1 Juan 3:3 - Tagbanwa

³ Aypaꞌ in siyuy may itung kasiguruwan, magpaꞌres kanyang pirmi nga mangaꞌgenan it alaid kat kasalaꞌan, sabap si Jesu-Cristo ngaytu, talagang alaid kat muꞌsang kasalaꞌan.

1 Juan 3:3 Iomraidhean Croise

Mateo 5:48

Aypaꞌ kaꞌilangan pasbung kamu it Amaꞌ mi nga duꞌun it langit, nga kagayen it buwat ya, egay kakurangan.”

Lucas 6:36

Kaꞌilangan magmaꞌildaw kamu, ka pasbung kamu it Amaꞌ mi nga maꞌildaw.”

Juan 17:19

Baw sabap it kanira, ipasiguru ku nay sadili ku nga sunudun kung banar i muꞌsang kaꞌirgan mu, isaꞌun masiguru gasiꞌ sira nga imu nang matuud, nga alaid na kat kasalaꞌan.”

Mga Binwat 15:9

Iti na ngayti i esang kamatuudan nga kitang mga Judio baw sira nga ega Judio, nagsuru-surubungun na i leteg it Ampuꞌang Diyus. Ka sabap it pamayaꞌ baw pagsarig nirat ki Jesus, biyaꞌgu ya na i adat nira baw ipiyasinsiya nay kasalaꞌan nira.

Roma 15:12

Ta, maat pay inaat gasiꞌ it prupitaꞌ nga si Isaias, “May tumubuꞌ siꞌ kat mga tungtung-inapuꞌ ni Jesse. Iyan i timindeg nga mamaalaꞌ it mga bangsa nga ega Judio. Duꞌut kanya i paniguru nirat kagayenan.”

2 Corinto 7:1

Ta kayti, mga pagmaꞌalen ku, it ipiyagsanggup it aten i mga itu ngaytung bagay, kaꞌilangan nga limpiyuꞌun i bilug baw nakem ta kat muꞌsang kasalaꞌan, ka pagraꞌwayen it Ampuꞌang Diyus i mga kasalaꞌan it taw. Sana, paꞌresan tami nga mangaꞌgenan nga paggalangen it may iꞌlam i Ampuꞌang Diyus seked it mataldeng na it kaꞌustuꞌang kataldeng i pangaꞌgenan tami.

Colosas 1:5

Atkaytu i pagsarig baw pagmaꞌal mi ngaytu sabap pagsisiguruun mi i kagayenan nga magꞌaꞌareg it aten duꞌut langit, iyan kagayenan nga nasiguru mi kat Magayeng Baritaꞌ nga kamatuudan nga ipiyangadal it imyu it tagnaꞌ.

2 Tesalonica 2:16

Ipagpanalangin namen nga sana tabangen kamu nga pirmi it Ampuꞌan tami nga si Jesu-Cristo baw Amaꞌ tami nga Ampuꞌang Diyus. Dakulay raras ya it aten, baw kat dangan ya it aten, binggayan ya kita it ipagkasagya it nakem nga ega magꞌugad-ugad seked it kaꞌnu-kaꞌnu baw nakaꞌunay nga kasiguruwan it kagayenan kat pagdadarapaꞌen.

Tito 3:7

Ka yay matuud, inildawan ya kita nga tiyanggung ni Jesu-Cristo i kasalaꞌan tami, ka ipabetang ya na kita nga mataldeng kat panleteg ya. Binwat yay atkaytu isaꞌun maꞌaten talagay pagsisiguruun tami nga kaꞌgenan nga egay kaskedan.

Hebreo 12:14

Kaꞌilangan paꞌresan mi i pagꞌurunyun nga kat ikaꞌimbeng it pakiꞌiba-iba mi it masigkataw mi, baw paꞌalaidan mi na i kasalaꞌan. Sabap mga maꞌiꞌireg it kasalaꞌan, daꞌsira makapasagpun duꞌun it Ampuꞌan kat pagdadarapaꞌen.

