Joel 3:18 - Tedim Bible Revision 2017

¹⁸ Tua hun ciangin mual tung khempeuh leenggui lo hi dinga, mual neute khempeuh tungah bawng hon dim dinga, Judah gam sung khempeuh ah tui tampi om ding hi. Topaʼ biakinn panin luitui khat hong luang khia dinga, Shitthim kuam sung khempeuh a kawtsak ding hi.

Tedim Bible

¹⁸ Tua hun ciangin mual tung gam khempeuh leenggui lo hi ding a, mual neute khempeuh tungah bawng nawi luang ding a, Judah gam sung khempeuhah tui tampi om ding hi. Topa’ biakinn panin lui tui khat hong luang khia ding a, Shittim kuam khempeuh kawtsak ding hi.

Joel 3:18 Iomraidhean Croise

JOB (Job) 29:6

Ka bawngte le ka keelte in nawi deih zahzah hong pia uh a, suang tam penna nangawn ah ka oliv kungte hoih mahmah hi.

Late 46:4

Sangpen paʼ teenna khua siangtho, Pasianʼ khuapi, a lungdamsak gun khat a om hi.

Paikhiatna 3:8

Egypt miteʼ khut sung panin amaute khah khia-in, tua leitang panin amaute la khia-in a hoih a tanzau leitang, bawngnawi le khuaizu a luanna leitang, Kanaan mite, Hit mite, Amor mite, Perez mite, Hiv mite le Jebus miteʼ omna ah amaute a paipih dingin kong pai suk hi.

Isaiah 30:25

Na galte uhʼ tausangte pukin mi tampi a sih ni-in, mual sang le mual neute tung khempeuh ah luitui luang ding hi.

Isaiah 35:6

Tua ciangin khebai mipa diangin lam dinga, a pau thei lo mipa in lungdamin la sa ding hi. Bang hang hiam cih leh gamlak ah tui hong phul khia dinga, sehnel gam sungah luitui hong luang ding hi.

Isaiah 44:3

“Bang hang hiam cih leh a dangtak leitang tungah tui ka sung dinga, lei keu tungah luitui ka luangsak ding hi. Na suanlekhakte tungah ka kha ka sung dinga, na tu na tate tungah ka thupha ka pia ding hi.

Isaiah 45:8

Vantungte aw, tung lam panin thuman zusak unla, vantungte in thumanna bua suk ta un. Hotkhiatna a pokhiat theih nadingin leitang kihongsak unla, thumanna zong po khia tosak un. Keimah Topa in hih thu ka bawl khinzo hi.

Isaiah 55:1

A dangtak mi peuhmah tui phualah hong pai un. An nei lote aw, hong pai unla hong ne un! Hong pai un; a man ding bangmah piak kul loin leenggahzu le bawngnawi na duh zahzah uh hong ne un.

Jeremiah 31:12

Amaute hong pai-in Zion mual tungah ngaih takin la sa ding uh a, Topaʼ hehpihna ahi, buh, leenggahzu, sathau le tuuno, bawngnoteʼ hangin amaute a lungdam mahmah ding uh hi. A nuntakna uh, tui a kibuak huan bang dinga, lungkham nawn lo ding uh hi.

Micah 6:5

Ka mite aw, Moab Kumpi Balak in note sukna ding a vaihawmna teng, Beorʼ tapa Balaam in ama nget bangin a sepna teng limtakin phawkkik un. Note hotkhiat nadingin ka sepna thu na theih nadingun Shittim le Gilgal kikal a thupiangte ngaihsunkik un,” a ci hi.

Zekhariah 14:8

Tua ni hong tun ciangin Jerusalem khua panin tuicim hong luang khia dinga, kim khat, nisuahna lamah a om Si Tuipi ah luang dinga, kim khat, nitumna lamah a om Mediterranean Tuipi ah luang ding hi. Tua tui in kan hun cih nei loin luang tawntung ding hi.

Gamlak-vakna 25:1

Shittim ah Israel mite a om laitakin Moab gam numeite tawh paktat ding kipan uh hi.