1 Juan 3:16 - Tagbanwa

¹⁶ Dedemdemen mi tu, nga si Jesu-Cristo, ibinggay yay pati ginawa ya sabap lamang it aten isaꞌun maribri ta. Sikayan magkatantuwan ta nay paꞌaaten nga kamatuudan nga raras. Aypaꞌ kita, kaꞌilangan ta gasing tumabang it mga sulsug ta kat pamayaꞌ, maski maat ikagtas nat ginawa ta.

1 Juan 3:16 Iomraidhean Croise

Mateo 20:28

Subung it aken nga Taga Langit nga Ipiyanganak it Taw. Naꞌasitu aku, ega maat isaꞌun pagsirbiyan it beken, in daꞌga aku i magsirbi baw ipagtas kuy ginawa ku nga yay itanggung it kasalaꞌan it kadaklan.”

Juan 10:11

“Akuy subrang magayen nga manigꞌeper. Kamatuudan it magayen nga manigꞌeper, sabap lamang it mga tupa ibgay ya i pati ginawa ya.

Juan 13:34

Itu nay baꞌgung urdin nga ibgay kut imyu. Kaꞌilangan nga magsigraras kamu it esa may esa. In magꞌuꞌunu i raras kut imyu, atkayan nagang pirmi i raras mit esa may esa.

Juan 3:16

Ka talagang pagrarasan nga banar it Ampuꞌang Diyus i muꞌsang taw situt sinirungat langit. Aypaꞌ ibinggay yay Anak ya nga paeꞌesa-esa, isaꞌun in siyuy mamayaꞌ baw sumarig it kanya, ega kaꞌaduꞌun it kakuriꞌan, in daꞌga mabgayan kanyat kaꞌgenan nga egay kaskedan.

Mga Binwat 20:28

Aypaꞌ kayti, yan pagꞌiꞌinturun mi nga pirmi i sadili mi nga pamayaꞌ, baw pagꞌiꞌipaten mi gasiꞌ i pamayaꞌ it kadakel it mga magpamayaꞌ asan it Efeso nga ipiyasakep it Espiritu Santo it imyu nga mga magpamaalaꞌ. Arigraan mit magayen i mga subuk inalang ngaytit Ampuꞌang Diyus isaꞌun kanya nang taawan, nga egay beken nga ipiyagꞌalang ya, in daꞌga duguꞌ it sadili yang Anak nga si Jesus.

Roma 16:4

Talagang ega magkalipatan ku i kadakulat panabang nirat aken nga ipinirinda niray ginawa nira sabap lamang it aken nga ginawa. Ega lamang aku i pirmi nga magpasalamat it kanira in daꞌga muꞌsang mga gurupu it magpamayaꞌ nga ega Judio.

Roma 5:8

Temed ta, kayti, ipiyatantu it Ampuꞌang Diyus i kadakulat raras yat aten it, maski tegeb ta nang tegeb it kasalaꞌan, igiyanti ni Cristo i ginawa ya sabap it aten.

2 Corinto 4:12

Temed, maski subuk pagꞌusigen kami nga pirmi it kamataynen, liꞌwan ya, magkaparagan mi na i kaꞌgenang egay kaskedan.

Efeso 5:2

Mangaꞌgenan kamu it pirming pagbegbegan it raras mi it maꞌiba mi. Pasbung kamut ki Cristo nga, kat kadakulat raras ya it aten, ipiyagtas yay ginawa ya, nga ipiyasbung yay sadili ya it piyakamabanglu nga panalisi nga pagsagyaan nga banar it Ampuꞌang Diyus.

Efeso 5:25

Ta, kamu gasiꞌ nga mga lalaki, kaꞌilangan nga rarasan mit kamatuudan i asawa mi it subung it raras ni Cristo it mga magsarig baw magpamayaꞌ it kanya, nga ipiyagsalisi ya i bilug ya sabap it kanira.

Filipos 2:17

Eeꞌ baꞌ, maski ikagtas it ginawa ku i paꞌres ku sabap it imyu, talagang ega daꞌgaen ku, basta kat ikagayen it pamayaꞌ baw pagsirbi mit Ampuꞌang Diyus. Masagyang-masagya aku ga, ka urut ku nga mabgayan ku gasiꞌ kamu it kasagyaan kat pamayaꞌ mi.

Filipos 2:30

Ka si Epafrodito ngaytu, ipinirinda ya na talagay bilug ya. Unuka ega aaten ku it, sarut ya ngaytu, ega nay pasubrang eget kat paꞌres ya lamang it buwaten ngaytu ni Cristo, baw iyan tiyaꞌgan mit kanya nga sabap it kutabang mit aken.

