1 Juan 1:3 - Tagbanwa

³ Ipagpamatuud namen it imyu i naltegan namen baw nagnegan ngaytu, isaꞌun makapakiꞌiba-iba kamu gasit amen. Baw ega lamang iyan, in daꞌga sang tamiyan nay magpakiꞌiba-iba it Diyus Amaꞌ baw Anak ya nga si Jesu-Cristo.

1 Juan 1:3 Iomraidhean Croise

Juan 17:11

Daꞌku na maꞌlay sinit sinirungat langit, ka muliꞌ aku na asat imu. Temed sira, sini pat banwa ngayni. Amaꞌ nga alaid kat muꞌsang kasalaꞌan, tatarimaen mu sira kat keseg it guna baw kabantugan mu nga itanyag mu sinit aken. Tatarimaen mu sira isaꞌun urunyun sirang pirmi, subung nagat aten.

Juan 17:21

isaꞌun magꞌurunyun sirang muꞌsa. Subung nagat aten, Amaꞌ, nga nagꞌuyun ta nga banar, ikaw sinit aken, aku asat imu, sang kagina-ginawaan ta lamang. Pagꞌangutun ku nga urunyun sira kat kaꞌirgan mu, isaꞌun sira baw kita, subuk sang kabilu-bilugan na. Pagꞌangutun kuytu isaꞌun pamayaꞌnen it mga katataawan nga ikaw i nagtaꞌeg it aken.

Juan 17:25

Amaꞌ ku nga mataldeng talaga, daꞌka pagkilalaen it kadaklan sinit banwa ngayni, temed aku, pagkilalaen ku talaga ikaw. Baw mga kaꞌibaan ku ngayni, naꞌrutan na nira nga ikaw i nagtaꞌeg it aken.

Juan 17:3

Ituy mapisiꞌan nirat kaꞌgenang egay kaskedan, kamatuudang pagkilala nira it imu nga esa-esang matuud nga Ampuꞌang Diyus baw aku nga si Jesu-Cristo gasiꞌ nga tiyaꞌeg mu.

Juan 19:35

Iyan nakalteg kaytu i magpamatuud isaꞌun mamayaꞌ kamung banar. Matuud tuy ipagpamatuud ya ngaytu. Talagang magkaꞌrutan ya nga kamatuudan i ipagsugid ya ngaytu.

Mga Binwat 13:32

Ta, kayti, taban namen situt imyu i Magayen ngaytung Baritaꞌ pasar it sanggup it Ampuꞌang Diyus duꞌun it mga kiyaꞌapuꞌ-apuꞌan tami nga mga Judio.

Mga Binwat 13:41

nga magꞌaat, ‘Pagnegan mi tu, kamung mga mapiyanibabaꞌ. Talagang maliluꞌan mi i mabut it imyu nga ikaꞌilang mi. Sabap may buwaten ku kat timpu mi nga maski iꞌunu-unu pat tuturan it imyu i buwaten ku ngaytu, ega pakimatuudun mi.’”

Mga Binwat 2:42

Baw muꞌsa sira ngayti, talagang pagpaꞌresan niray ipagpanulduꞌ it mga apustul baw pirmi sira nga mamagtingped. Magsagpu-sagpunun paꞌ sira it pangaꞌen nga uyut i pagbuwateng Apunan baw pirmi gasiꞌ nga magpanalangin.

Mga Binwat 20:27

Ka ega nay ipiyaꞌped ku. Ipiyagsugid ku nat imyu i muꞌsang pabetang-betang it Ampuꞌang Diyus nga ireg ya nga maꞌrutan it taw.

Mga Binwat 4:20

Kami ngaytu, maꞌyag it amen in ari kaꞌilangan nameng buwaten, ka ega mapakay nga ega ipanuturan namen i kumpur naltegan nameng binwat ni Jesus baw muꞌsang ipiyanulduꞌ yat amen.”

Roma 15:27

Yay matuud masasagya sira kat napagꞌupa-upakan nira ngaytu nga ituꞌun ka subuk dakulang pagdemdemen nira nga utang nga nakem kat mga Judio nga magpasakep nat ki Cristo. Ka sabap it mga Judio ngaytu nabagiꞌan na sirat karibriyan. Aypaꞌ it magkakuriꞌan nay mga Judio ngaytu, ega mapakay nga ega bagiꞌan sirat in unu nga ikatabang it mga sulsug nira ngaytu kat pamayaꞌ nga ega Judio.

