1 Juan 2:16 - Tagbanwa

¹⁶ Sabap muꞌsang karaꞌe-raꞌetan situt sinirungat langit, kuntraꞌ talaga it Ampuꞌang Diyus. Subung it adat nga pagsumbayaꞌen i sadiling kaꞌirgan nga maraꞌe-raꞌet, adat nga kupisiꞌen nay muꞌsang bagay nga magkaltegan, baw adat nga ipagpalandi-landi i mga bagay kat pangaꞌgenan ta. Ega yan garing duꞌut Diyus Amaꞌ i itung mga adat, in daꞌga garing situt sinirungat langit.

1 Juan 2:16 Iomraidhean Croise

Genesis 3:6

Ta, it namuyaan it babay ngayti nga palan magayeng kaꞌnen i buwaꞌ it iting kayu, ka magaye-gayeng pagletganan, baw iti na ngayti, mapisiꞌan it ega basta-bastang kasepsep, miyuꞌpuꞌ na kanya ka kimnaꞌen na. Binggayan ya gasiꞌ i iba ya ngayting lalaki nga minlep duꞌut kanya. Pagkabgay it kanya, kiyaꞌen ya na gasiꞌ.

Genesis 6:2

Paribasay mga daraga i mga babay ngayti nga anak it taw, naꞌirgan it mga anak it Ampuꞌang Diyus. Egay beken, siyari nira nat asawa i kanya-kanyang naꞌigut mata.

Daniel 4:30

Maat ku, ‘Talagang mabantug i siyudad ngaytu, nga puꞌun nga siyudad it Babilonia. Akuy nagpatindeg kaytu kat ega basta-bastang keseg ku, baw binwat ku nga bagay talaga nga mataꞌidan it adiꞌ, baw arandeman it kadakulat kabantugan it pagkaꞌadiꞌ ku.’

Mateo 4:8

Pagkamuya siꞌ ni Satanas kayti, duꞌun siꞌ it siyagpawan it esang bukid nga abwatay nga banar i tiyabanan yat ki Jesus. Bawnga ipiyalawag yat kanya i muꞌsa nga mga kaꞌadiꞌan it banwa baw kabantugan nira.

Mateo 5:28

Temed kayti, aku na i magꞌaat it imyu, in siyu-siyuy panenyekan yat esang babay may antap it nakem ya, subung it napakunan ya na.

Lucas 4:5

Esa gasing binwat ni Satanas, piyabayaꞌ ya si Jesus duꞌut esang abwatay nga bukid. Bawnga ipiyalawag yat kanya it sang patiklib i muꞌsa nga mga kaꞌadiꞌan situt sinirungat langit.

Roma 13:14

Kaꞌilangan, kat muꞌsang bagay, patibayaꞌ kamung pirmi it Ampuꞌan nga si Jesu-Cristo, isaꞌun yanay maltegan kat pangaꞌgenan mi, kanya nang adat. Ega na sumbayaꞌen i sadiling kaꞌirgan nga maraꞌe-raꞌet u begayan pat rugar kat pikiran mi.

1 Corinto 10:6

Iyan mga nagꞌabut ngaytu nga atkaytu, paꞌimbandaytu it aten isaꞌun ega ipadaꞌeg kat nakem tami i pagsumbayaꞌ it mga bagay nga maraꞌe-raꞌet, subung it siyari nirat buwat.

Galacia 5:17

Sabap iyan mga singkadan tang kaꞌiꞌirgan nga maraꞌe-raꞌet baw mga kaꞌiꞌirgan nga ipagpanakem it Espiritu Santo it aten, magkukuntraꞌ sira nga pirmi. Talagang nagkalaban tu i duwa ngaytu. Aypaꞌ ka iyan mga kubwaten ta, ega naga magkatabusan.

Galacia 5:24

Iyan mga maglalagpit it ki Cristo Jesus, subuk naꞌimatay na nira i singkadan nirang kaꞌiꞌirgan nga maraꞌe-raꞌet baw mga kaꞌiꞌirgan nirang maraꞌway.

Efeso 2:3

Yay matuud, tagnaꞌ, atkayan nagay adat tami nga muꞌsa ka pagsunudun lamang i singkadan tang adat nga maraꞌe-raꞌet. Pagsumbayaꞌen i maraꞌe-raꞌet nga kaꞌirgan it bilug baw in unu nga kat pikiran. Aypaꞌ kat adat tami ngayti it tagnaꞌ, kaꞌuyutan tami talaga kat mga taw nga rigaen it Ampuꞌang Diyus, ka egay beken nga tumbas it aten nga taw nga makasalaꞌan.

