1 Juan 3:14 - Tagbanwa

¹⁴ Temed maꞌyag nat aten nga kita, ega na subuk patay kat panleteg it Ampuꞌang Diyus, in daꞌga, pagbebgayan ta nat kaꞌgenan nga egay kaskedan. Urut ta naytu sabap may raras ta na talaga it mga sulsug ta kat pamayaꞌ. Iyan ega pay raras ngaytu, subuk sakep paꞌ kanyat kamataynen.

1 Juan 3:14 Iomraidhean Croise

Mateo 25:40

Bawnga aaten ku yan nga Adiꞌ nira, ‘Matuud talagay iꞌaat kut imyu. Iyan binwat mi i mga itu ngaytu kat maski piyakatimawaꞌ nga bilang mga sulsug ku, simpri aku na i binwatan mi.’

Lucas 15:24

Ka kabilangan it anak ku ngaytu, natay na temed naꞌgen naga it paꞌuliꞌ. Subung kanyat naꞌlam temed naparagan naga.’ Egay beken, nagkasagyaan sira nga matuud.

Lucas 15:32

Temed kayti, simpri dapat tami nga magkasagyaan ka sulsug mu ngaytu, kabilangan ya natay na temed subuk naꞌgen naga it paꞌuliꞌ. Subung gasiꞌ it naꞌlam kanya temed naparagan naga.’”

Lucas 7:5

Sabap pagrarasan ya i bangsa ta ngaytu baw piyabwatan ya paꞌ kita it papagsambaan tami.”

Juan 13:35

In magsigraras kamu, makilalaan it kadakel nga mga alagad ku kamu.”

Juan 15:12

Ka itu nay ipagꞌurdin ku, magsigraras kamu it esa may esa subung nagat raras kut imyu.

Juan 15:17

Ituy ipagꞌurdin kut imyu, nga magsigraras kamung pirmi.”

Juan 5:24

Talagang matuud tuy itu nga ipagꞌaat kut imyu. Iyan magpagneg it mga pagꞌampangen ku baw magpamayaꞌ it nagtaꞌeg ngaytit aken, iyan i may kaꞌgenan nga egay kaskedan. Ega na ukumanan kanya it mabeꞌgat. Imbis nga panriga nga kamataynen, siguradung may magꞌaꞌareg nat kanya nga kaꞌgenan nga egay kaskedan.

2 Corinto 5:1

Subung nagaytut bilug ta, ka magkaꞌrutan ta nga maski natay na i pandenaꞌ ngaytung bilug nga bilang pagtataꞌidan ta situt banwa, mabut i aldaw nga begayan tat panlangit nga bilug, nga ega nay kamataynen seked it kaꞌnu-kaꞌnu, nga ega taw i nagbuwat in daꞌga Ampuꞌang Diyus.

Galacia 5:22

Temed in magpasakep i taw kat pamegbeg it Espiritu Santo itu may itu i liꞌwan ya, kamatuudang raras it masigkataw, magꞌuꞌunay nga kasagyaan baw kaꞌimbengan it nakem, masagkaꞌ it kakuriꞌan it magayen i nakem, maꞌildaw, magayen i adat, magkasarigan nga banar,

Efeso 1:15

Aypaꞌ ka, garing it nabaritaꞌan ku i pasar it pagsarig baw pamayaꞌ mi it Ampuꞌan nga si Jesu-Cristo, baw iyan raras mi it mga sulsug mi kat pamayaꞌ,

Efeso 2:1

Talagang kamu katꞌesa, kaꞌalimbawaan mi, subuk patay kat panleteg it Ampuꞌang Diyus kat kadakulat mga kasalaꞌan mi nga kuntraꞌ kat kaꞌirgan ya. Egay maski unu nga magpangbit kat nakem mi in pasar it pagkilala it kanya.

Efeso 2:5

Sabap maski subuk patay ta nang patay sabap it kasalaꞌan tami, subuk ipiyaꞌuyut ya na kita it ki Cristo nga inggen yat paꞌuliꞌ, nga begayan tami na it kaꞌgenang egay kaskedan. Talagang sabap lamang it ildaw ngaytut Ampuꞌang Diyus maribri tami kat panriga yat tagnang pangaꞌgenan ta.

Colosas 1:4

Sabap nabaritaꞌan namen i pamayaꞌ mi it ki Cristo Jesus ngaytu baw raras mi it muꞌsang mga kasulsugan mi kat pamayaꞌ.

1 Tesalonica 4:9

Ta in pasar ga it pagmaꞌal baw raras it sulsug kat pamayaꞌ, maski ega na suratan namen kamu, ka Ampuꞌang Diyus na i magtulduꞌ it imyu it in magꞌuꞌunuy matuud nga raras it esa may esa.

Hebreo 13:1

Kaꞌilangan nga ipasigi mi nga magsigraras kamu it esa may esa nga subung it sang sulsugan.

1 Pedro 1:22

Ta kayti, kat pamayaꞌ mi it kamatuudan ngaytung Magayeng Baritaꞌ, bilang nanlimpiyuꞌ kamu na. Ka naꞌawaꞌ nay kasalaꞌan mi, iyan nagpasakep kamu na it ki Cristo. Aypaꞌ mapakay na nga kamatuudan nay raras mi it esa may esa nga subung it sang sulsugan. Aypaꞌ tingleden mi talagay nakem mi kat kamatuudang raras it esa may esa nga ega desang awam.

1 Pedro 3:8

May paꞌugdun ku paꞌ nga panulduꞌ kut imyu nga muꞌsa. Kaꞌilangan talaga nga mangaꞌgenan kamu it may pagꞌurunyun mi. Magmaꞌildaw kamu it esa may esa, baw magsigraras kamu it subung it nagsulsu-sulsugun. Kaꞌilangan magtabang-tabangen baw mapiyababaꞌ kamu.

2 Pedro 1:7

Baw ega matuduꞌ situt aten i adat nga magsigtabang-tabangen nga bilang sang sulsugan, baw pirmi nga may kamatuudang raras it esa may esa.

1 Juan 2:3

Pagsisiguruun ta naytu nga kilala ta nay Ampuꞌang Diyus, basta pagsunudun tat magayen i mga ipiyagꞌurdin ya.

1 Juan 3:23

Ituytu i ipiyagꞌurdin ya, nga mamayaꞌ ta baw sumarig it Anak yang si Jesu-Cristo, baw magsigraras tami it esa may esa nga subung it ipiyagꞌurdin it aten ni Jesu-Cristo ngaytu.

1 Juan 4:12

Garing it tagnaꞌ paꞌ, egay nakalteg it Ampuꞌang Diyus. Temed in talagang may raras ta nat esa may esa, maꞌyag nga magsasarum na talaga situt aten i Ampuꞌang Diyus ngaytu, baw kiyumplitu ya na i raras ta ngaytu.

1 Juan 5:13

Itung mga bagay, ipagsurat kuytu asat imyu nga mga magpamayaꞌ baw magsarig it Anak it Ampuꞌang Diyus, isaꞌun masiguru mi nga kamu, may kaꞌgenan na nga egay kaskedan.

1 Juan 5:2

Baw ituytu i ikasiguru ta nga pagrarasan tami i kumpur bilang ipiyanganak it Ampuꞌang Diyus, itu nga pagmaꞌalen tami i Ampuꞌang Diyus ngaytu baw pagsunudun tami i kumpur ipiyagꞌurdin ya.