Apocalipsis 12:9 - Nuevo Testamento Toba Sur

⁹ Qaq 'eda da 'eetec co'ollaq qaÿamaqhuec se'eso 'ico' da'ail'oc. Qaq somayi nachiso so n'adaxanaq mayi l'atchiguiñi da datenataxan, l'enaxat Satanás, som shiÿaxaua mayi lma'na. Qaq somayi qataq 'enauac so nallippi qai'odalec ana 'alhua.

Nuevo Testamento Toba Sombrero Negro

⁹ qama'le qoyamaĝaye ñe'me jiyac let'adaic jo'ne ena'am ta'le ñaĝadiaq da'me 'loyaĝac, nach'eñe ñe'me nanaic jo'ne 'uaechiñe 'uo joca'li jo'ne lenaĝat da'me Payac nataq'aen lenaĝat laqaya da'me Satanás, jo'ne yoqovi'n yema ga'me aleua laje'pi. Ñe'me Satanás nataq'aen ena'uaque jogaa'me mach'e lalemaĝajetpi male qonajaĝadi'ña jena'me aleua.

La'aqtaqa Ñim Lo'onatac 'Enauacna 2013

⁹ Nachaqrata da qaỹamaqauec se'eso shiguiỹac leguemaxaic maye nacheso som na'araxanaq maye la'atchiguiñi: som le'enaxat da pa'aguenataxanaxaic. Somaye qataq so lamaxashecpi qaỹamaqauec da yaqto' talec ana 'alhua, nache somaye nalemaqte' da ỹatenachet 'enauac na huetalec ana 'alhua.

Apocalipsis 12:9 Iomraidhean Croise

Mateo 13:39

Qaq so depa'aguenataxaatac mayi ÿaañi aso huoue, qalaq nachiso so shiÿaxaua lma'na. Qaq da qanqat na ala so trigo, qalaq nachica cam loga't ana 'alhua. Qaq som daqataxaatacpi, qalaq nachina na namaxashicpi piguem l'ecpi.

Mateo 24:24

Cha'ayi ÿataqta qalota qome na anac da 'eetega nta'a nca'alaxaqui, huo'otaq 'eetega da l'aqtaxanaxanecpi ñi Dios. Nachi namayipi i'ot qome na lta'adaic n'anecpi qataq nam sa qaÿauanapega, da yaqto' datenataxan. Qaq sa iuena'a da ishit nataq'en qome da ÿañoxot da ÿatenachit nam lca'aguishicpi ñi Dios.

Mateo 25:41

Nachi ne'ena nta'a 'enapega qome nam hueta'ague na n'emaq, 'eeta': “Aÿim qoquiÿa'ai qome, qami' mayi qaÿauo'o da qanhuaxanaguiiqui. Qaÿingui yim chochaq tateec nodec mayi qaÿaqataxaatai' da yaqto' qaÿasaxangui so shiÿaxaua lma'na qataq nam lamaxashicpi.

Mateo 4:1

Qaq co'ollaq mashi ime de'eda, nachi so Espíritu Santo ÿauega so Jesús ca tojlec 'alhua, da yaqto' so shiÿaxaua lma'na ÿi'iguen somayi.

Mateo 4:10

Nachi so Jesús 'enapega, 'eeta': –'Am Satanás, aÿim qoca'ai, cha'ayi yi nanettañi l'aqtac ñi Dios 'eeta': “'Avi'oxoden ñi 'adataxala' Dios, qataq nachaqñita 'au'onataxanot.”

Mateo 4:5

Nachi so shiÿaxaua lma'na ÿauega somayi so la ciudad Jerusalén mayi ÿataqta qui'itta. Nachi ÿaviguishiguemec na l-laq aso n'onaxanaxaqui.

Mateo 4:8

Qaltaq ÿi'iguelaxalec so shiÿaxaua lma'na da ÿauega so Jesús aso qaÿoqotchiguemec qasoxonaxa. Nachi ÿachaxanalo 'enauaque naua 'ale'u mayi huetalguete ana 'alhua qataq 'enauac da l'amaqchic namayipi.

Lucas 10:18

Nachi so Jesús 'enapeco': –Aja', aÿim sauaachigui can najñi so Satanás, chigoqtot na piguem, 'eeta'am na nqashilgaxa.

