pudir yat aken.

Juan 8:46

Ka siyu it imyu i magkamatuud nga nagkasalaꞌan aku? In talagang kamatuudan i pagꞌaaten ku, unuka ega pagpamayaꞌnen mi aku?

2 Corinto 5:21

Ka, maski egay kakasalaꞌan ni Cristo, ipiyabetang kanya it Ampuꞌang Diyus nga makasalaꞌan sabap it aten nga mga taw, isaꞌun mapakay nga ipabetang ya kita nga mataldeng kat panleteg ya sabap it kamataynen ni Cristo ngayti.

1 Timoteo 1:15

Matuud talagay paꞌaaten nga dapat pamayaꞌnen it puꞌsa, nga si Cristo Jesus, naꞌasitu kanya nga matuud it sinirungat langit isaꞌun iribri ya i mga makasalaꞌan, nga talagang aku naytuy gimpuꞌun.

1 Timoteo 3:16

Eeꞌ baꞌ, talagang matanug it aten nga muꞌsa nga kalililuꞌan baw mabantug i kamatuudan nga kaꞌlay ngaytu subuk tagu-taguꞌ temed ipiyaꞌrut na pasar it ki Cristo. Ka si Cristo ngaytu, nagbalyung taw kanya. Kataldengan ya nga talagang Anak kanya it Ampuꞌang Diyus, ipiyagpamatuud tu it Espiritu Santo. Naltegan kanya it mga anghil. Baw pasar it kanya i ipagpangadal na kat belag-belag nga bangsa. Dakel na sira nga namayaꞌ nat kanya situt sinirungat langit. Baw kanya, nagpatibung siꞌ duꞌun it langit, duꞌun it kabantugan ya.

Tito 2:14

Nangganti kanyat aten isaꞌun iribri ya kita kat pagsakep it karaꞌe-raꞌetan, baw isaꞌun mabwat ya kita nga limpiyuꞌ na nga naꞌawaꞌ nay kasalaꞌan tami. Binwat yaytu isaꞌun mabwat ya kita nga kanya talaga nga mga taawan, nga maꞌireg nga banar muwat it mga buwat nga magagayen.

Hebreo 1:3

Duꞌun it Anak ya subuk magsingkar i kabantugan it Ampuꞌang Diyus sabap in magꞌuꞌunu i Ampuꞌang Diyus, atkayan nagay Anak ya ngaytu. Kat keseg it ampang it Anak ya ngaytu, kanya na i magꞌaꞌalima baw magtaban it muꞌsang bagay. Pagkabwat yat panlimpiyuꞌ it kasalaꞌan it taw, miyadung na kanya duꞌun it iwanang ayun it landaw nga gunaan nga Ampuꞌang Diyus nga duꞌun it langit.

Hebreo 4:15

Itu, Ega ngaytu Basta-basta nga Sasirduti tami, magkasanguꞌan ya kitang banar kat mga kalubayan ta nga magtaban it aten duꞌut kasalaꞌan, sabap kanya, naglabay nagat muꞌsang mga sukdan nga magꞌabut it aten nga taw. Temed kanya, ega nagkasalaꞌan.

Hebreo 7:26

Kanya i Piyakamataꞌas nga Sasirduti nga bagay talaga it aten nga kaꞌilangan. Ka alaid nga pirmi i nakem ya kat muꞌsang kasalaꞌan. Ega talagay karaꞌe-raꞌetan nga magpangbit kat nakem ya, baw egay maski unu nga magkaꞌiway it kanya. Dakulay piyagbelagan it kanya baw aten nga makasalaꞌan baw kayti, binggayan na kanyat Ampuꞌang Diyus it piyakamataꞌas nga pudir duꞌun it langit.

Hebreo 9:26

Ka in beteꞌ kaꞌilangan ni Cristo nga ipaturuꞌ nga pirmi i duguꞌ ya daꞌga baꞌ, ubus matay, matay kanya garing paꞌ it pagkaguna it banwa? Temed ega atkayan in daꞌga, kayti, kat timpu ngaytu it katumanan it muꞌsa ngayti nga pagbuwaten it tagnaꞌ, kaꞌsa lamang limnampud kanya situt banwa nga parawun na i kasalaꞌan it taw. Ipiyagparaw ya, sadili yang duguꞌ nga ipiyaturuꞌ it kaꞌsa ngayti.

Hebreo 9:28

Ta, atkayan naga, kaꞌsa lamang gasiꞌ binwat si Cristo nga panalisi, isaꞌun matanggung ya i kasalaꞌan it katataawan. Baw paꞌuliꞌ naga kanya situ, takaꞌ ega na maat isaꞌun tumanggung it kasalaꞌan it taw, in daꞌga mamisiꞌ manat kumpur magpaꞌbut it kanya, ka timpu nat kakumplituwan it karibriyan nira.

1 Pedro 1:18

Magkaꞌrutan mi na siguru in unu nga bagay i ikiyaliꞌwan mi kat tagnang pangaꞌgenan mi nga egay kapulusan ka alaid duꞌun it Ampuꞌang Diyus, pangaꞌgenan mi ngayting nasubli mi kat mga kagiyaringanan mi. Demdemen mi nga iyan ikiyaliꞌwan mi, ega bagay nga may karanggaꞌan nga subung it bulawan baw pirak.