Hebreo 6:18

Basta simnanggup i Ampuꞌang Diyus baw nanumpa paꞌ kanya, talagang siguradu i pagtuman ka ega mapakay nga mambut kanya. Aypaꞌ piyasagya nang banar i nakem tami, kita nga nagpaꞌimbeng duꞌut kanya, isaꞌun inawaren tat nakaꞌunay nga inawar i kagayenang isiyanggup ya.

Hebreo 7:26

Kanya i Piyakamataꞌas nga Sasirduti nga bagay talaga it aten nga kaꞌilangan. Ka alaid nga pirmi i nakem ya kat muꞌsang kasalaꞌan. Ega talagay karaꞌe-raꞌetan nga magpangbit kat nakem ya, baw egay maski unu nga magkaꞌiway it kanya. Dakulay piyagbelagan it kanya baw aten nga makasalaꞌan baw kayti, binggayan na kanyat Ampuꞌang Diyus it piyakamataꞌas nga pudir duꞌun it langit.

Santiago 4:8

Mandangep kamu duꞌun it Ampuꞌang Diyus ka siguradung sumambung kanya, nga ildawan ya kamu. Kamu nga mga makasalaꞌan, indiꞌan mi nay mga kasalaꞌan mi ngayan. Tingleden mi na duꞌun it Ampuꞌang Diyus i nakem mi nga magduwa-duwa paꞌ.

1 Pedro 1:15

Yanay kaꞌilangan, kat muꞌsang pagbuwaten mi mangaꞌgenan kamu na nga alaid kat muꞌsang kasalaꞌan, ka atkayan nagay Ampuꞌang Diyus nga nagpanakem it imyu nga pasakep it kanya.

1 Pedro 1:3

Kayti, bantugun tami nga muꞌsa i Ampuꞌang Diyus, nga Amaꞌ it Ampuꞌan tami nga si Jesu-Cristo! Sabap natantuwan ta nga, kat kadakulat ildaw yat aten, bilang ipiyanganak ta kayti it sumaꞌup baw siguradu na talagay pagꞌiꞌinawaren tami nga kagayenan. Ildaw ya ngaytu, siguraduytu sabap duꞌun it pagkaꞌgen ni Jesu-Cristo it paꞌuliꞌ.

2 Pedro 1:4

Kat kabantugan baw guna ya ngaytu, may ibinggay yat aten nga mga ega babasta-bastaeng mga sanggup, isaꞌun kasbung i adat ta it kanyang adat nga talagang magayen. Sabap nakaꞌalikaꞌsut tami na kat pagkaꞌuripen tami it pagsumbayaꞌ it mga singkadan tami nga kaꞌiꞌirgan nga maraꞌe-raꞌet, nga yay tumaban it taw kat pangaꞌgenan nga maranggaꞌ.

2 Pedro 3:14

Aypaꞌ mga pagmaꞌalen ku, mintras pagꞌelaten mi tu, paꞌresan nga mangaꞌgenan uyun talaga it kaꞌirgan it Ampuꞌang Diyus. Paꞌresan nga ega nay bagay nga kamansaꞌ it bilug baw masudi-sudi it beken, isaꞌun maꞌimbeng i nakem ta in madap nat kanya.

1 Juan 2:6

Aypaꞌ iyan magꞌaat nga, “Pagteꞌteꞌan ku na si Jesu-Cristo, nga talagang maglalagpit aku nat kanya,” kaꞌilangan mangaꞌgenan kanya it subuk pangaꞌgenan ni Jesu-Cristo ngaytu, iyan situ paꞌ kanyat sinirungat langit.

1 Juan 4:17

Sikayan magkatantuwan ta na nga nakumplitu na i kararas ta ngaytu. Aypaꞌ ka ega na pagꞌiꞌlaman tami i aldaw ngayan nga ipangukuman. Sabap unu pay maiꞌlaman it magpasbung ta nat ki Jesu-Cristo situt banwa ngaytu?