Hebru 10:36 - Tedim Bible Revision 2017

³⁶ Pasianʼ deihna bangin gamta-in, ama thuciam na ngah theih nadingun lungduai-in thuak zawhna na kisam uh hi.

Tedim Bible

³⁶ Bang hang hiam na cih uh leh, Pasian’ deihna bang na nasep khit uh ciangin ama kamciamna na ngah nadingun thuakzawhna lungsim na kisam uh hi.

Hebru 10:36 Iomraidhean Croise

Late 37:7

Topaʼ mai ah khawl dide inla, lungduai takin ngak in. Ahihna a daupai pa tung le siatna a bawlpa tungah kilung so tawmsak keʼn!

Late 40:1

Topa lamenin ka ngak ngiungeu a, amah kei lam hong nga-in ka kikona aw hong za hi.

Mattiu 10:22

Keima hangin Gentail mi khempeuh in note hong mudah ding uh hi. Ahi zongin a tawp dongin a thuak zo mite in hotkhiatna a ngah ding uh hi.

Mattiu 12:50

Vantungah a om ka Paʼ deihna bangin a gamta mi peuhmah ka sanggam pasal, ka sanggam numei, ka nu ahi uh hi,” ci-in a dawng hi.

Mattiu 21:31

Hih tapa nihte sung panin a koi bel pen a paʼ deih bangin gamta ahi hiam?” a ci hi. Amaute in, “A ta u zaw a ta hi,” a ci uh hi. Tua ciangin Jesu in amaute kiangah, “Note kiangah a mantak a kong genin ah: Pasianʼ ukna sungah note sangin siahdongte le numei paktatte lut masa zaw ding hi.

Mattiu 24:13

Ahi zongin a bei dongin a thuak zote in hotkhiatna ngah ding uh hi.

Mattiu 7:21

“Kei kiangah, ‘Topa, Topa aw,’ hong ci mi khempeuh, vantung ki-ukna sungah lut thei kim lo ding uh a, vantungah a om ka Paʼ deihna bangin a gamta teng bek lut thei ding uh hi.

Marka 3:35

Pasianʼ deihna bangin a gamta mi khempeuh ka nu le ka sanggamte ahi uh hi,” a ci hi.

Luka 21:19

Hih bangin thuak zo le-uhcin nuntakna taktak ngah ding na hih manun kip takin om un.

Luka 8:15

Leihoih a tukna munte pen Pasianʼ thu a zak ciangin lungsim tak tawh a thu mangin kip tawntung uh ahih manin amau adingin man a neite a cihnopna ahi hi,” a ci hi.

Johan 7:17

Pasianʼ deihna bangin a gamta nuam mi peuhmah in, ka thugente pen Pasianʼ kiang panin a hong pai thu a gen ka hihna leh keima thu bek tawh a gen ka hihna khen thei ding uh hi.

Sawltak 13:22

Pasian in kumpi dingin Saul a zat nawn loh ciangin amauteʼ kumpi dingin David a semsak hi. Pasian in Davidʼ thu genin, ‘Ka sawl khempeuh a sem ding, ka deih bang mi khat, Jessiʼ tapa David ka mu khin hi,’ a cih sa thu ahi hi.

Sawltak 13:36

David in ama hun lai-in Pasianʼ deihna bangin na sem a, a sih ciangin a pu a pate gei mahah kisialin muatna a thuak hi.

ROM (Romans) 12:12

Lamet na neihna hangun lungdamin om tawntung unla, lungkhamna na thuak uh ciangin lungduai-in thu na ngen tawntung un.

ROM (Romans) 12:2

Leitung mihingteʼ gamtat bangin gamta kei unla, na lungsim uh kikheelin Pasian kipuahphasak un. Tua hileh a hoih nate bang hi a, bangte in amah lungkimsakin, bangte a kicing hiam ci-in thei-in Pasianʼ deihna na phawk thei ding uh hi.

ROM (Romans) 2:7

Pahtakna, minthanna le hin tawntungna deihin a gamtat hoih tawntung mite tungah Pasian in nuntak tawntungna pia dinga,

ROM (Romans) 8:25

I muh lohte i lamet ciangin lungduai takin i ngak thei hi.