1 Pedro 1:20

Talagang garing it ega paꞌ giyuna i banwa, ipiyasiguru kanya naytung lagi it Ampuꞌang Diyus kat itu nga buwaten ya nga panribri. Temed it yapaytung timpu ta na ngaytuy ipiyagꞌabut ya situt banwa kat ikaribri tami.

1 Pedro 2:22

Ega talagay maski unu nga kasalaꞌan nga binwat ni Cristo. Maski ampang nga aꞌakal, talagang egay namuyaan duꞌut kanya.

1 Pedro 2:24

Kanya mismu i timnanggung it muꞌsang kasalaꞌan tami, kat nalabayan yang kamataynen ya duꞌun it krus. Binwat yaytu isaꞌun indiꞌan ta na i muꞌsang ipagkasalaꞌan tami, baw mangaꞌgenan na it purus mataldeng nga pagbuwaten. Yay matuud, sabap lamang it ega teꞌe-teꞌeng nga pasakit nga tiyanggap ni Cristo, naꞌubaꞌubat nay mga kasalaꞌan tami.

1 Pedro 3:18

Subung it ki Cristo nga, maski egay kakasalaꞌan ya, temed piyakuriꞌan kanya nga inimatay sabap it aten nga makasalaꞌan. Kat kaꞌsa lamang ngayti nga binwat ya tiyanggung yay kasalaꞌan tami isaꞌun makapaꞌuliꞌ ya tami duꞌun it Ampuꞌang Diyus. Natay talagay bilug ya temed inggen naga kanya it guna it Espiritu Santo.

1 Juan 1:2

Eeꞌ baꞌ, kanya ngaytung puꞌun it kaꞌgenan, itiyanyag nat amen. Talagang naltegan namen kanya. Aypaꞌ ka ipagpamatuud namen na, baw ipagpangadal namen nat imyu i pasar it kanya ngaytu nga egen it egay kaskedan. Garing it tagnaꞌ paꞌ, duꞌun kanya nga lagi it adapan it Diyus Amaꞌ, baw kayti, itiyanyag na kanya situt amen.

1 Juan 1:7

Temed in pirmi ta nga magpangaꞌgenan uyun kat kaꞌyagan, nga alaid kat kasalaꞌan, subung nagat Ampuꞌang Diyus, nga kanya, purus kat kaꞌyagan talaga, magayen talagay pakiꞌiba-iba tami nga magpamayaꞌ it kanya. Baw iyan timnuruꞌ nga duguꞌ ni Jesus nga Anak ya, paglimpiyuꞌun ya kita, ka pagꞌawaꞌen yay muꞌsang kasalaꞌan ta.

1 Juan 2:1

Kamu nga bilang mga anak ku, ipagsurat kuytuy itung mga bagay asat imyu isaꞌun baꞌ daꞌkamu na magkasalaꞌan. Takaꞌ, sumang kaꞌanu, magkabwat ta naga it kasalaꞌan, temed dedemdemen tami nga may magpanindeg it aten duꞌun it Diyus Amaꞌ. Si Jesu-Cristo, nga kanya talagay mataldeng, kanyay magpanindeg ngaytut aten.

1 Juan 2:2

Ka si Jesus ngaytu, binwat kanya nga panalisi, isaꞌun matanggung yay mga kasalaꞌan tami. Tiyanggung ya ngaytu nga kasalaꞌan, ega maat aten lamang, in daꞌga kasalaꞌan it muꞌsang taw situt sinirungat langit.

1 Juan 2:29

Urut mi na nga talagang mataldeng i Ampuꞌang Diyus. Aypaꞌ sikayan matantuwan mi nga sira nga magbuwat nat mataldeng kat panleteg it Ampuꞌang Diyus ngaytu, sira i ipagpabetang ya nga mga anak ya na.

1 Juan 3:8

Temed iyan nga magbuwat pat kasalaꞌan, ki Satanas payan, sabap garing paꞌ it tagnaꞌ magsisigi nang magkasalaꞌan si Satanas ngaytu. Aypaꞌ ka piyalampud situt aten i Anak it Ampuꞌang Diyus, isaꞌun ranggaꞌen yay buwat ni Satanas ngaytu.

Mga Ipiyalteg 1:5

Kanya ngaytung si Jesu-Cristo, purus kamatuudan i kumpur ipagpamatuud ya. Iti, inggen kanyat Ampuꞌang Diyus it paꞌuliꞌ. Talagang kanya i piyakamataꞌas kat muꞌsang egnen paꞌ it paꞌuliꞌ. Baw kanya ngaytu i magbebegbeg it maski siyung magsasakep nga subuk mga adiꞌ situt sinirungat langit. Sana bantugun tami si Jesu-Cristo, nga magraras talaga it aten. Sabap kat kamataynen ya, nga ipiyaturuꞌ yay duguꞌ ya, ipiyaliꞌwan ya na kita kat panguripen it kasalaꞌan.