Lucas 13:16

Qaq ada'ada 'alo yi maichi llale so Abraham, qaq so Satanás yi icoñitta'aguet adamayi de'eda nalolaxa nagui mashi ivi' naua dieciocho vi'iyi, qaq ¿peta'a sa ishito' da qaisoueguesop de'eda lalolaxa adamayi ne'ena na'a'q mataxaqui?

Lucas 22:3

Nachi so Satanás inoxonoigui so Judas, da l'enaxat lÿa Iscariote. Somayi nachiso so 'oonolec soua doce lamaxa'shi.

Lucas 22:31

Nataq'en 'enapeco' so qadataxala': –Simón, Simón, ña 'aula'a so Satanás mashi qami' iÿaxaneu'alo da 'ico' qami' ichigo'q, 'eeta'am naq'en da qaichigoq ca trigo.

Lucas 8:12

Qaq asom nanguishi mayi tajlec na laÿi so nqa'aic, qalaq naigui ca shiÿaxaua mayi n'axaÿaxaatac. Qalaxayi anac som shiÿaxaua mayi lma'na, nachi deuotaxanec som n'aqtac mayi huetagui añi lquiyaqte, da yaqto' sa ishit da da'amqajnataxan naq'en, nachi sa ishit da nca'aleec.

Juan 12:31

Nagui mashi ivita yi laloqo' da na huetalec ana 'alhua qaÿauo'o ca lasouaxashit, qataq da qaÿamaqhuec som damaxasoxonapec ana 'alhua.

Juan 14:30

Qaq nagui sa ishit da qalota na sa'axat da qami' sa'axatema, cha'ayi mashi anac nam damaxasoxonapec ana 'alhua. Qalaxayi namayi sa ishit da huo'o ca l'añaxac da aÿim ÿaconeu'a.

Juan 16:11

qataq namayipi qome ÿaÿaten da ñi Dios ÿauo'o ca nhuaxanaguec, cha'ayi mashi sogote da qaÿauo'o da nhuaxanaguec som damaxasoxonapec ana 'alhua.

Juan 8:44

Qami' som qadta'ai, nachiso som shiÿaxaua mayi lma'na. Somayi qami' lalamqa'te, ÿoqo'oyi qanshiitaique da qau'ochi cam 'eetapeguec somayi. Se'eso shiÿaxaua mayi lma'na, somayi ÿataqta laataxanaxaic. Nachi chigoqchiguiña co'ollaq chita'ague da qai'ot ana 'alhua, somayi sa ishit da hueto'ot ca 'eesa lataxac, qaq ÿoqo'oyi sa ishit da 'en ca l'aqtac. Qaq somayi da huo'otaq nasaxauec ca latenataxanaxac, nachi ÿataqta ipacchigui da maichi lataxac. Cha'ayi somayi ÿataqta tenataxanaxaic, qataq nachiso so lta'a da natenataxanaxac.

Hechos 26:18

Aÿim 'am samaxa namayipi, da yaqto' ishit da nauaañi 'anqa'en, yaqto' sa ishit da 'ico' quetaigui na napalaxa, chaqdata da quetaigui na yi'oqchiguiñi; qataq yaqto' namayipi sa ishit da hueto'ot da l'añaxac so Satanás, chaqdata da quegue ñi Dios; qataq yaqto' aÿim i'amaqten, nachi ishit da qaÿapalaxat na lasouaxashitpi, qataq yaqto' qaÿalecneu'a da qoÿanem qome cam ÿachaxanapec ñi Dios da ÿami' nam lalamaxatpi ñimayi.”

Hechos 5:3

Nachi so Pedro 'enapego' somayi, 'eeta': –Ananías, ¿tá'ainec yi 'aunoxonaqchitoigui añi 'adquiyaqte so Satanás da yaqto' 'auatenachit naq'en so Espíritu Santo, nachi 'an'onaxatañi aso laÿi aso lashiue so 'adma'?

Romanos 16:18

Cha'ayi ne'ena shiÿaxauapi sa ishit da do'onataxaatacot so qadataxala' Jesucristo, chaqdata da maichi lsoxo. Qataq namayipi ÿatenachit da lquiyaqteÿaxac nam shiÿaxauapi mayi qaica ca ÿaÿajnapec, idolguete naua l'aqtaqa isotta'pe qataq amai'.

Romanos 16:20

Qaq ñim Dios mayi chigoqo'ot da nlagaxayic saqaÿaloq qome da nlaxajñi da l'añaxac so Satanás da ÿacho'oto na qadapia'chilli', da yaqto' qauapiilec. Qaq so qadataxala' Jesucristo qami' ÿanema qome ca qanchoxonnataguiiqui.

