Johan 19:11 - Tedim Bible Revision 2017

¹¹ Jesu in, “Pasian in nang tungah hong pia lo hileh kei tungah thu na nei het kei ding hi. Tua ahih manin nangma khut sungah kei hong apteʼ mawhna lian zaw hi,” ci-in a dawng hi.

Tedim Bible

¹¹ Zeisu in, “Tung lam pan thu na ngah kei leh, kei tungah bangmah na hih thei kei ding hi. Tua ahih ciangin nangma khut sungah kei a hong piapa in khialhna golzaw a nei hi,” ci-in a thuk hi.

Johan 19:11 Iomraidhean Croise

1 KHANG TANGTHU MASATE 29:11

Topa aw, liatna, vangliatna, minthanna, gualzawhna le min liatnate nangma aʼ ahi hi; bang hang hiam cih leh vantung le leitungah a om khempeuh zong nangma aʼ ahi hi. Topa aw, kumpi gam nangma aʼ hi a, tuate khempeuh tungah nang a lutangin hong kisangsak hi.

Late 39:9

Hih bangin a hong bawl nangmah na hih manin pau loin ka om a, ka kam ka ka kei hi.

Late 62:11

Vangliatna pen keima aʼ hi, ci-in Pasian in a genna ka zak ngeingei sa ahi hi.

Kah la 3:37

Topaʼ deihna bang bekin na khempeuh a piang ahi hi.

Daniel 4:17

Hih pen a vil, a patau vantungmiʼ thukhenna ahi hi. Tua ahih ciangin mun khempeuh ah a om mi khempeuhte in, a Lian Pasian in miteʼ kumpi gamah vai a hawm hi, cih a thei ding uh hi. Amah in a teel peuhpeuh a neu pente nangawn kumpi a suaksak thei ding hi,’ a ci hi.

Daniel 4:25

Mite sung panin hong kihawl khia dinga, gamsate tawh na teeng khawm ding hi. Bawngtal bangin lopa na ne dinga, a pua lamah lumin, kum sagih sung na tungah daitui a hong kia ding hi. Tua ciangin a Lian Pasian in mihingteʼ kumpi gam uk a, a teel mi peuhpeuh kumpi suaksak thei hi, na ci ding hi.

Daniel 4:32

Mite lak pan hong kihawl khia dinga, gamsate tawh na teeng khawm ding hi. Bawngtal bangin kum sagih sung lopa na ne ding hi. Tua ciangin, Pasian in mihingteʼ kumpi gam uk a, a teel mi peuhpeuh kumpi a suaksak thei hi, na ci ding hi,” a ci hi.

Daniel 4:35

Amah in leitung mite bangmahin a sim kei a, vantung mite le leitung mite ama khutnuai ahi hi. Ama deihna kuamah in nial thei lo a, a bawlnate kuamah in a hang a kan thei kei hi.

Daniel 5:21

Mihingte lak panin amah kihawl khia a, ganhing lungsim a nei hi. Gam sakolte tawh teeng khawmin, bawngtal bangin lopa ne a, daitui dal ding nei loin a pua lamah a lum hi. A tawpkhakna ah a Lianpen Pasian in mihingteʼ kumpi gamte uk a, a teel peuhpeuh kumpi suak hi, ci-in a phawk thei hi.

Mattiu 26:65

Tua ciangin siampi lianpen pa in a puan bal kek a, “Pasianʼ tungah a pau khial zo hi. Bang thudang kisam nawn ahi hiam? A paukhialhna na za uh hi.

Mattiu 27:2

Sikkhau tawh khihin paipih uh a, tua gam sungteng a uk Pilat mangpa khut sungah a ap uh hi.

Mattiu 6:13

Ze-etna lian hong thuaksak keʼn. Giloʼ kiang pan hong hon khia in,’ (Uk zawhna, vangliatna, minthanna, na nei tawntung hi. Amen.) ci-in na ngen ding uh hi.

Marka 14:44

A lehhek pa in mihonte tungah, “Ka nap pa pen Jesu hi ding hi. Tua pa man unla limtakin cingin paikhiatpih un,” ci-in a gen khol hi.

Luka 22:53

Nisimin biakinn ah note tawh ka om khawm a, bangmah nong cih kei uh hi. Ahi zongin hih hun pen nomauʼ hun hi a, khuamial sung a uk Satanʼ vangliat hunsung ahi hi,” a ci hi.

Johan 18:13

tua kumin siampi lianpen a sem Kaiafasʼ sungpa Annas kiangah a paipih masa uh hi.

Johan 18:3

Tua ahih manin Judas zong, siampi liante le Farisi mite in a sawl galkap hon khat le biakinn cing palik pawl khat tawh hiam tawi-in lalcin leh meilah de-in tua huanah a hong pai uh hi.

Johan 19:10

“Hong dawng lo ding na hi hiam? Nang thah theih nading le khah theih nading thu ka neih lam phawk lo na hi hiam?” a cih ciangin

Johan 3:27

Johan in, “Pasian in hih theih nading thu pia kei leh kuamah in bangmah hih thei lo hi.

Johan 7:30

Tua ciangin amaute in Jesu mat ding hanciam uh hi; ahi zongin ama hun tung nai lo ahih manin kuamah in va su lo hi.

Johan 9:41

Jesu in, “A mittaw hi le-uhcin mawhna tawh na kipelh ding uh hi. Ahi zongin khua mu thei ung, ci na hih manun na mawhna uh a ngei mahin a om lai ahi hi,” ci-in a dawng hi.

Sawltak 2:23

Pasian in thu a ma-theih kholhna le a ma-geelna tawh kizui-in noteʼ khut sungah tua Jesu a hong piak ding a ngaihsut sa hi a, note in singlamteh tungah khai-in migiloteʼ khut tawh amah na that uh hi.

Sawltak 3:13

I pupite Abrahamʼ Pasian, Isaacʼ Pasian le Jakobʼ Pasian in a nasem Jesu tungah ama vangliatna a pia hi. Note in aana neite khut sungah tua Jesu na pia uh a, Pilat mangpa in amah khah dingin a ngaihsut khit nangawnin Pilatʼ maitang mahah amah na nial teitei uh hi.

Sawltak 4:28

Nangmah in na deihna bangin a piang dingin na vangliatna tawh na khensat sa thu khempeuh a sem dingin amaute kikhawm uh hi.

ROM (Romans) 11:36

Bang hang hiam cih leh na khempeuh ama piansak hi a, na khempeuh ama hang le ama minthan nading bekin a om ahi hi. Mi khempeuh in Pasian phat tawntung tahen! Amen.

ROM (Romans) 13:1

A kuamah peuh in hong ukteʼ thu na mang ciat un. Bang hang hiam cih leh Pasianʼ thukimpih lohin kuamah in ukna thu nei lo hi; ukna thu nei i cih mite pen Pasianʼ koih mite ahi hi.

Jeim 1:17

A hoih thu le na khempeuh, Pasian kiang panin hong pai hi a, vantung khuavak a Piangsak pa ahih manin amah kikheel ngei lo a, amah a kihei manin khua zong mial tuan lo hi.

Jeim 4:17

A hoih a manin gamtat ding thei napi-in a gamta lote a mawh ahi hi.