1 Tesalonica 2:8

Eeꞌ baꞌ, kat kadakulaꞌ it raras namen it imyu, iyan talagay kasagyaan namen, ega desang ipangadal it imyu i Magayen ngaytung Baritaꞌ nga garing duꞌun it Ampuꞌang Diyus, in daꞌga ipirinda namen i pati ginawa namen sabap lamang it imyu. Ka talagang pagrarasan namen kamu.

Tito 2:13

Kaꞌilangan atkaytuy pangaꞌgenan ta mintras pagꞌelatan tami i kasagyaan nga pagsisiguruun ta, nga maltegan i kabantugan ni Cristo Jesus kat pamaꞌuliꞌ ya situ, kanya nga mabantug nga Ampuꞌang Diyus baw Manriribri tami.

1 Pedro 1:18

Magkaꞌrutan mi na siguru in unu nga bagay i ikiyaliꞌwan mi kat tagnang pangaꞌgenan mi nga egay kapulusan ka alaid duꞌun it Ampuꞌang Diyus, pangaꞌgenan mi ngayting nasubli mi kat mga kagiyaringanan mi. Demdemen mi nga iyan ikiyaliꞌwan mi, ega bagay nga may karanggaꞌan nga subung it bulawan baw pirak.

1 Pedro 2:24

Kanya mismu i timnanggung it muꞌsang kasalaꞌan tami, kat nalabayan yang kamataynen ya duꞌun it krus. Binwat yaytu isaꞌun indiꞌan ta na i muꞌsang ipagkasalaꞌan tami, baw mangaꞌgenan na it purus mataldeng nga pagbuwaten. Yay matuud, sabap lamang it ega teꞌe-teꞌeng nga pasakit nga tiyanggap ni Cristo, naꞌubaꞌubat nay mga kasalaꞌan tami.

1 Pedro 3:18

Subung it ki Cristo nga, maski egay kakasalaꞌan ya, temed piyakuriꞌan kanya nga inimatay sabap it aten nga makasalaꞌan. Kat kaꞌsa lamang ngayti nga binwat ya tiyanggung yay kasalaꞌan tami isaꞌun makapaꞌuliꞌ ya tami duꞌun it Ampuꞌang Diyus. Natay talagay bilug ya temed inggen naga kanya it guna it Espiritu Santo.

1 Juan 2:6

Aypaꞌ iyan magꞌaat nga, “Pagteꞌteꞌan ku na si Jesu-Cristo, nga talagang maglalagpit aku nat kanya,” kaꞌilangan mangaꞌgenan kanya it subuk pangaꞌgenan ni Jesu-Cristo ngaytu, iyan situ paꞌ kanyat sinirungat langit.

1 Juan 2:9

Iyan magꞌaat nga, kanya, kat kaꞌyagan na, temed pagpakitabugan ya paꞌ i sulsug ya kat pamayaꞌ, yay matuud, duꞌun paꞌ kanyat kadleman.

Mga Ipiyalteg 1:5

Kanya ngaytung si Jesu-Cristo, purus kamatuudan i kumpur ipagpamatuud ya. Iti, inggen kanyat Ampuꞌang Diyus it paꞌuliꞌ. Talagang kanya i piyakamataꞌas kat muꞌsang egnen paꞌ it paꞌuliꞌ. Baw kanya ngaytu i magbebegbeg it maski siyung magsasakep nga subuk mga adiꞌ situt sinirungat langit. Sana bantugun tami si Jesu-Cristo, nga magraras talaga it aten. Sabap kat kamataynen ya, nga ipiyaturuꞌ yay duguꞌ ya, ipiyaliꞌwan ya na kita kat panguripen it kasalaꞌan.

Mga Ipiyalteg 5:9

Kimnantaꞌ sirat baꞌgung kalasit kantaꞌ, nga magꞌaat, “Ikaw talagay mapakay nga kumawaꞌ it pagluulunun ngayan nga kasuratan baw mawaꞌ it mga papaꞌnget ya. Sabap naꞌimatay ka, baw sabap it kamataynen mu ngayan nga ipiyaturuꞌ i duguꞌ mu, may subuk inalang mu na nga mga taw kat muꞌsang mga bangsa, maski siyuy piyanggaring-garingan nira baw maski unu nga ampang i ampang nira. Kayti mga taawan na sirat Ampuꞌang Diyus.