1 Juan 2:5 - Tagbanwa

⁵ Temed in siyuy magkasunud it kaꞌustuꞌan it muꞌsang ampang it Ampuꞌang Diyus, talagang ustuꞌ na i pagmaꞌal yat Ampuꞌang Diyus ngaytu. Kat pagsunud ta ngaytu, masiguru ta nga kita, uyun na talaga duꞌun it Ampuꞌang Diyus, teꞌteꞌ na nga maglalagpit duꞌun it kanya.

1 Juan 2:5 Iomraidhean Croise

Lucas 11:28

Temed timnubag si Jesus, nga magꞌaat, “Yay matuud, subraꞌ pang magkasagya i magpagneg it ampang it Ampuꞌang Diyus baw pagsunudun ya.”

Juan 14:21

Iyan magꞌintindi it mga urdin ku baw pagsunudun yay mga itu ngaytu, iyan i may pagmaꞌal it aken. Iyan magmaꞌal it aken, maꞌalen gasiꞌ kanya it Amaꞌ ku. Maꞌalen ku naga gasiꞌ kanya baw talagang pakilala aku nang banar it kanya.”

Juan 14:23

Katubag si Jesus, maat ya, “Iyan may pagmaꞌal it aken, simpri sunudun yay mga pagꞌaaten ku. Maꞌalen kanya it Amaꞌ ku, baw mamirmiyan kami magꞌAmaꞌ asat kanya nga kaꞌiba-iba ya nang pirmi.

Juan 15:5

Aku i puꞌun baw tangkayan it luwak nga ubas. Kamu i subuk sanga ku. Iyan temeꞌteꞌ it aken, aku gasiꞌ i temeꞌteꞌ it kanya. In atkayan, pirmi nang dakulaꞌ i buwaꞌ ya. Ka yay matuud, egay maski unu nga mabwat mi in magpablag kamut aken.

Juan 6:56

Iyan magkaꞌen it isi ku baw magꞌinum it duguꞌ ku, kabilangan ya, sang kabilu-bilugan kami na.

Roma 8:1

Temed kayti, ituy kamatuudan nga iyan mga maglalagpit nat ki Cristo Jesus, nga magpasakep nat kanya, talagang ega na maꞌulug kat maski unu nga ukuman nga panriga.

1 Corinto 1:30

Maski kita, talagang garing duꞌut Ampuꞌang Diyus i magpakilagpit ta ngaytu it ki Cristo Jesus. Baw si Cristo Jesus ngaytu i binwat it Ampuꞌang Diyus nga ikakilala tami it kamatuudan nga kasepsep, nga kasepsep ngaytu nga paꞌaaten, mataldeng tami na kat panleteg it Ampuꞌang Diyus, ka ipiyagribri ta na kat panguripen it kasalaꞌan it aten, isaꞌun mangaꞌgenan tami na nga alaid kat muꞌsang kasalaꞌan.

2 Corinto 5:17

Ta, atkayan naga, in siyu-siyu nga talagang maglalagpit na it ki Cristo, mabaꞌgu i muꞌsang-muꞌsa ya. Kaꞌalimbawaan ya, giyuna it sumaꞌup, aypaꞌ ega na i tagnaꞌ ngayti nga karaꞌe-raꞌetan kat pangaꞌgenan ya ka nabaꞌgu na.

2 Corinto 5:21

Ka, maski egay kakasalaꞌan ni Cristo, ipiyabetang kanya it Ampuꞌang Diyus nga makasalaꞌan sabap it aten nga mga taw, isaꞌun mapakay nga ipabetang ya kita nga mataldeng kat panleteg ya sabap it kamataynen ni Cristo ngayti.

Santiago 2:22

Duꞌun it iti ngayti, magkaltegan ta nga kat pamayaꞌ ni Abraham egay beblagan it pakimatuud baw mga pagbuwaten nga magpamatuud it pamayaꞌ ya ngayti. Iyan binwat ya ngayti i magpakilala nga egay kurang it pamayaꞌ ya it Ampuꞌang Diyus.

1 Juan 3:24

Ta kanya nga masunud it mga urdin it Ampuꞌang Diyus, talagang teꞌteꞌ duꞌun it Ampuꞌang Diyus i pangaꞌgenan ya, baw Ampuꞌang Diyus ngaytu, teꞌteꞌ naga duꞌun it kanya. Baw tabang ngaytut aten it Espiritu Santo nga ipiyapasarum ya situt bilug tami, iyan i ipagkatantu ta nga teꞌteꞌ na situt aten i Ampuꞌang Diyus.

1 Juan 4:17

Sikayan magkatantuwan ta na nga nakumplitu na i kararas ta ngaytu. Aypaꞌ ka ega na pagꞌiꞌlaman tami i aldaw ngayan nga ipangukuman. Sabap unu pay maiꞌlaman it magpasbung ta nat ki Jesu-Cristo situt banwa ngaytu?

1 Juan 4:18

Ka basta kamatuudan i pagmaꞌal tat Ampuꞌang Diyus baw kararas tat masigkataw ta, ega nay iꞌlam tamit panriga. Sabap iyan ustuꞌ nga pagmaꞌal, subuk magkataburan yay iꞌlam ngaytu. Ka iyan talagay pagꞌiꞌlaman it mga taw, rigaen. Aypaꞌ in magꞌiꞌlam ta pat rigaen, maꞌyag nga kurang pay pagmaꞌal baw kararas ta.

1 Juan 5:2

Baw ituytu i ikasiguru ta nga pagrarasan tami i kumpur bilang ipiyanganak it Ampuꞌang Diyus, itu nga pagmaꞌalen tami i Ampuꞌang Diyus ngaytu baw pagsunudun tami i kumpur ipiyagꞌurdin ya.

1 Juan 5:20

Baw talagang magkaꞌrutan ta nga limnampud na situt aten i Anak it Ampuꞌang Diyus, baw binggayan ya na kita it ipagkasepsep, isaꞌun makilalaan tami nga banar i matuud nga Ampuꞌang Diyus. Kayti magpakiꞌuyun tami na it Ampuꞌang Diyus sabap maglalagpit ta nat Anak ya nga si Jesu-Cristo. Yay matuud, si Jesu-Cristo ngaytu, kanya talagay matuud nga Ampuꞌang Diyus nga puꞌun it kaꞌgenang egay kaskedan.

2 Juan 1:6

Ituy magpamatuud nga may pagmaꞌal tat Ampuꞌang Diyus, itu nga magpangaꞌgenan tami uyun kat ipiyagꞌurdin ya. Ta ituytu i ipiyagꞌurdin ya ngayan it tagnaꞌ, nga mangaꞌgenan tami it magsigraa-rarasen.

Mga Ipiyalteg 12:17

Ta, kat kadakulaꞌ it iseg it dragon it babay ngayti, paꞌugadan ya nga giraen i beken nga mga tungtung-inapuꞌ it babay ngayti. Itung mga taw, sira nga mamagsunud nga banar it kaꞌirgan it Ampuꞌang Diyus baw ega mamagpangindiꞌ kat kamatuudan nga ipiyatantu it Ampuꞌan nga si Jesus.

Mga Ipiyalteg 14:12

Aypaꞌ it atkayan i mabetangan nira ngayti, kaꞌilangan talaga nga kumpur mga taawan it Ampuꞌang Diyus nga mamagsunud it kaꞌirgan ya baw magpamayaꞌ nat ki Jesus, kaꞌilangan nga teꞌteꞌan nira kanya maski ikagtas nat ginawa nira.