2 Corintios 11:14

Qaq damayi sa ishit da huo'otaq lliualaqa'a, cha'ayi saÿajnaq da so Satanás ishit da chochi n'enaqchingui cam 'oonolec na lamaxashicpi ñi Dios mayi huo'o na l'edaxa.

2 Corintios 11:3

Cha'ayi de'eda 'eetec so n'adaxanaq mayi sa nqalaataxaic co'ollaq ÿatenachit aso Eva. Nachida da i'ot da icolanaxa da sa iuena'a da nataq'en ishit da qami' qaÿatenachi't, nachi da qadhuennataxaqui ishit da dashiueguesop dam huesochiguiñi qad'amqajnataxanaxaqui so Cristo.

2 Corintios 12:7

Qaq de'eda ÿauanaqchic ÿataqta qaica ca 'en'am da lli'oxoyic. Qalaxayi da yaqto' sa ishit da sagaqten da ñi'amqajñigui, nachi aÿim qoÿanem da ñiqui'ic, 'eeta'am aca ÿaxat le da huo'otaq i'attaigui da i'oquiaxac. Damayi lamaxashic so shiÿaxaua lma'na da aÿim iuaxan.

2 Corintios 2:11

yaqto' so Satanás sa ishit da huo'o ca lligueuo da shinaqta, cha'ayi qomi' mashi saÿajnaqte' naua n'onataxaco.

2 Corintios 4:4

Cha'ayi namayipi sa ishit da da'amqajnataxan, ÿoqo'oyi som shiÿaxaua lma'na, mayi quetague' nam shiÿaxauapi, somayi sa nauaañi naq'en namayipi da lauattonaxanaxac, da yaqto' sa ishit da ila'a na l'edaxa dam no'on qad'axaÿaxac mayi i'axat da n'aqtaguec so Cristo mayi ÿi'oxodaic, som nachiso so lqui'iÿaxac ñi Dios.

Efesios 4:14

Nachi sa ishit qome da shinaqta'am ca nogotolec mayi qaica ca lqalaic da qaÿashaxaneec, qataq chochi ÿachitac na 'ico' l'at mayi nachina na ÿaqa'a napaxaguenataxanaxacpi. Huaña, nachi ilamaxata'aguet na shiÿaxauapi mayi sa nqalaate' da latenataxanaxac mayi nshitaique da qomi' ÿaueca'alo da nsomaxac.

2 Ts 2:3

Qalaxayi sa ishit qome da huo'o ca qami' ÿatenachi't. Cha'ayi qom yaqta'a da ivita que'eca na'a'q, nachi hua'auñi da nachajñi ca shiÿaxauapi, ÿataqta npa'aguene' ñi Dios, nachi yi'oq que'eca shiÿaxaua 'itaxaloxoic cam taÿa'a da ÿataqta imeuo qanqoÿin.

1 Timoteo 2:14

Qaq so Adán sa ishit da nachiso so qaÿatenachit. Chaqasota aso Eva mayi qaÿatenachit. Qaq co'ollaq qaÿatenachit, nachi huo'o da lasouaxashit.

2 Timoteo 3:13

Qalaxayi na qauemaicpi qataq na tenataxanaxaicpi taÿañicda, nquicta'aguet 'enauac na sa ÿaÿamaxañisat. Namayipi datenataxaatac, qalaxayi nachi 'en'am natenatac.

Hebreos 2:14

Ca ñalaqpi mayi 'oonolec ca qaÿachigoxoigui, camayipi 'eeta'a't da l'oquiaxac qataq naua ltago'q. Qaq nachi 'eetec nataq'en so Jesús, somayi da l'oquiaxac qataq naua ltago'q chigoqchiguilo na shiÿaxauapi, yaqto' somayi ishit da ileu, huaña, nachi nlaxajñi som hueto'ot da n'añaxac da dalaataxan, som shiÿaxaua mayi lma'na.

1 Pedro 5:8

Qataq ÿataqta qanaÿajnaxanaqchiñi, qataq qanloiteec, cha'ayi so qami' ipa'agueeta'pe shiÿaxaua lma'na coleetac, nmittaique ca loxonec, 'eeta'am ca quiyoc da desoqtac.

1 Juan 5:19

Qaq qomi' saÿajnaqta da qomi' lalamqa'te ñi Dios, qaq nam laÿipi shiÿaxauapi mayi huetalec ana 'alhua 'enauac hueto'ot da l'añaxac so shiÿaxaua lma'na.