1 KORIN MASA 13:7

Itna neite lungkia cih omngei lo hi; a upna, a lametna, lungduai takin a ngaknate uh a mawkna cih omngei lo hi.

Galati 6:9

Tua ahih manin na hoih sep ding cimtak kei ni. Lungkia loin i sep nakleh a hun ciangin thaman i ngah ding hi.

Efesa 6:6

A hong pahtak ding uh deihna tawh amauteʼ muh sung bekin tua ci gamtat kei unla, Khrisʼ sila na hihna hangun Pasianʼ hong deih bangin lungsim takpi tawh na sem un.

Kolose 1:11

Note in lungduai maitai takin thuak zo-in, khuavak gam sungah a om Pasianʼ mite tawh nopsakna a ngahkhawm thei dingin a hong bawl i Pa tungah lungdamna na koh theih nadingun a minthang ama vangliatna in note tungah thahatna hong guan tahen.

Kolose 3:24

Topa in note tungah thaman a hong piak ding lamtak phawk gige un. Tua bangin na sepna uh ah Khris Topaʼ na a semsem na hi uh hi.

Kolose 4:12

Jesu Khris nasem, noteʼ makai Epafras in zong hong hopih hi. Pasianʼ deihna bangin note nungta-in, lungsim khanghamin kip takin na om theih nadingun amah in thu hong ngetsak tawntung hi.

1 THESALONIKA MASA 1:3

Bang hang hiam cih leh i Pa Pasian kiangah thu ka nget simun noteʼ upna hangin na nuntak ziate uh, itna na neih manun nakpi takin na nasepnate uh le i Topa Jesu Khris hong paikik ding lametna na neih manun kip takin na omnate uh ka phawk tawntung uh hi.

Hebru 11:39

Hih miteʼ upna lian mahmah hi, ci-in a kitheih hangin piak dingin Pasian in a ciam sa thute a ngah nai kei uh hi.

Hebru 12:1

Tua hi a, eite in i kiim i pam ah hih zahin a tam teci nei ihih ciangin eite a hong dongtangsak thei nate khempeuh le eite a hong gakcip mawhna le khialhnate khempeuh pai khia-in, i mai ah a om tai nading lampi a mong dongin lungsim kip takin tai ni.

Hebru 13:21

ama deihna bangin na na sep theih nadingun a kisam thuhoihte khempeuh note tungah hong guanin, ama lungkimna bangin i gamtat theih nadingin Jesu Khris hangin eite sungah na hong sem henla, Khris in a tawntungin minthanna ngah paisuak tahen. Amen.

Hebru 6:12

Note thadah loin upna le lungduaina a nei mite bangin, Pasianʼ hong ciam sa thu na ngah nadingun ka hong deihsak uh hi.

Hebru 6:15

Abraham in lungduai takin na ngak ahih manin Pasianʼ thuciam a ngah hi.

Hebru 6:17

Pasian in ama geelnasa a kheel ngei het lo ding ahihna thu a thuciamna a ngah ding mite tungah teltakin theisak nuam ahih manin a thuciam banah kiciamna khat a bawl lai hi.

Hebru 9:15

Thuciamna masa in a huam khak mite, a mawhna panun a suahtak theih nading uh ngeina om pen a si suak khinta ahih manin, Pasianʼ sap mite in a ciam sa tawntung thupha a ngah theih nadingun Khris in thuciamna thak a hong vaihawm ahi hi.

1 PETER MASA 1:9

Tua bangin na upna uh hangin kha thu ah hotkhiatna a ngah na hi uh hi.

1 JOHAN MASA 2:17

Leitung nate le leitung deihnate a beibei ding hi ta a, ahi zongin Pasianʼ deihna bangin a gamta mite pen kip tawntung ding hi.

Mangmuhna 14:12

Pasianʼ thupiakna zui-in Jesu tungah a citak Pasianʼ mite adingin thuak zawhna kisam hi.