Mateo 11:1 - Nuevo Testamento Toba Sur

¹ Qaq so Jesús co'ollaq imat da ÿanema soua doce lapaxaguenataqa da lqataxac, nachi ca'ai yi hueta'a, da yaqto' dapaxaguenataxaalguete qataq da'aqtaxaalguete naua lÿa't 'ale'u yi'iyi qanayiuta'a 'alhua.

Nuevo Testamento Toba Sombrero Negro

¹ Ca'li yem da'me dojo' laqataĝac ñe'me Jesús jo'ne yanema jogaa'me doce 'me lapaĝaguenataqa, qama'le ca'e di'me ue'ta qaedi quetayilo ena'uaque jogaa'me noyaqa 'me neda'ña di'me dijo' aleua, da'me dapaĝaguenataĝatac nataq'aen 'yaĝatetapema da'me 'laqataĝanaĝac ñe'me Dios.

La'aqtaqa Ñim Lo'onatac 'Enauacna 2013

¹ Qaq So Jesús co'ollaq imat da ỹanema soua doce lapaxaguenataqa da lqataxac, nache ca'ai ye hueta'a, da yaqto' dapaxaguenataxan qataq da'aqtaxanem da no'on na'axaỹaxac na shiỹaxauapi maye hueta'alo naua lỹa't 'aleu' yi'iye qanayeuta'a 'alhua.

Mateo 11:1 Iomraidhean Croise

Mateo 28:20

Qataq qauapaxaguiñiic qome namayipi da ÿalaxalec 'enauac na ÿaqataxacpi mayi qami' sanema. Qataq sa ishit qome da qaucouai'ai da aÿim nachi 'eetai' da qami' soota'agueta 'enauaque naua na'axa'te, chochi ivitta'a ca loga't ana 'alhua. Aja', nachi 'eetec de'eda.

Mateo 4:23

Nachi so Jesús coleetapeguelec 'enauac yi Galilea da dapaxaguenataxaatapoigui ana laponaxaquipi na judiopi yi'iyi 'alhua, i'axattac da no'on qad'axaÿaxac mayi i'axat da ñi Dios ilo'ogue 'enauacna, qataq natadeetac 'enauac na ÿotta'a't lalolaxaguesat na shiÿaxauapi.

Mateo 7:28

Qaq so Jesús co'ollaq imat da l'aqtaxanaxac, nachi so shiÿaxauapi ÿataqta huo'o da l'aalaxa, souaxat naua lapaxaguenataxanaxaco.

Mateo 9:35

So Jesús coleetapigui 'enauac nam pueblopi qataq nam nañalo nam saq 'amaqtaq shiÿaxauapi da dapaxaguenataxaatapoigui ana laponaxaqui na judiopi, i'axattac dam no'on qad'axaÿaxac mayi naigui da ilo'ogue 'enauacna ñim Dios, qataq natadeetac 'enauac nam ÿotta'a't lalolaxa qataq da nqui'ic na shiÿaxauapi.

Marcos 6:12

Nachi soomayi je'c, nachi da'aqtaxaadem na shiÿaxauapi, da yaqto' ÿaxaadeec naua n'onataxaco.

Lucas 23:5

Qalaxayi somayipi ÿi'iguelaxalec da l'aqtac ÿataqta n'axannec, 'eeta': –Namayi ÿasouaxattega't na shiÿaxauapi mayi netaña yi Judea, souaxat da lapaxaguenataxanaxac. Chigoqchiguiña yi Galilea, qaq nagui qataq nvitta'a ne'ena souaqta'a.

Lucas 8:1

Qaq co'ollaq mashi qaÿoqtegue de'eda, nachi so Jesús quetagui na pueblopi qataq nam naña nam saq 'amaqtaq shiÿaxauapiolec da da'aqtaxaatac, i'axattapeguem da no'on l'axaÿaxac mayi i'axat da ñi Dios ilo'ogue 'enauacna. Qaq nnaictagueto soua doce lapaxaguenataqa.

Juan 15:10

Qaq da qaualaqaiguet na ÿamaxasoxonaxacpi, nachi qami' ishit da qoquiitegue da 'eetec da qami' sauoteque, 'eeta'am da shiitec da ÿataqta salaxaguet na lamaxasoxonaxacpi ñi ita'a, qataq shictegue da 'eetec da lauotaxanaqtaic aÿim ñimayi.

Juan 15:14

Qaq qami' nachiqami' ñauochaxa'u, da qau'ochi dam qami' samaxalguete.

Hechos 1:2

chochi ivitta'a so na'a'q co'ollaq taigue da piguem. Qaq somayi co'ollaq saxanaxa da taigue da piguem, nachi lca'au'alo soua lamaxa'shi, nachi ÿapaxaguenque cam l'onataxanaxa'c, ÿachigoxotchigui naq'en so Espíritu Santo.

Hechos 10:38

Qataq qami' qauaÿajñiita da 'eetec ñi Dios da ÿanem co'ollaxa so Jesús mayi Nazaret l'ec da l'añaxac so Espíritu Santo, qataq da 'eetec co'ollaq somayi queuotac nachi i'otec da ÿaÿamaqchiguiñi 'enauac na shiÿaxauapi mayi huetaigui da lque'ejnataxanaxac so shiÿaxaua lma'na. Qaq i'ot de'eda, cha'ayi ñi Dios hueta'aguet somayi.

Hechos 10:42

Nachi somayi qomi' ÿamaxalguete da sa'aqtaxanaxam 'enauac na shiÿaxauapi, da sa'axataq da ñi Dios ÿanagui somayi da nachiso so nmit qome na lasouaxashitpi nam ña nca'altauecpi qataq nam mashi ileu.

1 Ts 4:2

Cha'ayi qami' mashi qauaÿajñi na qadqataxacpi mayi qami' sanaxama. Damayi sachigoxotoqo'ot so qadataxala' Jesús.

2 Ts 3:10

Cha'ayi co'ollaq qami' souaqta'agueta, qalaq qami' sanaxama de'eda lataxac da ca shiÿaxaua da sa do'onataxan, qaq mashi deque'ectoxo'.

2 Ts 3:6

Qami' qadqaÿa't, qami' saqataxalo, cha'ayi qomi' lamaxa'shi so qadataxala' Jesucristo, da sa ishit da qanhuoquiiteguet ca camachaqca qadqaÿa da sa ishit da do'onataxan, qataq lamaaxa da sa ishit da quetegue da qadapaxaguenataxanaxac mayi qami' sanaxama.

1 Timoteo 6:14

da 'aualaxalguete naua ÿaqataxaco. Ÿataqta sa ishit da 'auashaxaadeec, yaqto' sa ishit da qauem ca 'an'aqtaguec. Qataq qoquetot de'eda, chochi ivitta'a que'eca na'a'q qom ñi'iguelaq so qadataxala' Jesucristo.