Lucas 1:1 - Nuevo Testamento Toba Sur

¹ Cha'ayi mashi qalota na shiÿaxauapi mayi ÿacoolec da ÿachigoxottot so hua'auchiguiñi da ÿiyiñi 'enauac na qai'otpi mayi qomi' huanguilo.

Nuevo Testamento Toba Sombrero Negro

¹ Am Teófilo jo'ne am p'ajaye: Joote auayaten queda'me uo'oe gaa'me Dios 'lonataqa jo'ne yepacalo'te ca'li, jo'ne qo'mi di'yoĝoma. Qama'le uo'oe gaa'me qayoĝode' jo'ne te'me jetaque 'yaĝatetedac da'me dojo',

La'aqtaqa Ñim Lo'onatac 'Enauacna 2013

^1-4 'Am maye 'am ỹo'oxoraic qataq ñauochaxaua Teófilo: 'Auaỹateeta da mashe qalota som deraxan da ỹa'axat dam souaqaigui co'ollaxa. Somayepi ỹataqta ipagaqchiichigui da ỹiyiñi dam qomi' da'aqtaxaateguema soua ỹataqta hueta'agueta qataq ỹauachiguilo So Jesús co'ollaxa yem chegoqchiguiña. So Jesús ỹama'q soomaye da ỹa'axatre'c de'era na'aqtaxanaxac. Qaq aỹem nataqa'en mashe semat da ñapaxagueetega 'enauac ye chegoqchiguiña de'era. Qaq ỹoqo'oye ỹaỹamaqchiguiñi ñaqa'en da ỹataqta shiyiñi 'enauac de'era qataq ỹataqta sepagaqchiichigui da yaqto' 'am ishet da 'auaỹaten de'era 'am qaỹa'aqtaxaateguem da ỹataqta 'eesa.

Lucas 1:1 Iomraidhean Croise

Marcos 16:20

Nachi soomayi je'c da i'axa't da n'aqtac mayi chigaqaigui da nca'alaxa 'enauaque naua laÿil. Qaq som qadataxala' itauaata'pe soomayi da ÿataqta ipacchiguilo naq'en naua l'aqtaxanaxaco, qataq da ÿachaxan na n'anecpi mayi sa qaÿauanapigui. Aja', nachi 'eetec de'eda.

Juan 20:31

Qalaxayi de'eda qoÿiyiñi, damayi qoÿiyiñi, yaqto' qami' ishit da qau'amaqchiñi da so Jesús nachiso som nta'a mayi qadca'alaxaqui, som llalec ñi Dios, qataq yaqto' qami' ishit da huo'o da qadca'alaqai da qau'amaqchiñi somayi.

Romanos 14:5

Qataq da lÿa saloqnaxana 'eeta': Huo'o na ÿapagaqchiitac ca 'oonolec na'a'q da 'eetega saq 'en'am ca lÿa na'a'q. Qataq huo'o na 'eetega da 'en'a't naua na'axa'te. Qaq ñi 'oonolec maichi ÿataqta 'eesa naq'en da lhuennataxa.

Romanos 4:21

cha'ayi ÿataqta ÿaÿateeta da ñimayi huo'o da l'añaxac da ishit da ipacchigui 'enauac cam ÿachaxanapec.

Colosenses 2:2

Qaq huo'o da ñiloquiaxac, cha'ayi ñishitaique da namayipi da'añi da lquiyaqteÿaxac, qataq ntaungui da nsoxoyic, qataq qaica ca iueetac dam aquitaxac mayi chigaqaigui da nauattonaxanaxac, da yaqto' ÿauattoota dam saq cha'a mayi ÿachaxan ñi Dios, mayi nachiso so Cristo.

Colosenses 4:12

Nataq'en qami' ÿamaxalo da lquinaxanaxac ñi Epafras. Ñimayi nataq'en lamaxashic so Jesucristo, qaq ñimayi maichi qami' chigoqtoiguilo co'ollaxa. Qaq ñimayi nachi 'eetai' naxa da qami' nqouagaxaueetalguete, da yaqto' qaica ca da da qadhuennataxaqui, qataq da yaqto' ÿataqta qanañañiÿot da qau'ochi ca 'eetapeguec ñi Dios.

1 Ts 1:5

Cha'ayi qomi' co'ollaq qami' sa'axataxama da n'aqtac mayi chigaqaigui da nca'alaxa, qalaq sa ishit da ndoxoiqa naua qadtaxaÿaxac. Cha'ayi qomi' hueta'agueta da l'añaxac so Espíritu Santo, qataq saÿajnaqta da ÿataqta 'eesa dam sa'axataqtac. Qataq qami' ÿataqta qauaÿajñiita da qadataxac no'on co'ollaq qami' souaqta'agueta. Qaq damayi naigui da maichi qanaÿamaxataxaqui.

1 Timoteo 3:16

Qaq sa ishit da qaÿoqolguet de'eda saq cha'a lataxac da qad'amqajnataxanaxac, cha'ayi ÿataqta lta'adaic da lli'oxoyic: Ñi Dios nachaxan, qalaxayi nachida da yi'oqchigui lapachiyaxac na shiÿaxauapi; qaq da n'aqtaguec co'ollaq i'axat so Espíritu ÿataqta 'en da no'on shiÿaxaua, qaq ÿauaachigui somayi 'enauac na chigaqshiguem Dios lamaxashicpi. Qataq qai'axatem 'enauac na ÿotta'a't shiÿaxauapi, ÿoqo'oyi huo'o na i'amaqten na 'enauac ÿallippi nam huetalecna. Ime, qaq qaÿaueegue da piguem.

2 Timoteo 4:17

Qalaxayi so qadataxala' Jesús saq aÿim iÿoteec, qataq aÿim ÿami' da i'añaxac da ña sepactelec da sa'axat da n'aqtac mayi chigaqaigui da nca'alaxa, yaqto' hua'axaÿa de'eda 'enauac na saq judiopi. Qaq nachi 'eetec de'eda som qadataxala' aÿim nca'alaxateeguesop da 'ico' loxonaxanaxac ca dequi'iÿapec.

Hebreos 10:22

Qaq ÿoqo'oyi qomi' ishit da ñiquigaxau'a ñi Dios, qalaxayi ÿataqta huesote' ñaq'enaq naua qadquiyaqte, qataq ÿataqta 'eesa ñaq'enaq da qadpi'iÿaxac. Cha'ayi ñimayi mashi iqui'itaxatte' naua qadquiyaqte, yaqto' qomi' sa ishit da 'eeta'am da ñaq huo'o ca qadasouaxashit qataq mashi sogote da qaiÿota da qad'oquiaxac, qaÿauota'a na ndoteec 'etaxat.

Hebreos 6:11

Qalaxayi qomi' sauoqtaique da ñi 'oonolec da qoñiita quetot qome da n'añaxataxac, chochi ivitta'a ca loga't, yaqto' ÿataqta ipacchigui 'enauac cam qanaquichiitaique.