1 Juan 2:18 - Tagbanwa

¹⁸ Mga bilang anak ku, adeꞌdeng nay kaskedan ngaytu, nga umur it banwa. Nagnegan mi na nga may mabut nga kakuntraꞌ ni Cristo. Baw maski kayti ngaytu, dakel i magpakikuntraꞌ it ki Cristo ngaytu, aypaꞌ urut tami na nga talagang adeꞌdeng nay umur it banwa.

1 Juan 2:18 Iomraidhean Croise

Mateo 24:11

Dakel nayan i manluꞌsut nga magpapru-prupitaꞌ. Dakel nayan i teꞌag-teꞌagen nira nga pamayaꞌ it mga taw.

Mateo 24:24

Sabap dakel talaga yan i mangambuꞌ it Cristo na kanya, baw may manluꞌsut payan nga magpapru-prupitaꞌ. Palteg sira it mga tandaꞌanan baw muwat sira it mga kalililuꞌan nga mga bagay, isaꞌun nga in mapakay lamang, mateꞌag-teꞌag niray pati mga piniliꞌ it Ampuꞌang Diyus.

Mateo 24:5

Sabap dakel yan nga mabut nga mangambuꞌ it ngaran ku, nga maat yan, ‘Aku na ngaytu baytu i Cristo ngayan nga siyarigan it Ampuꞌang Diyus.’ Talagang dakel yan i mateꞌag-teꞌag nira.

Marcos 13:6

Sabap dakel yan nga mabut nga mangambuꞌ it ngaran ku, nga maat yan, ‘Aku na ngaytu baytu i Cristo ngayang paꞌaaten.’ Talagang dakel yan i mateꞌag-teꞌag nira.

Juan 21:5

Piyataꞌwagan sira ni Jesus, maat ya, “Mga Anak, daꞌga egay napisiꞌ mi nga sedaꞌ?” Nagdenga-denganen i tubag nira nga magꞌaat, “Daꞌga bay napisiꞌ namen.”

Roma 13:11

Sana paꞌresan mi i kararas ngaytu, subraꞌ na it urut mi na nga aldaw-aldaw magꞌadeꞌdeng-magꞌadeꞌdeng nay pamaꞌuliꞌ ni Cristo, iyan timpu nga ipagtuman it kakumplituwan it karibriyan tami nga muꞌsa. Aypaꞌ ayaw kamut pasbung it mga taw nga maꞌlek pang maꞌlek i igaꞌ, in daꞌga magsusulag kamu na.

Roma 13:12

Ka in ipaꞌalimbawa tat aldaw baw delem i kaꞌlay it banwa, kayti ngaytung timpu, subuk magkukuꞌ-aldaw na. In maꞌbut nay kakumplituwan it karibriyan ta, yay subuk aldaw na nga banar. Aypaꞌ, kaꞌilangan, paꞌalaidan tami na i muꞌsang karaꞌe-raꞌetan, ka yanay buwat it banwa it timpu pat delemen nga ega paꞌ limnampud si Cristo. Kayti ngaytu, it naꞌyagan tami na, yanay paꞌresan tami nga buwaten, purus magagayen, ka yay subuk kalasag tat buwat ni Satanas.

Hebreo 1:2

Temed kayti, kat aten na ngaytu nga timpu, mismu Anak ya na i magtataban it ampang ya nga miyabut situt aten. Anak ya ngaytu i ipiyatindeg ya nga tumagpuꞌun it muꞌsang bagay baw egay beken nga piyaguna yat muꞌsang mga paryaman nga magkaltegan ta in daꞌga Anak ya naga ngaytu.

1 Pedro 1:20

Talagang garing it ega paꞌ giyuna i banwa, ipiyasiguru kanya naytung lagi it Ampuꞌang Diyus kat itu nga buwaten ya nga panribri. Temed it yapaytung timpu ta na ngaytuy ipiyagꞌabut ya situt banwa kat ikaribri tami.

