Jeremiah 11:4 - Tedim Bible Revision 2017

⁴ Tua pen na pute na pate uh, sik haltuina meikhuk tawh a kibang Egypt gam pan a ka lakkhiat ni-a ka thuciamna ahi hi. Tua ni-in, ka thu hong ngai-in kong thupiakna bangin na sep uh leh, note ka mi na hi ding uh a, kei pen noteʼ Pasian hi-in,

Tedim Bible

⁴ Na pute na pate uh, sik haltuina meikhuk tawh a kiang Izipt gam pana ka lakkhiat ni-a ka thuciammna ahi hi. Tua ni-in, ka thu hong ngai a, kong thupiakna bangin na sep uh leh, note ka mi na hi ding uh a, keimah in note’ Pasian hi-in,

Jeremiah 11:4 Iomraidhean Croise

Piancilna 17:8

Nangma tung le nangʼ khit cianga na suanlekhakte tungah tawl khat na omna Kanaan leitang khempeuh na neih tawntung dingun kong pia dinga, kei pen amauteʼ Pasian ka hi ding hi,” a ci hi.

1 KUMPI MASATE 8:51

(Bang hang hiam cih leh amaute pen Egypt panin na paikhiatpih, sik meiphual sung panin na paikhiatpih nangma mi le nangma luah ahi uh hi.)

2 KUMPI NIHNATE 18:6

Bang hang hiam cih leh amah in Topa kip takin len hi. Amah zuihna panin kihem khia lo a, Topa in Moses tungah a gen thupiaknate a zui hi.

Paikhiatna 20:6

ahih hangin kei hong itin ka thupiakte a zui mi a tul tampite tungah itna kip a lak pa ka hi hi.

Isaiah 30:6

Negeb gam a om ganhingte tawh kisai thu hih bangin gen hi: Amaute in humpinelkai nu le humpinelkai pa, gul gunei le a leeng thei gulpi a omna, lungkhamna le gimna gam nawkin, amauʼ hauhnate la nungzang ah amauʼ sumte kalaoh tungah suanin, amaute tungah phattuamna bangmah a pia thei lo mite tungah a puak uh hi.

Isaiah 48:10

Meikhuk sungah ngun a kisiansak bangin gimna meikhuk sungah note kong ze-et hi. Ahi zongin note bangmahin a kimang lo na hihna uh hong kimu khin hi.

Jeremiah 11:7

Bang hang hiam cih leh Egypt gam panin ka lakkhiat pan a kipan tu ni ciang dong ka thu hong mang un, ci-in na pute na pate uh tungah tam veipi nakpi takin ka hilh ngitnget hi.

Jeremiah 24:7

Keimah Topa ka hih lam theihtheihna lungsim ka pia ding hi. A lungsim khempeuh uh tawh kei kiangah hong kileh ding uh ahih manin amaute ka mi ahi ding uh a, kei pen amauteʼ Pasian ka hi ding hi.

Jeremiah 26:13

Tua ahih manin tu-in na nuntak dante uh le na gamtat ziate uh kheel unla, Topa na Pasian uh thu ngai un. Tua hileh Topa in noteʼ kisiatna ding a gen sa thu a kheelkik ding hi.

Jeremiah 30:22

Tua ciangin note, ka mite na hi ding uh a, kei pen noteʼ Pasian ka hi ding hi,” a ci hi.

Jeremiah 32:28

Tua ahih manin, Topa in kong cih in ah: En in, hih khuapi Khaldea miteʼ khut sung le Babylon kumpipa Nebukhadnezzarʼ khut sungah ka pia dinga, amah in a la ding hi.

Jeremiah 38:20

Kei zong, “Amauteʼ kiangah nang hong kipia lo ding hi. Tu-a kong gen bangin Topaʼ thu mang in. Tua hileh nang adingin hoih dinga, na nuntakna hong kimap ding hi.

Ezekiel 11:20

Tua ciangin amaute in ka thukhamte zui-in ka thupiak khempeuh citakin mang ding uh hi. Amaute pen keima mi hi-in, kei pen amauteʼ Pasian ka hi ding hi.

Ezekiel 14:11

Israel mite in kei hong nusiat loh nading le a mawhna uh tawh a kinitsak loh nadingun hih bangin ka hih ding hi. Amaute pen keima mi hi ding uh a, kei pen amauteʼ Pasian ka hi ding hi. Topa Pasian ahi keimah in hih thu ka gen hi,” a hong ci hi.

