1 Juan 2:8 - Tagbanwa

⁸ Temed gasiꞌ, subuk may baꞌgu nga ipagsurat ku nga urdin sabap it raras ngaytu. Ka raras ngaytu, talagang nagmatuud tu duꞌut kaꞌgenan ni Jesus. Baw kamu gasiꞌ, pagꞌadaten mi na kayti i raras ngaytu. Ta it atkayan na, kabilangan ya, subuk magsipat nay kadleman nga kasalaꞌan. Magꞌeyag na kat pikiran mi i matuud nga kaꞌyagan nga garing duꞌut Ampuꞌang Diyus.

1 Juan 2:8 Iomraidhean Croise

Isaias 9:2

Naꞌlay na nga magpangaꞌgenan kat kadleman i mga taga Galilea ngaytu, temed inyagan na sirat eyag nga ega basta-basta. Subung sirat sinakepan it kamataynen ka egay inawar nira, temed kayti inyagan na sira.

Mateo 4:16

naꞌlay na nga magpangaꞌgenan kat kadleman i mga taga Galilea ngaytu, temed inyagan na sirat eyag nga ega basta-basta. Subung sirat sinakepan it kamataynen ka egay inawar nira, temed kayti, inyagan na sira.”

Lucas 1:79

Sabap maꞌyagan ya i mga magpangaꞌgenan kat kadleman, nga subung sirat sinakepan it kamataynen ka egay inawar nira. Baw itulduꞌ yat aten i dalan nga magꞌaduꞌun it kaꞌimbengan.”

Juan 1:9

Iyan tidaw ngaytu nga talaga, nga magꞌeyag kat muꞌsa nga mga taw, magꞌaꞌabut na situt sinirungat langit.

Juan 12:35

Maat siꞌ ni Jesus it kanira, “Dekeyeꞌ mana nga timpu nga maꞌiba-iba mi aku nga bilang tidaw nga magꞌeyag it imyu. Kaꞌilangan magpatulduꞌ kamu mintras magkaꞌyagan kamu paꞌ. Pasbung kamut taw nga magpanaw it maꞌyag paꞌ, nga ega magpadlem. Ka ega magkaturnuwan it magpanaw it madlem in ari magayen nga panawan ya.

Juan 12:46

Ka naꞌasitu aku nga bilang tidaw it banwa ngaytu, isaꞌun ega maneꞌteꞌ kat kadleman i iyan nga mamayaꞌ it aken.

Juan 13:34

Itu nay baꞌgung urdin nga ibgay kut imyu. Kaꞌilangan nga magsigraras kamu it esa may esa. In magꞌuꞌunu i raras kut imyu, atkayan nagang pirmi i raras mit esa may esa.

Juan 8:12

Pagsaꞌup siꞌ ni Jesus it mampang duꞌun it mga taw, maat ya, “Aku ngaytu i bilang tidaw nga magbegay it eyag kat pikiran it mga taw situt sinirungat langit. Iyan sumunud it aken, ega na subung it magpanaw it delemen, sabap pagꞌeꞌyagan na kanyat tidaw ngaytu nga magbegay it kaꞌgenan nga egay kaskedan.”

Mga Binwat 17:30

Iyan tagnaꞌ paꞌ, subuk piyabaya-bayaꞌan it Ampuꞌang Diyus i mga kamaliꞌ it mga taw nga daꞌgay uru-urut pasar it kanya. Temed kayti, ipagsasar yat muꞌsang katataawan, kat paꞌari-aring rugar, nga magsinguliꞌ na sira baw indiꞌan nay muꞌsang kasalaꞌan nira.

Mga Binwat 26:18

Sira ngaytu nga ega Judio i tulduꞌan mu isaꞌun kamukrat sira ka kayti, subuk beleg sira. Tulduꞌan mu sira isaꞌun kaliꞌwan sirat kadleman it kasalaꞌan baw pamegbeg ni Satanas, ka paꞌugad na sira kat kaꞌyagan nga ibgay it Ampuꞌang Diyus, nga pasakep na sirat kanya. Ka in mamayaꞌ sirang matuud it aken, mapasinsiya i mga kasalaꞌan nira baw makaꞌuyut sira kat mga taw nga piniliꞌ baw ipiyapinpin it Ampuꞌang Diyus nga mga taawan ya.’”

Roma 13:12

Ka in ipaꞌalimbawa tat aldaw baw delem i kaꞌlay it banwa, kayti ngaytung timpu, subuk magkukuꞌ-aldaw na. In maꞌbut nay kakumplituwan it karibriyan ta, yay subuk aldaw na nga banar. Aypaꞌ, kaꞌilangan, paꞌalaidan tami na i muꞌsang karaꞌe-raꞌetan, ka yanay buwat it banwa it timpu pat delemen nga ega paꞌ limnampud si Cristo. Kayti ngaytu, it naꞌyagan tami na, yanay paꞌresan tami nga buwaten, purus magagayen, ka yay subuk kalasag tat buwat ni Satanas.

2 Corinto 8:9

Ka daꞌga baꞌ magkaꞌrutan mi na in sang unu talaga i kadakulaꞌ it kaꞌildaw it Ampuꞌan tami nga si Jesu-Cristo, nga maski ega babasta-bastaen i kabantugan baw kataꞌasan ya duꞌut langit, nagpabalyu nga subuk timawaꞌ nga miskin isaꞌun, kat pagkamiskin ya ngayti, magmanggaden kamu it kagayenan nga duꞌun it langit.

Efeso 5:8

Ka iti, tagnaꞌ ngayti, talagang kat kadleman kamu paꞌ ka egay pagkilala mi it Ampuꞌang Diyus. Temed kayti, kat kaꞌyagan kamu na sabap it pakilagpit mi it Ampuꞌan. Aypaꞌ mangaꞌgenan kamu na it pangaꞌgenan nga bagay kat mga taw nga naꞌyagan na.

2 Timoteo 1:10

Temed kayti mana ngaytu natanyag, iyan piyapaꞌasitu ya nat denaꞌ si Cristo Jesus nga Manriribri tami. Natanyag nga diyaꞌeg ya talagay kamataynen, baw ipiyatanyag ya kat Magayen ngaytung Baritaꞌ nga maꞌaten nay kaꞌgenan nga egay kaskedan.

1 Pedro 1:21

Ta kayti, sabap it binwat ngaytu ni Cristo nga panribri, pagpakimatuudun baw pagsarigan mi nay Ampuꞌang Diyus, kanya nga minggen it kanya it paꞌuliꞌ baw minggay it kanya it ega basta-bastang kabantugan. Nakasiguru na kayti i pagsarig baw inawar mi, nga duꞌun na it Ampuꞌang Diyus.

1 Juan 3:23

Ituytu i ipiyagꞌurdin ya, nga mamayaꞌ ta baw sumarig it Anak yang si Jesu-Cristo, baw magsigraras tami it esa may esa nga subung it ipiyagꞌurdin it aten ni Jesu-Cristo ngaytu.

1 Juan 4:11

Mga pagmaꞌalen ku, ta it atkaytuy kadakulat raras it Ampuꞌang Diyus it aten, kaꞌilangan magsigraras tami gasiꞌ i aten.

1 Juan 4:21

Ka yay ipiyagꞌurdin ya ngaytu it aten, nga in siyuy magmaꞌal it Ampuꞌang Diyus, dapat nga rarasan ya gasiꞌ i sulsug ya kat pamayaꞌ.