Lucas 16:15 - Nuevo Testamento Toba Sur

¹⁵ Nachi so Jesús 'enapeco': –Qami' mayi nachiqami' chochi qanachaxañiitega 'enauac na shiÿaxauapi da qami' no'on, qalaxayi ñi Dios ÿauatto'n naua qadquiyaqchilli'. Cha'ayi cam ÿamata'ac nam shiÿaxauapi da 'eetega 'amaqtaqaic, qaq nachica cam ÿataqta ÿaÿimec ñi Dios.

Nuevo Testamento Toba Sombrero Negro

¹⁵ Qo'che' Jesús enapegalo jogaa'me: “Ami jo'ne aueñetapela't yataqata ami chimadichidiñe nale auajoyiya'agueta ga'me jiyaĝadipi, qalaĝaja Dios yayaten queda'me yataqachiñe ja 'noe'n naa'me adai'lidi'; qa'a ga'me yi'yoĝodetedac jena'me jiyaĝadipi, nach'ega 'yotan joñe'me Dios.

La'aqtaqa Ñim Lo'onatac 'Enauacna 2013

¹⁵ Nache So Jesús 'enapeco': «Qami' maye nacheqami' choche qanachaxañiitega 'enauac na shiỹaxauapi da qami' no'o'n, qalaxaye Ñim Lo'onatac 'Enauacna ỹauatto'n naua qarquiyaqchilli'. Cha'aye cam ỹamata'ac nam shiỹaxauapi da 'eetega 'amaqtaqaic, qaq nacheca cam ỹataqta ỹaỹemec Ñim Lo'onatac 'Enauacna.

Lucas 16:15 Iomraidhean Croise

Mateo 23:5

Qaq 'enauac ne'ena i'ot, cha'ayi nshitaique da na shiÿaxauapi imeteetac namayipi. Cha'ayi namayipi nqopita da ÿachitalec na latap qataq da ÿaxattagui na lhuaq naua ñiyigui'shi l'aqtaqa ñi Dios, da qoÿittalec na logodaic hualoq laÿi, qataq da ÿataqta logodaiqa naq'en naua lauoxol naua lapo'te, saq 'en'am na laÿipi shiÿaxauapi.

Mateo 6:16

Qaq da ivita da qami' qanqouaqchichi, qalaq sa ishit qome da yi'oqta da daquico da qadashiguiÿaxaqui, da qoñiita'am nam shiÿaxauapi mayi chochi nachaxaata. Cha'ayi namayipi 'eetec de'eda, cha'ayi nshitaique da qaÿaÿaten da nqouaqchitta. Qaq aÿim qami' shinapegalo da namayipi sogote huo'o da nshiitenaguec.

Mateo 6:2

Qaq ÿoqo'oyi da ivita da qautauañi cam huo'o da lhuenaxanaxa, qalaq sa ishit da ÿaÿajna'a't qanqashiñi 'enauac na shiÿaxauapi da qoñiita'am da 'eetec nam saq ÿataxalec da lataxac da nachaxaata da huetaigui ana laponaxaquipi na judiopi qataq na nqa'aicpi. Qaq 'eetec de'eda namayipi, cha'ayi chochi nshitaique da no'on da n'aqtaguec. Qalaxayi aÿim shinapec, da de'eda i'ot, damayi naigui da sogote da huo'o da nshiitenaguec.

Mateo 6:5

Qaq da ivita da qanatamñi, qalaq sa ishit qome da qoñiita'am nam chochi nachaxanaxaicpi da natamen mayi nqopita da nachatchiguiñi da huaigui anam laponaxaquipi na judiopi huo'otaq acam lamaxa ca nqa'aic da 'enauac na shiÿaxauapi ÿataqta ilochigui. Qaq aÿim qami' shinapegalo da namayipi sogote huo'o da nshiitenaguec.

Lucas 10:29

Qalaxayi som dapaxaguenataxanapec ÿauotaique da iuejlec dam nnataxanaxac, nachi 'enapego' so Jesús, 'eeta': –Qaq ¿chaq négue'to' cam iÿa mayi shiita'am?

Lucas 11:39

Qalaxayi so qadataxala' 'enapeco': –Qami' mayi qaualliquiitaigui na fariseo, qami' qauamataxañiiñi da qauÿoi na pa'auec ana qanÿomaxaquii qataq na qadqui'axaquii, qalaxayi na pa'auo naua qadquiyaqchilli' da'aichigui na chochi qauachigoxochiÿaigui da qadcachaxaqui qataq nam sa ÿaÿamaxañisat.

Lucas 18:11

Nachi som chigaqaigui nam fariseopi nachattañi co'ollaq nqouagaxaueetac, 'eeta': “'Am ita'a Dios, 'am sanot da ñi'achic, cha'ayi aÿim sa ishit da shin'am ca camachaqca shiÿaxaua, mayi cachaxaic, qauemaic, qataq lauatapiguiñi' aca sa lhua. Qataq sa ishit da shiita'am de'eda ÿacootapeeguet ana nshiitenaqte ca nta'a.

Lucas 18:14

Qaq aÿim shinapec da se'eso shiÿaxaua co'ollaq ÿi'iguelaxa ca lma', qalaq ÿataqta ÿaÿamaxadeeta ñi Dios, qaq sa ishit da 'eeta'am so fariseo. Cha'ayi ca maichi n'amaqten, qaq nachica cam qaica ca l'amaqchic qanqoÿin; qaq cam sa n'amaqten, qalaq nachica cam 'amaqtaq qanqoÿin.