Judas 1:9

Qamaq so lataxala' na namaxashic piguem l'ecpi, l'enaxat Miguel, co'ollaq deloctague' so shiÿaxaua lma'na, qaq co'ollaq ncotatague' somayi, souaxat so l'oquiaxac so Moisés. Qalaq sa ishit da huo'otaq iuaxanque naua l'aqtaqa. Chaqdata da 'eeta': “Ñi qadataxala' Dios 'am nlaxa qome.”

Apocalipsis 12:12

Qaq ÿoqo'oyi 'am piguem, qataq 'enauac na 'am netalec, ÿataqta qauamaichiguiñi qome. Qalaxayi ÿataqta choxodaicpiolec qome na netalec ana 'alhua qataq asom auaxai. Cha'ayi so shiÿaxaua lma'na ÿataqta dalemata. Qaq somayi qami' huenoteeguesopa, cha'ayi somayi ÿaÿateeta'a da mashi sa qaÿapeque ca laloqo'.

Apocalipsis 12:3

Ime, qataq yi'oq so lÿa n'anec, huo'ot na piguem, 'eeta': Sa lta'adaic shiguiÿac 'ico' na da'ail'oc da lataxac. Qaq somayi togaxadaic, qataq siete na lqaicpi, qataq diez aso lcouepi. Qaq ñi 'oonolec nam lqaicpi ÿaatañi ana nado'o na nta'a.

Apocalipsis 12:7

Ime, nachi huo'o so lta'adaic loquiaxac, huo'ot na piguem, cha'ayi so lataxala' na namaxashic piguem l'ecpi, l'enaxat Miguel, qataq 'enauac so nallippi, qailoctague' so shiguiÿac mayi 'ico' da'ail'oc. Qaq se'eso shiguiÿac qataq na nallippi ÿataqta deloctac,

Apocalipsis 12:8

qalaxayi somayi sa ishit da dauegaxan. Nachi somayi qataq so nallippi qaica ca lma' na piguem.

Apocalipsis 13:14

Qaq chigoqchigui ne'ena i'ot n'anecpi mayi i'ot da n'aalaxa mayi qaÿashiitem da i'ot da ÿauaachigui naq'en som hua'auchiguiñi shiguiÿac, da yaqto' ÿatenachit 'enauac nam huetalec ana 'alhua. Nachi damaxasoxoolec da qai'ot ca n'enaqtac lqui'i se'eso shiguiÿac mayi huo'o co'ollaxa so lque'emaxa ÿiilonec lliguiñi, qalaxayi ñaqaiyita ishit da nca'aleec.

Apocalipsis 16:14

Qaq soomayi nachisoua soua lamaxa'shi so Satanás mayi i'ottac na n'anecpi mayi i'ot da n'aalaxa. Qaq soomayi huenoxoodeec, da yaqto' laÿona't 'enauac na nta'alpi mayi huetalec ana 'alhua, da ÿaqataxaatai' da deloqui que'eca na'a'q mayi lvidaxaqui da ÿauo'o ca nhuaxanaguecna ñim Dios mayi qaica ca ÿaqalanapec.

Apocalipsis 18:2

Qataq ÿataqta alam da lavilÿaxac, detaqtac, 'eeta': –Mashi noxonec yim lta'adaic la ciudad l'enaxat Babilonia. Mashi noxonec. Qaq yimayi lma' nagui na lamaxashicpi so shiÿaxaua lma'na, qataq nqañoxotaqa' 'enauac na saq cha'a qauemaicpi, qataq laÿoqo' nam maÿopi mayi nshipaxan qataq nqaigaxatpi.

Apocalipsis 18:23

Qataq sa ishit da 'edoigui ana 'adcoÿadaxanaxaquipi, qataq nachi sa ishit da qai'axaÿa ca laÿac cam huadona't, qaq nai'ctaxa da na 'admenaxanaxanecpi co'ollaxa ndoteec na 'añaxaicpi mayi huetalec ana 'alhua, qataq ÿataqta 'auatenachit 'enauac co'ollaxa na ÿotta'a't shiÿaxauapi da 'audolec da 'ayi'iyaqnataxanaxac.