Tito 2:12

Ta ildaw ngaytut Ampuꞌang Diyus i magpatantu it aten nga kaꞌilangan indiꞌan tay maski unu nga kuntraꞌ it kaꞌirgan ya. Kaꞌilangan indiꞌan tay mga kaꞌiꞌirgan nga ega magayen nga pagsumbayaꞌen it mga ega namayaꞌ. Ipagpatantu ya gasit aten nga kaꞌilangan pagsupilen tami i sadili ta, nga mangaꞌgenan tami it mataldeng, nga uyun nga pirmi kat kaꞌirgan it Ampuꞌang Diyus mintras situ tami paꞌ it sinirungat langit.

Tito 3:3

Dedemdemen mu nga katꞌesa, pati kita nga magpamayaꞌ na, kurang tami pat kasepsep, masusutil, baw nateꞌag-teꞌag pasar it dalan it kamatuudan. Kat iting timpu pagꞌuꞌuripnen tami pat mga maraꞌe-raꞌet nga kaꞌirgan it bilug tami nga pagsumbayaꞌen ta. Tagnang mga adat tami, mapiyanggated it masigkataw baw maꞌinggit. Pagꞌisgan tami it beken. Sira, pagꞌisgan tami gasiꞌ.

Santiago 3:15

Ka basta atkayan i kat nakem mi, kasepsep mi ngayan nga paꞌaaten, ega garing duꞌun it Ampuꞌang Diyus, in daꞌga pasepsep it taw lamang. Egaytu begay it Espiritu Santo, in daꞌga si Satanas i garing.

Santiago 4:16

Temed ta, malandi-landi kamu na baw mapiyasubraꞌ na it Ampuꞌang Diyus. Ega yan talaga magkapakay ya i atkayan ngayan.

Josue 7:21

Sabap kat mga bagay nga narangpas ku duꞌun it Jerico nga maat antengen, may naltegan ku nga talagang piyakamagayeng gulamen nga garing duꞌun it Babilonia. Baw may walung kilu i pirak baw sang turung i bulawan nga siguru adeꞌdeng it duwang kilu i beꞌgat ya. Pinsiꞌ kuy mga iti ngayti bawnga ilimbeng ku na duꞌun it pagbabala-balayan ku ngayti. Ipiyabuliꞌ ku i pirak ngayti.”

1 Pedro 1:14

Paribasay mga anak tami na it Ampuꞌang Diyus, kaꞌilangan, pasbung tami na it mangaꞌwaꞌ nga masunud nga banar it Amaꞌ nira. Ega na pasegsegen mi i mga maraꞌe-raꞌet nga kaꞌirgan nga pamagsumbayaꞌen mi ngayan katꞌesa nga ega pay uru-urut mi pasar it Ampuꞌang Diyus.

1 Pedro 2:11

Mga pagmaꞌalen ku, demdemen mi nga bilang mga dumadayuꞌ kamu lamang situt banwa, ka langit i pagpapaꞌbutun mi, nga yanay banwa mi. Aypaꞌ paꞌalaidan mi nay mga maraꞌe-raꞌet nga kaꞌirgan it bilug, ka magꞌindaꞌeg yan it pamayaꞌ mi it Ampuꞌan.

2 Pedro 2:10

Subrang ipagꞌareg ya i iyan mga magsumbayaꞌ it mararaꞌway nga kaꞌirgan it bilug baw iyan mga masusutil nga ega magkilala it mga magpupudir. Ta, mga paꞌaaten ku ngaytu nga manigpangadal it kaꞌambutan, talagang pangaasen sira nga ega magkaꞌrut it eyaꞌ baw ipagpadaꞌeg nira i sadili nga kakayaan. Egay galang nira it maski mga matataꞌas nga banar i kabantugan. Maꞌunu galangen nira, pagtibabaꞌen nira ga.

2 Pedro 2:18

Pasubraꞌ i dakulaꞌ kat mga pangangampangan nira. Temed ta, ega yay kapulusan it pamagsugiden nira. In daꞌga pandayaꞌ nira lamang it mga baꞌgung namayaꞌ it Ampuꞌan, nga ega paꞌ nakasepsep nga banar it kaꞌirgan ya. Sabap ipagpakursud nira i mga baꞌgu ngayting namayaꞌ nga paꞌuliꞌan i pangaꞌgenan nga kamaliꞌ, nga sumarit sumbayaꞌ it maraꞌway nga kaꞌiꞌirgan it bilug it egay maski unu nga pagsupil it sadili.