Lucas 18:21

Nachi somayi 'enapeco': –Aja', 'enauac namayipi ÿataqta salaxalec, chigoqchiguiña co'ollaq ñaq aÿim nogotolec.

Lucas 18:9

Qaq souaxat nam ipi'itaxaatega da no'on shiÿaxauapi qataq i'otan ca lÿa, nachi so Jesús qaltaq ÿauo'o da daloqnaxana, 'eeta':

Lucas 20:20

Nachi qaÿauo'o so qanamaxai'pi chochi npi'itaxanaxanec. Somayipi chochi n'enaqchin da 'eetega no'on shiÿaxauapi, da yaqto' isomaxanaqchi't naua l'aqtaqa somayi, nachi ishit da huo'o ca qaÿachigoxotchigui ca lasouaxashit, nachi qoÿaneu'a so nta'a.

Lucas 20:47

Nataq'en namayipi ÿataqta iÿalaxat na huetañalo naua lma'te nam pa'aipi, nachi namayipi chochi nqañoxotoigui da i'ot da ÿataqta logodaic naq'en da nqouagaxaunaxac. Qaq ÿataqta ÿacteec qome da nhuaxanaguec namayipi.

Juan 2:25

Qaq sa ishit da iuen da huo'otaq huo'o ca da'aqtaxanem somayi da lataxac na shiÿaxauapi, cha'ayi somayi maichi ÿaÿateetac na lhuennataxacpi na shiÿaxauapi.

Juan 21:17

Nachi qaltaq ÿi'iguelaxalec da inat, 'eeta': –'Am Simón mayi 'am llalec so Jonás, ¿peta'a aÿim 'auauotec? Nachi so Pedro ÿataqta naquicochiguiñi, souaxat da mashi ivi' tres da qaÿi'iguelaxalec da qainat da ÿoqta 'eesa da dauotaxanaqta. Nachi somayi 'enapeco': –'Am ÿataxala', 'am 'auaÿaten mque' 'enauac da ÿataxac, qataq 'auaÿateeta da ÿataqta 'am ÿauotaxat. Nachi so Jesús 'enapego' somayi, 'eeta': –'Aulo'ogue qone' ana ilopi qagueta.

Hechos 1:18

Qalaxayi somayi co'ollaxa jec, nachi deshijnaxana so 'alhua, deshiitenaxana asom lashiue co'ollaxa da lli'itaxaloxo. Qaq co'ollaq ime, nachi najñi, i'atchiguiñi na lqaic, nachi dachipiÿa'ague, nachi nmauec na lailshicpi.

Hechos 1:24

Nachi qanqouagaxaueelguete soomayi, qoÿiita': –'Am qadataxala', 'am mayi 'auauatton 'enauac da lquiyaqteÿaxac 'enauac na shiÿaxauapi, ña 'auachaxan ca 'oonolec ne'enaua dos cam 'alca'aguishic,

Hechos 15:8

Qaq ñim Dios mayi maichi ÿauatton da nquiyaqteÿaxac, nachi ÿachaxan nam ÿaÿamaxadeetapi da ÿami' so Espíritu Santo, 'eeta'ama naq'en qomi' co'olloxochiyi.

Romanos 3:20

Cha'ayi qaica ca ishit da ÿaÿamaxadeeta ñi Dios souaxat da i'ottac nam damaxasoxoolec na nqataxacpi, cha'ayi ne'ena nqataxacpi, namayipi chaqdata da i'ot da qomi' ÿaÿajnaxanaxanque da qomi' huo'o cam qadasouaxashit.

Romanos 8:27

Qaq ñim Dios mayi imeteeta'pe naua nquiyaqtel, ñimayi ÿaÿaten cam 'eetega so Espíritu. Cha'ayi so Espíritu nqouagaxaunaique cam ÿaÿamaxadeeta ñi Dios da nqouagaxaueelec nam lalamaxatpi ñimayi.

1 Corintios 4:5

Qaq ÿoqo'oyi qami' sa ishit da huo'o ca qau'aviÿalec da qanmichi. Qauachiÿa'aguet so qadataxala' qom ñi'iguelaq da yi'oq naq'en na huetaigui na napalaxa. Somayi mayi yi'aqlec naq'en na 'eetapeguecpi ana nquiyaqtepi. Ime, qanachi ñi Dios ÿaconguet ca 'oonolec da ÿanem ca 'itchiguiñi naÿamaxannataguec.

1 Pedro 3:4

Chaqdato' da ÿaañi ca saq cha'a 'otaxat mayi chochaq tateec da lyaquiaxac. Huosotta naq'en da lataxac qataq qaica camachicague't. 'Eda mayi ÿataqta huo'o naq 'enec naq'en ñi Dios.

1 Pedro 5:5

Qaq nachi 'en'am nataq'en qami' nsoxotpi ÿataqta qaualaqaiguet qome ca 'enapec na ÿi'axaiquipi. Qataq 'enauac na shiÿaxauapi iuen da ñi 'oonolec ÿataqta nañanguet da ÿalaxaguet ca lÿa qataq sa n'amaqten. Cha'ayi naua ñiyigui'shi n'aqtaqa 'eeta': Ñi Dios nachaata'aguet ca n'amqajnaxaic, qalaxayi nqouaguec da itauan ca sa n'amaqten.

Apocalipsis 2:23

Qataq salauat qome 'enauac na llalaqpi, yaqto' 'enauac na 'amqajnataxanaxaicpi ishit da ÿaÿaten da aÿim 'eesa da saÿateetac cam saq cha'a nhuennataxac qataq da nquiyaqteÿaxac. Qataq ñi 'oonolec da qoñiita seshiitenguet cam naigui ca i'ottac.