Mattiu 9:2 - Tedim Bible Revision 2017

² Mi pawl khat in khutlekhe zaw mi khat, a lupna pheek tawh hong pua-in Jesu kiang a hong tunpih uh hi. Jesu in amauteʼ upna a muh ciangin a cina mipa kiangah, “Ka ta aw, na lungsim kinuamsak in; na mawhna hong kimaisak khinta hi,” a ci hi.

Tedim Bible

² Tua lai takin a khut a khe si mi khat a lupna tawh pua uh a, Zeisu kiangah a va paipih uh leh, Zeisu in amaute’ upna a theih ciangin, a khut leh khe sipa kiangah, “Ka ta aw, na lunghimawh kei in. Na mawhnate kimaisak zo hi,” a ci hi.

Mattiu 9:2 Iomraidhean Croise

Thuhilh-sia 9:7

An ne-in lungdam inla, zu ne-in lungnuam in. Na gamtatna peuhpeuh Pasian in hoih a sa hi.

Isaiah 44:22

Na thupalsatnate meiipi bangin na khialhnate meii lum bangin ka phiat khia khinzo hi. Hong hon khia khin ka hih manin kei kiangah hong ciahkik in.

Mattiu 14:27

Jesu in amaute hopih pah a, “Na lungsim uh hangsak un. Keimah ka hi hi. Lau kei un,” a ci hi.

Mattiu 4:24

Syria gam sung khempeuh ah ama thu kizel ahih manin dawivei mi, sibup mi, khut zaw khe zaw mi a kipanin natna satna a tuamtuam a nei mi khempeuh ama kiangah hong kipuak a, amah in a vekpi-in a damsak hi.

Mattiu 6:12

Kote tungah a hong mawhte mawhmaisakna ka neih bangun koʼ mawhna zong hong maisak in.

Mattiu 8:10

Jesu in hih bupa thugen a zak ciangin lamdang sa a, amah a zui mihonte kiangah, “A mantak a kong genin ah Israel mite lak nangawn ah hih bang upna a nei ka mu nai kei hi.

Mattiu 8:16

A nitak ciangin mite in Jesu kiangah dawivei mi tampi tak hong paipih uh hi. Jesu in kam khat pauna bek tawh dawite hawl khia-in cina khempeuh a damsak hi.

Mattiu 9:22

Jesu zong hong kihei a, tua numei a muh ciangin, “Ka tanu aw, na lung kinuamsak in. Na upna in nang hong damsak khinta hi,” a cih khit phetin tua numei a dam pah hi.

Mattiu 9:5

‘Na mawhna hong kimaisak hi,’ cih ding le, ‘Tho inla pai in,’ cih ding koi baih zaw ahi hiam? Kampau lel pen baih mahmah hi.

Mattiu 9:6

Ahi zongin Mihing Tapa in leitungah mawhmaisak theih nading thu nei hi, ci-in na theih nadingun kong lak ding hi,” a cih khit ciangin khutlekhe zaw mipa kiangah, “Tho in; na lupna pheek pua inla na inn ah ciah in,” a ci hi.

Marka 1:32

Tua nitak lam, ni a tum khit ciangin mite in Jesu kiangah cina khempeuh le dawivei khempeuh a hong paipih uh hi.

Marka 10:49

Tua ciangin Jesu khawlin a nungzuite kiangah, “Va sam un,” a ci hi. Amaute in mittaw pa samin ama kiangah, “Na lung nuamsak in; ding in; amah in nang a hong sam hi,” a ci uh hi.

Marka 5:34

Jesu in zong tua nu kiangah, “Ka tanu aw, na upna in nang hong damsak zo hi. Cidam suak inla, lungnuam takin va ciah in,” a ci hi.

Marka 6:50

Bang hang hiam cih leh amah a muh uh ciangin lau mahmah uh hi. Ahih hangin Jesu in thakhatin amaute hopih pah a, “Lungnuamin om un. Keimah ka hi hi; lau kei un,” a ci hi.

Johan 16:33

Keimah tawh na hong kipawlna uh hangin lungnopna na neih theih nadingun hih thu a hong gen ka hi hi. Leitung gimna na thuak ding uh hi. Ahi zongin keimah in leitung nate zo khinta ka hih manin lungnuamin om un,” a ci hi.

Johan 2:25

Amah in miteʼ lungsim tawng dong thei ahih manin mite a bangci mi ahi hiam cih thu midangte in ama kiangah a gen ding kisam lo hi.

Johan 21:5

Jesu in amaute kiangah, “Tangvalte aw, ngasa na man uh hiam?” ci-in a dot leh amaute in, “Bangmah ka man kei uh hi,” ci-in a dawng uh hi.

Sawltak 14:9

Amah in Paulʼ thuhilhte limtakin a ngai hi. Tua mipa in damna a ngah zawh nading zahin upna nei hi, ci-in Paul in a muh ciangin limtakin amah en a,

Sawltak 19:12

Ama zat mainul ahi a, a puante ahi zongin cinate kiangah a kipaipih ciangin a natnate uh damin, a sunga om dawite zong a tai khia uh hi.

Sawltak 23:11

Tua zanin Paul kiangah Topa hong dinga, “Hang takin om in. Hih Jerusalem khua sungah keima thu genin teci na pan mah bangin Rom khuapi ah zong keima thu genin teci na pang ding hi,” a ci hi.

ROM (Romans) 5:11

Tua teng bek hi lo lai a, Pasian tawh hong kilemsak i Topa Jesu Khris hangin Pasian tungah i nuam mahmah hi.

Jeim 2:18

Ahi zongin mi khatpeuh in, “Mi khat in upna nei a, a dang khat in gamtatna nei hi,” ci zenzen leh, gamtatna in a zui lo upna hong lak dih in; keimah in ahihleh ka upna ka gamtatna tawh kong lak ding hi, ka ci ding hi.