1 Corinto 1:30

Maski kita, talagang garing duꞌut Ampuꞌang Diyus i magpakilagpit ta ngaytu it ki Cristo Jesus. Baw si Cristo Jesus ngaytu i binwat it Ampuꞌang Diyus nga ikakilala tami it kamatuudan nga kasepsep, nga kasepsep ngaytu nga paꞌaaten, mataldeng tami na kat panleteg it Ampuꞌang Diyus, ka ipiyagribri ta na kat panguripen it kasalaꞌan it aten, isaꞌun mangaꞌgenan tami na nga alaid kat muꞌsang kasalaꞌan.

1 Corinto 1:9

Talagang magkasiguru mi nga buwaten it Ampuꞌang Diyus i muꞌsa ngaytu, kanya nga nagpanakem it imyu nga pakilagpit it Anak ya nga si Jesu-Cristo nga Ampuꞌan tami.

1 Corinto 15:1

Ta kayti ipagpamatuud ku siꞌ it imyu, mga sulsug ku kat pamayaꞌ, i Magayen ngaytung Baritaꞌ nga ipiyangadal ku asat imyu it tagnaꞌ, nga piyakimatuud mi baw inunayan mi nat pamayaꞌ mi.

Efeso 3:6

Ta, ituytu i pabetang-betang ngaytung paꞌaaten, nga iyan mga taw nga ega Judio, kat pagtanggap nirat Magayen ngaytung Baritaꞌ, kasbung na sirat mga Judio nga may kabagiꞌan nat ildaw ngaytung subray basta nga garing duꞌut Ampuꞌang Diyus. Kakabit gasiꞌ sira it sang kabilu-bilugan nga bilug ni Cristo Jesus, baw sabap it pakilagpit nirat kanya, sira gasiꞌ i tumanggap it muꞌsang isiyanggup it Ampuꞌang Diyus nga kagayenan.

Filipos 1:7

Simpri, atkayan i pabetang kut imyu sabap talagang pagmaꞌalen ku kamu nga banar. Sabap kat kabetangan ku ngayni nga pagpipirisuun, baw kat buwat ta ngaytu nga magpanindeg baw magpamatuud it Magayeng Baritaꞌ, surubung tami nga pagtabangen it ildaw it Ampuꞌang Diyus. Baw pagbagiꞌan mi aku it tabang nga ipagꞌildaw yat imyu.

Filipos 2:1

Ta unu, pakilagpit mit ki Cristo, magkabgay it imyu it pagkesgan it nakem mi? Unu, magkapasagya it imyu i kadakulat raras ya ngaytu? Unu, pagsasaruman baw pagtabangen kamu na nga matuud it Espiritu Santo? Unu, magkaꞌildaw kamu, nga may magpangbit na kat nakem mi nga kutabang kamu it beken?

Filipos 3:10

Talagang iyan nay pagꞌabaten ku kayti, makilalaan ku pang banar si Cristo, baw malabayan ku kat pangaꞌgenan ku i keseg it guna nga magpanggaring duꞌut kanya sabap it inggen kanya it paꞌuliꞌ. Ireg ku talaga nga makaꞌuyut aku it mga kakuriꞌan nga nalabayan ni Cristo, baw subuk makaꞌuyut aku gasiꞌ it kamataynen ya ka magpasbung akut kanya kat pagsunud yat kaꞌirgan it Ampuꞌang Diyus.

Colosas 1:13

Ka ipiyagribri ya na kita kat pagsakep it kadleman, baw ipiyagꞌugad ya na kita kat pagsakep it pagmaꞌa-maꞌalen ya nga Anak.

1 Tesalonica 1:10

Maat paꞌ nira, pagꞌelaten mit maseked-seked i pamaꞌuliꞌ it Anak ya nga si Jesus, kanya ngaytu nga inggen ya it paꞌuliꞌ. Paꞌuliꞌ kanya nga matuud nga garing duꞌun it langit, baw sabap it panribri ya it aten, ega na malabayan tami i magꞌaꞌabut nga iseg it Ampuꞌang Diyus.

