Mateo 13:23 - Nuevo Testamento Toba Sur

²³ Qalaxayi aso nanguishi mayi tajlec so no'on 'alhua, asomayi naigui nam shiÿaxauapi mayi n'axaÿaxana da n'aqtac, qalaq ÿataqta ÿaÿateeteguet, qaq ÿataqta no'on da alaÿaxac da qanqat. Huo'o na 'eeta'am aca nanguishi mayi ivi' ana cien ana ala, qataq huo'o ana ivi' ana sesenta, qataq huo'o ana ivi' ana treinta.

Nuevo Testamento Toba Sombrero Negro

²³ Qalaĝaja jaga'me nepeta jo'ne onaĝaic ga'me aleua da'me danaĝalegue yelo'tegueta gaa'me jo'ne domachita da'me 'naqataĝanaĝac qama'le yayate'n nataq'aen onaĝaic ga'me jalayaĝac 'me chiyaqayi, ena'am jaga'me laqata qom chiyaqayi cien jaga'me jala, sesenta uotaĝa treinta jaga'me jala 'me chiyaqayi onole nepeta.”

La'aqtaqa Ñim Lo'onatac 'Enauacna 2013

²³ Qaq aso pa'atec nañiguishe ala maye tatelec so no'on 'alhua, asomaye naigui nam shiỹaxauapi maye na'axaỹaxana da na'aqtac qataq ỹataqta ỹaỹateeteguet. Qaq namayepi ỹataqta naralaxat da lataxac qataq ỹo'ot ca ỹaỹamaqchiguiñi. Namayepi 'eeta'am asa'aso nañiguishe ala da huo'o ana ivi' cien ana ala, qataq huo'o ana ivi' ana sesenta, qataq huo'o ana ivi' ana treinta.

Mateo 13:23 Iomraidhean Croise

Mateo 12:33

Aca qo'ipaq da huo'otaq no'on, nachi ÿataqta no'on da alaÿaxac. Qataq aca qo'ipaq da huo'otaq qauem, qaq nataq'en qauem ana ala. Qaq ÿoqo'oyi aca qo'ipaq maichi qaÿauatton da alaÿaxac.

Mateo 13:8

Qalaxayi aso lÿa languishi tajlec som 'onaxaic 'alhua, nachi ÿataqta 'onaxaic da alaÿaxac co'ollaq qanqat. Huo'o ana ivi' ana cien ana ala, qataq huo'o ana ivi' ana sesenta, qataq huo'o ana ivi' ana treinta co'ollaq qanqat.

Mateo 3:10

Aca qachipe mashi sogote imetai' da iquesoxoñot ana qo'ipaqpi. Qaq 'enauac anam qo'ipaqpi mayi sa ishit da no'on ana ala, nachi anamayi qaiquesoqot. Ime, qaq qaÿasaxangui ca nodec.

Mateo 3:8

Ÿataqta qanachaxañiita qome, yaqto' ishit da qaila'a da 'eesa da qami' qai'axañiideec naua qan'onataxacolli'.

Marcos 10:15

Qaq ÿataqta 'eesa de'eda qami' sa'axatema, da ca sa ishit da i'enaxat ca nogotolec da ÿaconguet da l'onataxanaxac ñi Dios da ilo'ogue 'enauacna, nachi camayi sa ishit da inoxoneuo.

Marcos 4:20

Qalaxayi huo'o na hua'axaÿa da n'aqtac, nachi ÿaconguet, nachi ÿataqta huo'o da alaÿaxac, 'eeta'am aso nanguishi mayi tajlec so no'on 'alhua. Huo'o na 'eeta'am aso nanguishi mayi ivi' ana treinta ana alapi añi 'oonole, qataq huo'o ana ivi' sesenta, qataq cien.

Lucas 13:9

Qaq souaxai' ishit da huo'o aca ala adamayi. Qaq qom huo'otaq sa ishit da huo'o, qaq ishit qome da qaiquesoq.”

