Daniel 4:3 - Tedim Bible Revision 2017

³ “Pasianʼ hong lah nalamdangte, bangzahin lian ahi hiam? A bawl nalamdangte, bangzahin vanglian ahi hiam? A tawntungin Pasian kumpi hi dinga, amah in a tawntungin a uk paisuak ding hi.

Tedim Bible

³ Pasian hong lah nalamdangte, bang zahin lian ahi hiam! A bawl nalamdangte, bang zahin vanglian ahi hiam! Pasian in a tawntungin kumpi hi ding a, Amah in a tawntungin a uk ding hi.

Daniel 4:3 Iomraidhean Croise

JOB (Job) 25:2

“Pasian vanglian a, mi khempeuh in a zahtak ding ahi hi. Ama vantung kumpi gam, nuam takin a omsak zo hi.

Late 104:24

Topa aw, na sep sa nate tam mahmah hi. Nangmah in ciimna tawh tuate khempeuh na bawl a, na piansak ganhingte tawh leitung a kidim hi.

Late 105:27

Amaute in ama limte amauteʼ lakah nalamdangte Hamʼ gam sungah a bawl uh hi.

Late 145:13

Nangma kumpi gam pen a kip tawntung kumpi gam hi a, nangma ukna khang tawntungin a kip hi. A thuciamna khempeuh ah Topa thutak mahmah a, a gamtatna khempeuh ah zong hehpihna a nei ahi hi.

Late 66:7

Ama thahatna tawh a uk ngitnget pa, ama mit tawh minamte a encik ngitnget pa, mi lehdote in langpan kei uh hen.

Late 72:18

Na lamdangte a bawl amah bek ahi Israel Pasian, Topa in thupha ngah tahen.

Late 77:19

Nangma lam lianpi tuipi tung hi a, nangma lam neute zong luilianteʼ tung mah ahi hi. Ahi zongin na khekhapte kimu lo hi.

Late 86:10

Bang hang hiam cih leh nangmah lianin nalamdangte na bawl a, nang bek Pasian na hi hi.

Late 92:5

Topa aw, na nasepnate lian mahmah a, na ngaihsutnate thuk mahmah hi.

Isaiah 25:1

Topa aw, nang pen keima Pasian na hi hi. Nangmah kong liansak dinga, nangma min ka phat ding hi. Bang hang hiam cih leh a lamdang nate na sem khin a, tanglai pek a na geelnate a kip a kho takpi ahi hi.

Isaiah 28:29

Hih zong Vanglian Topa’ kiang pan a hong pai thu ahi hi. Amah pen thu lamlahna ah lamdang mahmah a, pilna ah lian mahmah hi.

Isaiah 9:7

Tu hun a kipanin a tawntungin David kumpi tokhom tung le ama gam sungah thutang le thuman phutin, a lian semsem ama ukna le nopsakna in mong nei lo ding hi. Vanglian Topa’ deih luatna in hih thu hong tungsak ding hi.

Jeremiah 10:10

Ahih hangin Topa pen Pasian man hi a, amah pen a nungta Pasian le tawntung kumpipa ahi hi. A heh ciangin lei kiliing a, gamte in a hehna nang zo lo hi.

Daniel 2:2

Tua ahih ciangin bang mang man cih a hilh dingin mitphial siamte, mibum theite le khongkhai siamte a samsak hi.

Daniel 2:44

Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo zo lo dinga, tua gam in gamdang khempeuhte zo gawpin a kip tawntung ding hi.

Daniel 4:17

Hih pen a vil, a patau vantungmiʼ thukhenna ahi hi. Tua ahih ciangin mun khempeuh ah a om mi khempeuhte in, a Lian Pasian in miteʼ kumpi gamah vai a hawm hi, cih a thei ding uh hi. Amah in a teel peuhpeuh a neu pente nangawn kumpi a suaksak thei ding hi,’ a ci hi.

Daniel 7:14

Amah in vangliatna, minthanna le kumpi za ngah ahih manin minamkimte, minam tuamtuamte, pau nam tuamtuamte khempeuh in ama na a sem ding uh ahi hi. Amah in a tawntungin uk dinga, a kumpi gam a bei ngei kei ding hi.

Daniel 7:27

“Hih leitung kumpi gam, vangliatna le liatna khempeuh a Lianpen Pasianʼ mite tungah a kipia ding hi. Amauʼ kumpi za cikmah hunin bei ngei lo dinga, leitung ukna za a nei khempeuhte in a thu uh mangin amauteʼ na a sem ding uh hi,” hong ci hi.

ROM (Romans) 11:33

Tua ahih manin Pasianʼ hong hehpihna nak liat mahmah a, a pilna le a thu theihnate nak thuk mahmah hi. Ama thukhennate kuaʼ gen theih ding hi lo a, a nasepna ziate kuaʼ tel zawh ding hi lo hi.

Thu-hilhkikna 4:34

Tua ahih kei leh, Topa na Pasian un Egypt gam sungah note adingin na muhna uh ah a bawlte khempeuh tawh a kibangin, ze-etna, lim, nalamdang, gal, a vanglian le a thahatna le a lauhuai mahmah tawh pasian dang khat peuhpeuh in ama mite adingin minamdang khat sung pan minam khat a va lak ding hanciam ngam ngei ahi hiam?

1 TIMOTI MASA 1:17

Amah bek Pasian ahi, a kimu thei lo, a si ngei lo, tawntung Kumpipa in minthanna le pahtawina ngah tawntung tahen. Amen.

Hebru 1:8

Ahi zongin Tapaʼ thu a gen ciangin Pasian in, “Pasian aw, na kumpi tokhom khang tawntungin kip dinga, thuman thutang tawh na gam sung na uk ding hi.

Hebru 2:4

Amauteʼ thugenna banah Pasian in vangliatna lim le nalamdang a tuamtuamte bawlna tawh hong gen beh lai hi. Tua banah ama hoihsak bangin Pasian in Kha Siangtho zong hong hawm lai hi.

1 PETER MASA 4:11

Minthanna le vangliatna a nei tawntung Pasian in Jesu Khris hangin thu khempeuh ah phatna a ngah theih nadingin thuhilhte in Pasianʼ thu na hilh unla, na a semte in Pasianʼ piak thahatna tawh na sem un. Amen.

Mangmuhna 11:15

Tua ciangin a sagihna vantungmi in a peengkul hong tum a, vantungah nakpi takin aw hong ging a, “Leitung uk nading aana neihna pen i Topa Khris aʼ hong suak khin a, amah in a tawntungin uk paisuak ding hi,” hong ci hi.