Johan 12:34 - Tedim Bible Revision 2017

³⁴ Tua ciangin mihonte in, “Khris nungta tawntung ding hi, ci-in Thukham sungah kigen hi. Bang hangin Mihing Tapa kikhai to ding ci na hi hiam? Hih Mihing Tapa kua ahi hiam?” a cih uh ciangin

Tedim Bible

³⁴ Tua hi a, mihonpite in, “Khazih a om tawntung ding hi,’ ci-in Thukhamna sungah ka za zo uh hi. Tua bang ahih leh, ‘Mihing Tapa in kikhaina a thuak ding hi,’ bang hangin ci na hi hiam? Hih Mihing Tapa kua mi ahi hiam?” ci-in a dong uh hi.

Johan 12:34 Iomraidhean Croise

2 SAMUEL NIHNA 7:13

Amah in keima min dingin biakinn khat lam dinga, keimah in ama kumpi gam tokhom a tawntungin ka kipsak ding hi.

Late 110:4

Topa in thu ciam zo a, ama ngaihsutna kheel lo ding hi. “Melkhizedek bangin a tawntungin siampi na hi hi,” a ci hi.

Late 72:7

Ama hun sungin thuman pung henla, khapi a bei mateng nopna om tahen.

Isaiah 53:8

Nenniamna le thukhenna tawh amah kipaikhiat pih hi. A hingteʼ gam panin amah kikhen khia-in, ama miteʼ khialhna hangin amah in gimna thuak hi, ci-in ama khang mite kua in thei ahi hiam?

Isaiah 9:7

Tu hun a kipanin a tawntungin David kumpi tokhom tung le ama gam sungah thutang le thuman phutin, a lian semsem ama ukna le nopsakna in mong nei lo ding hi. Vanglian Topa’ deih luatna in hih thu hong tungsak ding hi.

Daniel 2:44

Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo zo lo dinga, tua gam in gamdang khempeuhte zo gawpin a kip tawntung ding hi.

Daniel 7:14

Amah in vangliatna, minthanna le kumpi za ngah ahih manin minamkimte, minam tuamtuamte, pau nam tuamtuamte khempeuh in ama na a sem ding uh ahi hi. Amah in a tawntungin uk dinga, a kumpi gam a bei ngei kei ding hi.

Daniel 7:27

“Hih leitung kumpi gam, vangliatna le liatna khempeuh a Lianpen Pasianʼ mite tungah a kipia ding hi. Amauʼ kumpi za cikmah hunin bei ngei lo dinga, leitung ukna za a nei khempeuhte in a thu uh mangin amauteʼ na a sem ding uh hi,” hong ci hi.

Micah 4:7

Amaute, a cimawhin gamlapi ah om uh a, ahi zongin keimah in amaute pansa kikin, minam vanglian khatin ka bawlkik ding hi. Tua hun a kipan a tawntungin Zion mual panin amaute ka uk paisuak ding hi.

Mattiu 16:13

Sisaria Filippi gam a tun uh ciangin Jesu in a nungzuite kiangah, “Mite in Mihingʼ Tapa kei kua hi hong ci uh ahi hiam?” ci-in a dong hi.

Mattiu 21:10

Jerusalem khua sung a tun uh ciangin khua sung mi khempeuh gamlum henhan uh a, “Hih pa kua ahi hiam?” ci-in khatlekhat a kidong uh hi.

Mattiu 8:20

Jesu in, “Ngiate in lup nading kua nei uh a, vasate in zong giah nading bu nei uh hi. Ahi zongin Mihingʼ Tapa in a luptheih nading mun koi mahah nei lo hi,” ci-in a dawng hi.

Johan 10:34

Tua ciangin Jesu in, “Na Thukham sung uh ah Pasian in, ‘Note pen pasian-te na hi uh hi,’ ci hi.

Johan 12:32

Leilak panin kei hong kikhai toh ciangin ka kiangah mi khempeuh ka kai ding hi,” a ci hi.

Johan 15:25

Amauteʼ Thukham sungah, ‘Thu om lopi-in kei hong mudah uh hi,’ ci-in a kigelhna thu a tun theih nadingin a hici mah ding ahi hi.

Johan 8:28

Tua ahih manin Jesu in, “Mihing Tapa na khai khit uh ciangin ‘Kei kua ka hi hiam?’ cih thu na hong thei ding uh hi. Tua hun ciangin keiʼ thu bek tawh bangmah hih loin, ka Paʼ hong hilh sa teng bek a gen ka hihna thu na thei ding uh hi.

ROM (Romans) 3:19

Tua ahih manin kuamah in paulap a zon theih loh nading le mi khempeuh in Pasianʼ thukhenna a thuak theih nadingin Thukham a nei mite khempeuh in tua Thukham a zuih ding uh ahihna thu i thei hi.

ROM (Romans) 5:18

Tua hi a, khialhna khat in mi khempeuh tungah thukhenna tungsak ahih mah bangin gamtatna hoih khat mah in mi khempeuh khahin nungtasak hi.

Hebru 7:24

Ahi zongin Jesu nungta tawntung ahih manin midang tungah a nasep ki-ap nawn loin a mahmah in siampi nasep sem paisuak hi.