Joshua 6:23 - Tedim Bible Revision 2017

²³ Tua ahih ciangin thu kansim tangvalte va tum uh a, Rahab, a nu, a pa, a sanggamte le amah tawh a kizom khempeuh a paikhiatpih uh hi. Amaute in tua nuʼ tanau teng khempeuh paipih uh a, Israel-teʼ giahphual pua lamah a koih uh hi.

Tedim Bible

²³ Tua ahih ciangin thu kansim tangvalte va tum uh a, Rahab, leh a nu leh a pa leh a sanggamte leh amah tawh a kizom khempeuh pai khiatpih uh hi; amaute in tua nu’ tanau teng khempeuh paipih uh a, Israelte’ giahphual pua lamah koih uh hi.

Joshua 6:23 Iomraidhean Croise

Piancilna 12:2

Minam lian in kong bawl dinga, thupha hong pia-in, na min liansak ding ka hih manin midangteʼ adingin thupha na hi ding hi.

Piancilna 18:24

Tua khuapi sungah thuman mi sawm nga bang om leh, tua sunga om thuman mi sawm ngateʼ hangin khah loin tua khua susia teitei ding na hi hiam?

Piancilna 19:29

Pasian in kuam sunga khuapite a suksiat lai-in, amah in Abraham phawk a, amah in Lotʼ teenna khuapite a suksiat ciangin tua bang a suksiatna sung panin Lot sawl khia ahih manin a suakta ahi hi.

Gamlak-vakna 31:19

Tu-in note lakah mi khat peuhpeuh a thatte le a kithat sa a lawng mi peuhmahte, giahphual pua ah ni sagih sung om un. A ni thum ni le a ni sagih ni-in note le na galmatte uh na kisiansuah ding uh hi.

Sawltak 10:28

amaute kiangah, “Note mahmah in zong limtakin na theih ciat uh mah bangin Jew mite pen minam dangte kiangah hawhin a kikholh ding a ngeina hi lo hi. Ahi zongin mi khat peuhpeuh a nin hi, ci-in ka ngaihsut loh nadingin Pasian in kei tungah a thu hong lak khinzo hi.

Sawltak 27:24

‘Paul aw, lunghimawh kei in. Gam uk kumpipa mai ah na ding dinga, Pasian in nang hong hehpih ahih manin nang le na khualzinpihte khempeuh na suakta ding uh hi,’ hong ci hi.

1 KORIN MASA 5:12

Tua bang a pualam mite mawhsakin thu ka khen ding keiʼ nasep hi lo hi. Pasian in amauteʼ thu khen ngawn ding hi. Ahi zongin note in na pawlpih uh mite tungah thu na khen ding uh ahi hi. Lai Siangtho in, “Note lak panin migilo pa na la khia un,” na ci hi.

Efesa 2:12

Tua hun lai-in Khris tawh na kikhen uh a, Pasianʼ teel Israel minamte hi loin a pualam mite na hi uh hi. Pasian in ama mite tungah piak dingin a ciam thute zong a ngah dingte na hi kei uh a, Pasian a nei lo, lamet ding bangmah nei loin leitungah a om na hi uh hi.

Hebru 11:31

Numei paktat Rahab in thukante limtakin na zin do a, Pasianʼ thu a mang lo mite tawh a sih khawm lohna zong a upna hang mah ahi hi.

Hebru 11:7

Noah in zong a upna hang mah tawh mailam a thupiang ding a muh theih lohpi mahin Pasianʼ thugenna na mang a, teembaw khat bawlin a innkuanpihte tawh na suakta hi. Hih bangin a gamtatna tawh leitung midangte a mawh ahihna kilangsak a, a upna hangin mihoih hihna thu Pasian kiang panin a ngah hi.

Joshua 2:13

Ka nu, ka pa, ka sanggam nute, ka sanggampate le amaute tawh a kizomte khempeuh hong hon unla, sihna panin kote hong suaktasak un,” a ci hi.

Joshua 2:16

Amah in amaute kiangah, “Mual tungah pai un. Hong delhte tawh na kituak kha ding uh hi. Hong delhte hong ciahkik mateng ni thum sung tua lai ah bu un. Tua khit ciangin na pai nading uh ah na pai thei ding uh hi,” a ci hi.

Joshua 2:18

En in, hih leitang ah kong pai uh ciangin kote nong khai sukna hih tawlet ah hih khauhual san na khih ding hi. Na inn sungah na nu le na pa, na sanggamte le na paʼ innkuanpihte khempeuh na khawm ding hi.

Thukhente 1:25

Tua ciangin amah in khuapi sung lutna lampi amaute a lak hi. Amaute in namsau tawh tua khuapi mite vat uh a, ahih hangin tua mipa le a innkuante suaktasak uh hi.