1 Timoteo 6:2

Baw iyan mga uripen nga kasubung ya nang magpamayaꞌ it Ampuꞌang Diyus i agalen ya, ega naga pikiren ya nga maski ega galangen yay agalen ya ngayti, tutal nasulsug ya na kat pamayaꞌ. In daꞌga gayen-gayenen ya nang pagsirbi, sabap pagsirbiyan ya ngaytu, subung ya na nga magpamayaꞌ aypaꞌ may raras ya nat kanya. Itulduꞌ muy itu ngaytu baw iꞌaat mut kanira nga kaꞌilangan nga sunudun.

Hebreo 2:12

Ka magꞌaat i ipiyasurat yat tagnaꞌ, “Talagang ituturan kut mga sulsug ku i kagayen mu. Kat piyagꞌada-adapan it kadaklan it taw nga magsamba it imu kumantaꞌ aku it pagbantug kut imu.”

Hebreo 3:1

Aypaꞌ kayti, mga kasulsugan ku nga subung nat ipiyapinpin it Ampuꞌang Diyus, kamu nga ipiyabetang-betang ya nga makaꞌistar duꞌut langit kat pagdadarapaꞌen, magayen in panawun it pikir mi si Jesus ngaytu. Kat kamatuudan nga pagpamayaꞌnen tami, kanya i ipiyaꞌasitu it Ampuꞌang Diyus, baw kanya i Piyakamataꞌas nga Sasirduti nga magpanindeg it aten.

Hebreo 3:14

Sabap, kita ngaytu, kaꞌiba-iba na ni Cristo basta seked it umur, maneꞌteꞌ nga mapaꞌgen i kasiguruwan ta nga kamatuudan i mga bagay pasar it ki Cristo ngaytu nga pagpamayaꞌnen ta garing it tagnaꞌ paꞌ.

1 Pedro 5:1

Ta kayti, kamu nga mga magpamaalaꞌ it mga magpamayaꞌ asan it imyung rugar, may ireg ku nga sugiden it imyu. Ka aku, esa gasing manigpamaalaꞌ, baw manigpamatuud sabap it mga kakuriꞌan nga nalabayan ni Cristo nga nagpasar kat mata ku. Esa aku nagang may kaꞌuyutan it kagayenan ya nga ipatanyag ya kat pagdadarapaꞌen.

2 Pedro 1:16

Iyan ipiyangadal namen it imyu i pasar it guna baw pamaꞌuliꞌ situ it Ampuꞌan tami nga si Jesu-Cristo, egaytu maat tuturan-manuturan nga biyuwat-buwat lamang. Talagang matuud tu, nga nagpasar kat mata namen i kabantug ya.

1 Juan 1:1

Pagsuratan ku kamu pasar it ki Jesu-Cristo, kanya nga pagpangaranat Ampang nga magbegay it kaꞌgenan nga egay kaskedan. May kanya naytung lagi it tagnaꞌ paꞌ, iyan ega pay banwa. Baw kami nga mga alagad ya, talagang nagnegan namen i mga ampang ya, baw talagang naltegan namen kanya. Naꞌeket-eket namen baw naꞌipuꞌ it alima namen.

1 Juan 1:5

Ituytu i ampang ngayan nga nagnegan namen duꞌun it Anak it Ampuꞌang Diyus nga ipagsugid namen it imyu. Iyan Ampuꞌang Diyus, kabilangan ya, maꞌyag nga tidaw. Egay maski unu nga madlem duꞌun it kanya.

1 Juan 1:7

Temed in pirmi ta nga magpangaꞌgenan uyun kat kaꞌyagan, nga alaid kat kasalaꞌan, subung nagat Ampuꞌang Diyus, nga kanya, purus kat kaꞌyagan talaga, magayen talagay pakiꞌiba-iba tami nga magpamayaꞌ it kanya. Baw iyan timnuruꞌ nga duguꞌ ni Jesus nga Anak ya, paglimpiyuꞌun ya kita, ka pagꞌawaꞌen yay muꞌsang kasalaꞌan ta.