Apocalipsis 19:20

Qaq se'eso shiguiÿac, qalaq qaicoñi', nataq'en so 'eetega l'aqtaxanaxanec ñi Dios mayi i'ottac na n'anecpi mayi sa qaÿauanapega da yaqto' qai'amaqten so shiguiÿac. Qaq chigoqchigui ne'ena n'anecpi se'eso 'eetega da n'aqtaxanaxanec da ÿatenachit nam nashiiteguet aso l'anaxanaqte so shiguiÿac, qataq da ÿi'oxoden so n'enaqtac lqui'i. Qaq se'eso shiguiÿac qataq som 'eetega da n'aqtaxanaxanec, soomayi nachi nca'altrauec qanqoÿin da qaÿasaxayingui so lta'adaic nodec mayi huaña da ÿavictac na quiquiaxadaic.

Apocalipsis 2:13

Aÿim ÿataqta saÿateeta 'enauac nam 'au'ottacpi, qataq saÿaten da qonetangui nam ilotague' so Satanás. Qalaxayi ñaqaiyita 'am ÿataqta aÿim qoquetelec, qaq ÿataqta sa ishit da 'axaañi da aÿim 'au'amaqteetac, nai'ctaxa da co'ollaq qaÿalauat so i'aqtaxanaxanec Antipas, som 'oonolec da qoñiita, mayi huaña yim hueta'a so Satanás.

Apocalipsis 2:24

Qalaxayi qami' mayi qoñiitaña na Tiatira mayi sa ishit da qoquiigue de'eda napaxaguenataxanaxac qataq sa ishit da qavichiÿa da qauauattoñi dam qoÿiitega saq cha'a lataxac so Satanás, qaq aÿim qami' shinapegalo da sa ishit da qaltaq sauo'o ca lÿa qami' sachilguete.

Apocalipsis 2:9

Aÿim saÿaten 'enauac nam 'au'ottacpi qataq 'enauac na 'anque'ejnaxaguesat qataq dam 'adachoxoyic, nai'ctaxa da ÿataqta 'am sallaxanec. Qataq saÿaten da ÿataqta qauema naua ltaxaÿaxaco da 'am detaxaÿa nam 'eetega da judiopi, qalaxayi sa ishit da 'en. Chaqdata da namayipi i'amaqteetac so Satanás.

Apocalipsis 20:10

Qaq som shiÿaxaua lma'na mayi ÿatenachit somayipi, qaÿasaxangui so lta'adaic nodec mayi huaña da ÿavictac na quiquiaxadaic, som huaña da qaÿasaxangui co'ollaxa so shiguiÿac qataq so 'eetega da l'aqtaxanaxanec ñi Dios. Huangui se'eso nodec, nachi huo'o da nque'ejnaxac chochaq tatreec 'enauaque naua na'axa'te.

Apocalipsis 20:8

Nachi nnoxooshiguem da qaltaq ÿatenachit 'enauac nam ÿotta'a't shiÿaxauapi mayi huetalec ana 'alhua. Nachi nqo'ona da ÿatenachit ñi Gog qataq Magog. Nachi laÿona't na nallippi naamayi, da yaqto' deloqui. Qaq namayipi qalota, 'eeta'am na lsochi na coma' mayi hueto'ot na loigue aso auaxai.

Apocalipsis 3:9

Qaq ÿoqo'oyi aÿim so'otec qome da i'adoto naua l-llicte da qoneta nam quetague' so Satanás, nam shipecaicpi mayi 'eetega da judiopi qalaxayi sa ishit da 'eesa, da yaqto' namayipi ÿaÿateeta da aÿim ÿataqta 'am sauotec.

Apocalipsis 9:1

Qaq so lÿa namaxashic piguem l'ec, can ÿashiiyigui aso lashiide, nachi sela'a aso huaqajñi mayi chigoqo'ot co'ollaxa na piguem da talec ana 'alhua. Nachi asomayi qoÿami' aso lvinaqte ca lasom cam laponqa' na leuaxaicpi.

Apocalipsis 9:20

Qalaxayi nam n'onañi shiÿaxauapi mayi sa ishit da ileema se'esoua napaxaco ñaqaiyita sa ishit da ÿaxaayiñi naua qauema mayi i'otta'pe. Qataq sa ishit da ÿaxaañi da natameetacot nam saq cha'api qauemaicpi, qataq nam nqolacpi mayi chigaqaigui qanqoÿin na oro, plata, bronce, coma', qataq na qo'ipaq mayi sa ishit da demejnaxan, qataq sa ishit da hua'aqa, qataq sa ishit da queuoÿapigui'.