Ezekiel 36:28

Tua ciangin na pu na pate uh tungah ka piak sa gamah na teeng ding uh a, note pen keima mi hi-in, kei pen noteʼ Pasian ka hi ding hi.

Ezekiel 37:23

Amaute pen a muhdahhuai milimte tawh kininsak nawn lo ding uh a, mawhnate tawh zong kininsak nawn lo ding uh hi. Amauteʼ mawhna le kei hong leh heknate panin ka suaktasak ding hi. Amaute a siangtho mi-in ka bawl dinga, amaute keima mi hi-in, kei, amauteʼ Pasian ka hi ding hi.

Ezekiel 37:27

Amaute tawh teeng khawmin, amauteʼ Pasian ka hi dinga, amaute pen keima mite hi ding uh hi.

Daniel 3:26

Tua ahih ciangin Nebukhadnezzar zong mei phualpi kong gei ah pai to a, “Shadrak! Meshak! Abednego! A lianpen Pasianʼ nasemte hong paikhia un,” ci-in a sam hi. Tua ciangin amaute zong thakhatin a hong paikhia pah uh hi.

Siampi Laibu 26:12

Keimah, noteʼ lakah omin noteʼ Pasian ka hi dinga, note, keima mite na hi ding uh hi.

Siampi Laibu 26:3

“Note in ka thukham zui-in, ka thupiaknate mangin tuate na sep uh leh,

Zekhariah 13:9

Tua a suakta seh khatte pen meikhuk ah ngun a kisiansak bangin, meikhuk ah kham a kize-et bangin, meikhuk ah ze-etin ka siangsak ding hi. Amaute in kei tungah thu hong ngenin, kei zong amauʼ thungetna ka pia ding hi. Keima mi ahihna uh amaute tungah ka gen dinga, amaute in kei pen amauʼ Pasian ka hihna thu a kam uh tawh pulak ding uh hi,” a ci hi.

Zekhariah 6:15

Gamlapi-a a teeng mite hong pai-in Topaʼ inn lam nasep hong huh ding uh hi. Tua biakinn a kilamkik ciangin Vanglian Topa in note kiangah kei a hong sawl ahihna thu na thei ding uh hi. Topa na Pasian uhʼ thupiaknate cing takin na zuih nak uh leh tu-a ka gen bangin a hong piang ding ahi hi.

Zekhariah 8:8

Jerusalem khua sungah ka tunpihkik ding hi. Amaute pen keima mi hi-in, kei zong amauʼ Pasian ka hi dinga, amau tawh ka thuciamnate limtakin ka zui ding hi.

Mattiu 28:20

Tua ciangin note tungah kong gen thute khempeuh a zuih nadingun na hilh un. Hun bei dongin note a hong ompih tawntung ding ka hihna thu phawk ta un,” a ci hi.

2 KORIN NIHNA 6:16

Pasianʼ biakinn le lawkiteʼ milim bangci kilem theih ding ahi hiam? Bang hang hiam cih leh Pasian in, “Ka mite lakah teengin amaute tawh ka om khawm ding hi. Kei pen amauteʼ Pasian ka hi dinga, amaute, keima mi ahi ding uh hi.

Thu-hilhkikna 11:27

Tu ni-a kong gen, Topa na Pasian uh thupiaknate na zuih uh leh thupha hi a,

Thu-hilhkikna 4:20

Ahih hangin Topa in tu ni-a bangin sik meikhuk tawh a kibang Egypt panin ama neih mi dingin note hong la-in hong paikhiatpih khin hi.

Thu-hilhkikna 5:6

“‘Kei pen salsuahna Egypt leitang panin note a hong paikhiatpih Topa na Pasian uh ka hi hi.

Hebru 5:9

Tua bangin a cingtaak mi a suah khit ciangin ama thu a mang mite khempeuh adingin tawntung hotkhiatna a kipatna hong suak a,

1 SAMUEL MASA 15:22

Tua ciangin Samuel in, “Topa in meihal biaknate le biakpiaknate Topaʼ thu man ding zahin deih ahi hiam? En in, biakpiakna sangin thu man ding hoih zaw a, tuutal thaute sangin thu ngaih ding hoih zaw hi.