Lucas 8:15

Qaq asom nanguishi mayi tajlec som no'on 'alhua, qalaq naigui ca shiÿaxaua mayi no'on da lquiyaqteÿaxac, qataq lhuotta da n'axaÿaxan, qataq ÿalaxaguet da n'aqtac, qataq quetelec. Sa ishit da qoshiuec, qataq ÿataqta huo'o da alaÿaxac.

Lucas 8:8

Qaq aso lÿa nanguishi tajlec so ÿataqta no'on 'alhua. Qaq co'ollaq ñaxat, nachi ÿataqta qalota ana ala. Huo'o ana ivi' ana cien ana ala co'ollaq qanqat. Qaq co'ollaq ime da l'aqtac, nachi ÿataqta nlamaxaden, 'eeta': –Qami' qom qauaÿajñi da qan'axaÿaxanaxaqui, qaq no'on da qan'axaÿaxañiichiguiñi.

Juan 15:16

Qami' sa ishit co'ollaxa da aÿim qalca'aguishiqui, aÿim mayi qami' llica'agui'shi. Nachi qami' shinapegalo da yaqto' ÿataqta qalota da alaÿaxac da qanachaalataxaqui, qaq de'eda alaÿaxac da qanachaalataxaqui, damayi nachi 'eetai'. Qaq yaqto' ñi ita'a qami' ÿanema 'enauac nam qauÿaxañiÿaique da huo'otaq qoviilec da i'enaxat.

Juan 8:47

Ca chigoqtot ñi Dios, camayi n'axaÿaxanalo naua l'aqtaqa ñimayi. Qalaxayi qami' yi sa ishit da qauachigoqoitot ñimayi, ÿoqo'oyi sa ishit da qan'axaÿaxañi.

Hechos 16:14

Qaq huo'o aso 'oonole 'alo, l'enaxat Lidia, chigaqa'ague co'ollaxa da la ciudad Tiatira. Qaq asomayi imeetac ana ÿataqta no'on npotoyic nauedalec na ltogaxa. Asá'aso 'alo nachi 'eetai' da quetague' ñi Dios. Nachi asomayi n'axaÿaxaatac, nachi so qadataxala' ÿauatoigui da lquiyaqteÿaxac da yaqto' ÿaconguet dam i'axattac so Pablo.

Hechos 17:11

Qaq se'eso judiopi ÿataqta qaica ca ÿictega da n'axaÿaxan, qaq sa ishit da 'en'am nam netaña yi Tesalónica. Cha'ayi namayipi ÿataqta nqopita da n'axaÿaxana da n'aqtac. Ÿoqo'oyi 'enauaque naua na'axa'tesa'chi qaichimaxatta'pe naua ñiyigui'shi l'aqtaqa ñi Dios da huo'otaq ÿoqta 'eesa de'eda qai'axattac.

2 Corintios 9:10

Ñim Dios mayi nachiñi ñi ÿan acam nanguishi qataq cam qanallic, ñimayi qami' ÿanema qome ca qaviñiitaique da yaqto' ishit da qanaxañi, qataq da ñaxat naq'en aca qodanguishii, ivitta'a da ÿataqta qalota naq'en ana ala, yaqto' da qanqat, qalaq qalota cam naigui nam ÿaÿamaqchiguiñi n'onataxanaxaguesat,

Filipenses 1:11

Qaq yaqto' so Jesucristo ÿataqta nlaxatchigui da qanachaalataxaqui ca no'on nataxac, da yaqto' huo'o da ñi'oxonnataguec qataq da lli'oxoyic ñi Dios.

Filipenses 4:17

Qalaxayi aÿim sa ishit da chaqdata da iuennataxa da saconguet aca ñitaunaqte. Cha'ayi chaqdata da aÿim ñishitaique da nquictashiguem da qad'onataxanaxaqui, da yaqto' qami' ishiite'n qome ñi Dios.

