Johan 1:12 - Tedim Bible Revision 2017

¹² Tua bang hitaseleh ama thu ngai-in amah a um mite khempeuh tungah Pasianʼ tate suah theih nading thu a pia hi.

Tedim Bible

¹² Ahih hangin amah sang a, ama min a umte khempeuh in Pasian’ tate suah theih na’ng thu a pia hi.

Johan 1:12 Iomraidhean Croise

2 SAMUEL NIHNA 7:24

Nangmah in nangma mi ahi tawntung dingin na mi Israel-te nangma adingin na kipsak hi. Topa aw, nangmah, amauteʼ Pasian na suak hi.

Isaiah 56:5

ka inn sung le ka huang sungah tanu le tapate sangin a hoih zaw phawkna le min ka pia dinga, a mang ngei nawn lo ding a kip tawntung min amaute tungah ka pia ding hi.

Jeremiah 3:19

“‘Israel aw, ka tapa bangin nang hong bawlin, gam khempeuh lakah a hoih pen gam nopci mahmah khat nang hong pia ning, ci-in ka ngaihsun hi.

Hosea 1:10

Ahi zongin, teh zawh loh, sim zawh loh zah dongin tuipi sehnel bangin Israel mite tampi pha ding uh a, tua hunin, “Note ka mi hi lo,” a kicih hangin ni khat ni ciangin, “A nungta Pasianʼ tate,” kici ding hi.

Mattiu 10:40

“Na thugen uh a hong sangte in keiʼ thu a hong sang hi a, kei a hong sangte in kei a hong sawl pa zong a sang ahi uh hi.

Mattiu 12:21

Gentail mite in amah bek mah lametin nei ding uh hi,” ci hi.

Mattiu 18:5

Keima min hangin hih bang naupang khat a limbawl mi in kei zong hong limbawl ahi hi.

Johan 1:11

A khua le a tui ah va pai a, ahi zongin a khuapih a tuipihte in ama thugen na ngai lo uh hi.

Johan 1:7

mi khempeuh in ama thugenna za-in tua khuavak a up theih nadingun tua khuavak thu a gen dingin a hong pai ahi hi.

Johan 11:52

Jew mite ading bek hi loin a kithehthang Pasianʼ mi khempeuh pum khat a suah nadingin a kikaihkhop nading thu zong a gen khol ahi hi.

Johan 2:23

Paisan Pawi hun laitakin Jerusalem khua sungah Jesu a om sungin Jesu in vangliatna tawh nalamdang a bawlte mu uh ahih manin mi tampi in amah a um uh hi.

Johan 20:31

Hih laibu sungah a kigelh thute pen Jesu, Pasianʼ Tapa, Khris ahihna thu na up theih nading uh le ama min hangin tua upna tawh nuntakna na ngah theih nading uh deihna tawh a kigelh ahi hi.

Johan 3:18

Amah a um mite in mawhsak thukhenna thuak lo ding uh hi. Amah a um lote pen Pasianʼ Tapa neihsun um lo uh ahih manin mawhsak thukhenna a thuak khinta uh ahi hi.

Sawltak 3:16

Hih Jesu minʼ vangliatna in hih khebai mipa tungah thahatna a pia ahi hi. Note khempeuh in na theih uh mah bangin hih mipa bangzah takin khebai ahih hangin Jesu upna le ama min hangin hih mipa in dam sianthona a ngah ahi hi.

ROM (Romans) 8:14

Pasianʼ Kha Siangtho in a makaih mite, Pasianʼ tate ahi uh hi.

ROM (Romans) 8:16

Eite, Pasianʼ tate ihihna thu eima lungsim bek in a gen hi loin Pasianʼ Kha Siangtho in zong hong genpih hi.

ROM (Romans) 8:19

Pasianʼ bawl sa khempeuh in Pasianʼ tate a hong kilahkhiat hun ding lawp mahmah in a ngak uh hi.

Galati 3:26

Khris Jesu tawh na kipawl manun note khempeuh Pasianʼ tate na suah theihna uh pen na upna hang uh ahi hi.

Galati 4:6

Note pen ama tate na hihna uh a hong lah nadingin Pasian in ama Tapaʼ Kha Siangtho, eite sungah hong tumsak a, tua Kha Siangtho in Pasian pen, “Pa aw, pa aw,” hong cisak hi.

Kolose 2:6

Note hong honpa dingin Topa Khris na san sa uh ahih mah bangin amah tawh hoihtakin kipawlin nungta un.

2 PETER NIHNA 1:4

Amah in piak dingin a hong ciam a manpha mahmah nate hih bangzia-in hong pia a, hih ama hong piak nate hangin leitungah a om siatna a piangsak thei duh luatna le deih luatnate panin na suakta uh a, Pasianʼ pian ziate na nei uh hi.

1 JOHAN MASA 3:1

Pa Pasian in eite bangzah takin hong itna thu thei un. Ama hong itna lian mahmah ahih manin eite pen Pasianʼ tate hong kici a, hong kicih mah bang ihi takpi hi. Leitung mite in tu hun ciang dong Pasian thei lo uh ahih manin eite zong a hong thei lo uh ahi hi.

1 JOHAN MASA 3:10

Hih pen Pasian tate le Dawimangpaʼ tate a kilamdanna ahi hi. A manin gamta loin, a Khristian mipihte a it lo mi peuhmah, Pasianʼ tate hi lo uh hi.

1 JOHAN MASA 3:2

Ka lawm itte aw, eiteʼ pianzia ding taktak a telin hong kilat nai loh hangin tu-in Pasianʼ tate ihi hi. Ahi zongin Khris hong kilat ciangin ama pianzia ahi bang teekteekin mu ding ihih manin amah i bat nading thu teltakin i thei hi.

1 JOHAN MASA 3:23

Ama hong thupiakna in: A Tapa Jesu Khris umin zui-in, Khrisʼ hong sawl bangin eite khatlekhat i ki-it ding ahi hi.