Johan 15:21 - Tedim Bible Revision 2017

²¹ Ahi zongin amaute in kei hong sawl pa thei lo uh ahih manin keima mi na hihna uh hangin amaute in hih bangin hong bawl ding uh ahi hi.

Tedim Bible

²¹ Amau in kei hong sawlpa thei lo uh ahih ciangin, ka min hangin tua thu khempeuh no tungah hong bawl ding uh hi.

Johan 15:21 Iomraidhean Croise

Late 69:7

Bang hang hiam cih leh nangma hangin kona ka thuak a, maizumna in kei hong pumtuam khinta hi.

Isaiah 66:5

Ama thu ah lau-in a liing mite aw, Topa’ thu za un: Keima tungah note nong cihtakna hangun na mipihte uh pawl khat in note hong mudahin hong hawl khia ding uh a, zahpihna tawh note hong hopihin, “Lungdamin na om ding uh hong deihsak ka hih manun, Topa in ama liatna hong lak henla, note hong hon khia tahen,” hong ci vial ding uh hi. Hih banga hong paute pen mindaina a thuak ding mite ahi uh hi.

Mattiu 10:18

Keima hangin gam ukte le kumpite mai ah thu hong kisit ding hi. Hih bang na tuah uh ciangin thu hong sit mite le Gentail mite tungah Lungdamna Thu gen theih nading hunhoih a nei na hi uh hi.

Mattiu 10:22

Keima hangin Gentail mi khempeuh in note hong mudah ding uh hi. Ahi zongin a tawp dongin a thuak zo mite in hotkhiatna a ngah ding uh hi.

Mattiu 10:39

Hih leitung nuntakna a hon nuamte in a nuntakna taktak taanlawh dinga, keima hangin a nuntakna a taanlawhte in a nuntakna taktak a ngah ding uh hi.

Mattiu 24:9

“Tua ciangin note hong kibawlsia in hong kithat dinga, keima hangin Gentail mi khempeuh in note hong mudah ding uh hi.

Mattiu 5:11

“Midangte in keima hangin a man lopi-in hong simmawhin hong bawlsia a, a nam tuamtuamin hong gensiat uh ciangin thupha ngah mi na hi uh hi.

Marka 13:13

Keima hangin Gentail mi khempeuh in note hong mudah ding uh a, ahi zongin a sih dongun a thuak zote in hotkhiatna a ngah ding uh hi.

Luka 21:12

Ahi zongin hihte khempeuh hong pian ma-in keima hangin note hong kimanin hong kibawlsia ding hi. Kikhopna innte ah thusitna thuakin thong ah khiat dingin hong ki-ap dinga, ukpite le kumpite mai ah hong kipaipih ding hi.

Luka 21:17

Mi khempeuh in keima hangin note hong mudah ding uh hi.

Luka 6:22

“Mihing Tapaʼ hangin mite in hong mudahin hong tuam koih a, hong simmawhin migiloin hong seh ciangin thupha ngah na hi uh hi.

Johan 15:24

Kuamah in a bawl ngei loh nalamdangte amaute lakah a bawl lo hi leng amaute in mawh pua lo ding uh hi. Ahi zongin amaute in ka nalamdang bawlte mu khin uh ahih manin kei le ka Pa a hong mudah khawm uh ahi hi.

Johan 16:3

Amaute in ka Pa ahi a, kei ka hi zongin hong thei lo uh ahih manin tu-a bangin note a hong bawl ding uh ahi hi.

Johan 17:25

A Thuman ka Pa aw, leitung mite in nang hong thei lo uh hi. Ahi zongin keimah in nang ka hong thei a, kei na hong sawlna thu hih mite in zong a thei uh hi.

Johan 8:19

Tua ciangin amaute in, “Na pa koi ah om ahi hiam?” ci-in dong uh a, Jesu in, “Kei ka hi a, ka Pa ahi zongin na hong thei kei uh hi. Kei hong thei hi le-uhcin ka Pa zong na thei ding uh hi,” ci-in a dawng hi.