1 Pedro 1:5

Ta sabap it pagsarig baw pamayaꞌ mi it kanya, pagtatarimaen kamu nga pirmi kat guna it Ampuꞌang Diyus, mintras pagꞌeꞌlaten mi i karibriyan nga tumanen ya baw itanyag asan it umur nat banwa.

1 Pedro 4:7

Magꞌadeꞌdeng nay umur it banwa. Aypaꞌ kaꞌilangan, magpakanakem kamu baw pagsupilen mi i sadili mi, isaꞌun kapaꞌres kamu kat panalangin mi.

2 Pedro 2:1

Temed maski tagnaꞌ ngayti, may mga nagpapru-prupitaꞌ duꞌut mga Israelita. Ta kayti, atkayan naga, asat imyu may limiꞌwan gasiꞌ nga maat manigpangadal. Temed pangadal nira, panlibeg it pikiran mi, nga ikaranggaꞌ it pamayaꞌ, ka talagang alaid kat kamatuudan. Talagang pagdaꞌgaen nira i pamegbeg ni Jesu-Cristo, kanya nga subuk miyalang it kanira isaꞌun kanya nang taawan. Ka ega pagkilalaen nira nga Agalen nira nga dapat sirbiyan. Temed ta, talagang egay pagduwa-duwa nga abutun sira it panriga.

2 Pedro 3:3

Uꞌnat muꞌsa nga kaꞌilangan mi nga maꞌrutan, in magdadarapaꞌ nay umur it banwa, abutun kamu it mga mamagsumbayaꞌ it sadiling kaꞌirgan nga maraꞌe-raꞌet, baw buwaten nira na kamu nga kasesleman sabap it pamayaꞌ mi.

1 Juan 2:22

Siyu i paꞌaaten ngaytung maꞌambut, in daꞌga iyan magpaliꞌwan nga si Jesus, ega kanyay Cristo ngayting Manriribring Adiꞌ nga isiyanggup it Ampuꞌang Diyus? Atkaytu nga taw i paꞌaaten nga kakuntraꞌ ni Cristo ngayti, kanya nga magpandaꞌga it Diyus Amaꞌ baw Anak ya nga si Jesu-Cristo.

1 Juan 4:1

Mga pagmaꞌalen ku, ega basta-basta pamayaꞌnen mi i magꞌaat nga, “Ampang ku ngaytu, garing duꞌun it Espiritu Santo, ka ipiyanakem yat aken.” Kaꞌilangan niidan baw ineꞌteꞌen mi daꞌan, isaꞌun masiguru mi nga garing nga matuud duꞌun it Ampuꞌang Diyus i inampang ya ngayan. Sabap kayti, dakel nay mga magpapru-prupitaꞌ nga magpangadal nat katataawan situt sinirungat langit.

1 Juan 4:3

Temed iyan magpaliꞌwan nga ega nagbalyung taw nga banar si Jesus, siguradung ega yan Espiritu Santo it Ampuꞌang Diyus i magpanakem it ampangen ya. In daꞌga, yay matuud, panakem yan it kakuntraꞌ ngaytu ni Cristo, kanya nga ipiyagꞌaat ngayan it imyu nga mabut. Baw maski kayti, situ nat banwa ngaytu i atkaytung pakikuntraꞌ it ki Cristo.

2 Juan 1:7

Yay matuud, talagang lekep i banwa ngaytu it mga manigpaneꞌag-teꞌag it pamayaꞌ, iyan mga taw nga ega magpakimatuud nga si Jesu-Cristo, talagang nagbalyu kanya nga taw. Iyan atkayang mga taw, sira na ngayan i mga manigpaneꞌag-teꞌag baw kakuntraꞌ ni Cristo.

Judas 1:18

Ka daꞌga baꞌ ipiyagꞌaat nirat imyu, “Siguradu yan, nga in magdadarapaꞌ nay umur it banwa, may manluꞌsut nayan nga mga mamagsumbayaꞌ it sadiling kaꞌirgan nga kuntraꞌ kat kaꞌirgan it Ampuꞌang Diyus. Baw buwaten nira na kamu nga kasesleman sabap it pamayaꞌ mi.”