Colosenses 1:10

Qaq yaqto' qami' ishit da no'on da qadataxaqui, 'eeta'am da lataxac na quetague' so qadataxala', qataq yaqto' qau'ochiitac cam ÿaÿamaxadeeta somayi. Huaña, nachi huo'o da alaÿaxac 'enauac nam ÿaÿamaqchiguiñisat mayi qau'ochi, qataq qaviyiita'a da ÿataqta qauauattoñiita ñi Dios.

Colosenses 1:6

De'eda n'aqtac mayi qami' qai'axatema co'ollaxa, damayi ÿataqta nquictashiguem qataq huo'o da alaÿaxac 'enauaque naua 'ale'u, da 'eeta'am da qoñiita co'ollaq qan'axaÿaxañiÿa da lqouagaxanaqtaic ñi Dios, huaña, nachi qauaÿajñi da de'eda nqouagaxanaqtaic ÿataqta 'eesa.

1 Ts 4:1

Qaq nagui, qami' qadqaÿa't, qami' sedoxolguete da l'enaxat so qadataxala' Jesús da ñachoxodenaqtoto da qami' saqataxalo da qoquiitelec da lataxac dam qami' sapaxaguenaxaque achaalataxac mayi ÿaÿamaxadeeta ñi Dios. Nachida qome qoquiitot da qanqochiñiita'aguet.

2 Ts 2:10

Do'onataxana 'enauac na ÿotta'a't sa ÿaÿamaxañisat da chochi ÿatenachit na shiÿaxauapi mayi taÿa'a da nhuaxanaguec chochi tateec, cha'ayi mashi sa ishit da ÿaconguet da 'eesa lataxac mayi ishit da qanca'algui.

Hebreos 4:2

Cha'ayi qomi' nataq'en qomi' qai'axatema da n'aqtac mayi chigaqaigui da nca'alaxa, 'eeta'am da 'eetec somayipi da qai'aqtaxanem co'ollaxa. Qalaxayi somayipi sa ishit da huo'o ca naigui naq'en de'eda n'aqtaxanaxac, cha'ayi chochi n'axaÿaxaatega, sa ishit da i'amaqten.

Hebreos 6:7

Qaq namayipi 'eeta'am ca 'alhua mayi sa i'atai' da cañi naq'en na auot da talec. Qaq que'eca 'alhua, da huo'otaq ÿataqta no'on na ala na languishic cam do'onataxaatapeguelec, nachi camayi huo'o da nqouagaxa mayi chigoqo'ot ñi Dios.

Hebreos 8:10

Qaq cam ñaÿamaxataxac qom ñaÿamaxate' na llalaqpi so Israel qom mashi inoxoodeec que'ecaua na'axa'te, camayi qome ipacchigui da 'enapec ñi qadataxala', 'eeta': Aÿim qome sachaigui da lhuennataxac namayipi da ÿamaxasoxonaxac, qataq sedelguete naua lquiyaqte. Nachi namayipi aÿim lta'a Dios, qataq namayi maichi ÿalamaxatpi.

2 Pedro 3:18

Qalaxayi nquictashiguem qanqashiñi qome da qadauattonaxanaxaqui so qadataxala' qataq qadca'alaxaqui Jesucristo, qataq da nauotaxanaqtaic mayi chigoqo'ot somayi. Qaq nachi 'eetai' qome da chochaq tateec da ñi'oxonnataguec somayi. Qaq nachi 'eetai' qome da chochaq tateec da ñi'oxonnataguec somayi. Aja', nachi 'eetec.

1 Juan 5:20

Nataq'en qomi' saÿajnaq da so llalec ñi Dios, somayi anac da qomi' ÿanema da qadauattonaxanaxac, da yaqto' sauattonaqta ñim ÿoqta 'eesa Dios. Qaq ñi'adaqtau'a som llalec Jesucristo som ÿataqta 'eesa. Qaq 'eso som qadta'a Dios, qataq nachiso som chigoqo'ot da nca'alaxa mayi chochaq tateec.