Johan 8:54

Jesu in, “Kei le kei a kipahtawi hi leng ka kipahtawina a mawkna hi ding hi. Ahi zongin kei hong pahtawi pa pen ka Pasian uh ahi hi, na cih uh keima Pa ahi hi.

Johan 8:55

Note in amah na thei ngei kei uh a, ahi zongin keʼn ka thei hi. Amah ka thei kei hi, a ci hi leng, note mah bangin kei zong a zuau ka hi ding hi. Ahi zongin keʼn amah thei ka hih manin ama thu ka mang hi.

Sawltak 17:23

Na khua sung uh ah ka pai kawmin na biakna munte uh ka et ciangin, ‘A kithei lo Pasian ading,’ ci-in biakna tau tungah lai a kigelh nangawn ka mu hi. Tu laitakin keiʼ kong pulak Pasian pen, thei lo napi-in na biakbiak uh Pasian ahi hi.

Sawltak 26:9

“Nazareth khuami Jesuʼ min a siattheih nadingin langpangin nial ding hi, ci-in kei mahmah in ka ngaihsun ngei hi.

Sawltak 3:17

“Tua ahih ciangin sanggamte aw, note le na makaite uh hih bangin Jesu tungah na gamtatna uh na theih lohna hang uh hi, ci-in ka thei hi.

Sawltak 4:17

Ahi zongin mite lakah hih thute a kitheihthang thuah loh nadingin, Jesuʼ min tawh kuama kiangah thu a gen ngei nawn loh nadingun taii ni,” a kici uh hi.

Sawltak 5:41

Uliante omna panin sawltakte paikhia uh a, Jesuʼ hangin mindaina a thuak dingin Pasian in kilawm hong sa hi, ci-in ngaihsun uh ahih manin a lungdam mahmah uh hi.

Sawltak 9:14

Tu-in zong nangmah a hong bia mi khempeuh a mat theih nadingin siampi liante tung panin thu a ngah khit ciangin Damaskas khua ah a hong tung ahi hi,” a ci hi.

Sawltak 9:16

Keima hangin a thuak ding thu khempeuh zong, kei mahmah in ama tungah ka gen ding hi,” a ci hi.

ROM (Romans) 1:28

Mite in a man ahi Pasianʼ thu ngaihsutin nei nuam lo uh ahih manin amauteʼ ngaihsut hoih lo bangin a gamtat theih nadingun Pasian in a khah khia hi. Tua ahih manin a gamtat dingun a kilawm lo pipi-in a gamta uh hi.

1 KORIN MASA 15:34

Hoihtakin thu ngaihsun phakik unla, mawhna gamta nawn kei un. Note pawl khat in Pasian thei het lo na hih manun maizumhuai mahmah hi.

1 KORIN MASA 2:8

Hih leitung a uk mite kuamah in hih pilna thu thei lo uh hi. Thei hi le-uh, a minthang Topa pen singlamteh tungah na that lo ding uh hi.

2 THESALONIKA NIHNA 1:8

Pasian a thei lo mite le i Topa Jesu tawh kisai Lungdamna Thu a um lo mite tungah gimna a tungsak ding hi.

1 JOHAN MASA 3:1

Pa Pasian in eite bangzah takin hong itna thu thei un. Ama hong itna lian mahmah ahih manin eite pen Pasianʼ tate hong kici a, hong kicih mah bang ihi takpi hi. Leitung mite in tu hun ciang dong Pasian thei lo uh ahih manin eite zong a hong thei lo uh ahi hi.

3 JOHAN THUMNA 1:7

Amaute pen Pasianʼ nasem dingin a khualzin khia uh hi a, thu um lo mite tung panin bangmah huhna ngah lo uh hi.

Mangmuhna 2:3

Note in lungduai takin thuakin, keima min hangin thuak zo-in, lungkia het loin na omna uh ka thei hi.