Tito 3:7 - Tradução Bíblica Pacaas Novos

⁷ Mi' napari' pain Tamataracon. Ma' ta om tara con ta'a camain' mahu' pain ca mi' xim xuhu' pain ca e' cara wa ca' napari'. Je ca howa iri' ca' quem. To' hohot pin napari' con Jeju. Om xi to' hohot pin capari', xi iri' wari' iri' ta. Ane xiram pa' pan capari' ne. Je ca to' hohot pin capari' con.

Tito 3:7 Iomraidhean Croise

Mateus 25:34

Tomi' ac toton tara co to nanain iri' cwere ma', co xuruxut xo' nana ma'. Wahu' pain ca param mi' cuhu' pain ca awi wa Te ma', harahap je. To ho' cara xine, taramaxicon pe ho' ac xuhu' tara. Wara coromicat an pe xo' nain i ma' Te pahu' pain cara pane, pain ca xo' ma' ten qui' xine macan' pane.

Marcos 10:17

Mama' xi' urut ta iri na Jeju ne, xuruxut xuruxut, mo qui' ac ca na wari' ma'. Pe torotop mi' non, tomi' querec ac con na: Taramaxicon co awi, co ca' na taxipa' capijacon Iri' Jam ac con na. Cain' cain' xita' quem? Param inain ca e' cara pe ho' ton Iri' Jam ta non.

Romanos 11:6

Xiram pa' e' tata oro win judeu ta' cwa', mi' e' tata pain ca awi wa pain ca tora' tococwa ma'. Om ca taramaja mi' cacain. Mo xi tomi' ca' tococwa: Querec inain ca ara xo' tamana nuhu' ma', hohot hwe, je i ma' tara ca tora' qui' xuhu' ca', om ca tomi' ac i ma' tococwa. Mo xi om xiram pa' e' tococwa, mo xi mi' e' tococwa pain ca taramaja nucucun ma', om xi mi' e' tococwa pain ca awi wa pain ca tora' tococwa ta.

Romanos 3:24

To' hohot e' napari'. Om ca pagar xine pain capari'. Xi xiram pa' ara capari' pain ca quep xiho' capari' ta. To' hohot pin e' napari', xi om ne ca to' witan pin ara capari' Cristo Jeju ta.

Romanos 3:28

Je ca tomi' xuhu' ca': To' hohot pin napari' Iri' Jam, xi om ne ca howa ara xun Jeju ta. Om ca tomi' ca' capari' quem: To' hohot pin inuhu', xi tomi' ha' ara hwein ca xirao' nucun Moisés ta, om ca tomi' ac i ma' capari'. To' hohot pin inuhu', xi howa ara hwe ta napari'.

Romanos 4:16

Je ca wara tomi' pe con Abraão Iri' Jam pane. Howa iri non ne, wara tomi' pe ac con na. Ma' ta querec pin' mapa' pain ca tomi' iri'o' xim ca', pain ca ara mi' e' xim pain ca wara tomi' pe ne ca' non pane. Ara mi' e' xim pain, xi om ne ca param ara tain pum, ac i ma' na ca wara tomi' pe con pane. Ara mi' e' toton pain waram winam ma' quem, ac i ma' non pane. Je ca tomi' xuhu' ca'. Om ca tomi' e' tococwa waram winacon co judeu nana ma', co tomi' ha' nanain ca xirao' nucun Moisés ma'. Tomi' napari' pain ca an xiho' xun Abraão pain ca howa nucun ma' quem. Hwanana ne hwanana ne pi' pin ara xi' urun Abraão ta.

Romanos 4:4

Noro jun wari' co taramaja ma'. Mo ta taramaja ca, cut ac cain na dinheiro. Dinheiro ca cut ca ma', om ca mi' e' tocwa pain, xi taramaja mi' ara cain ta. Dever non pain wari' co taramaja mi' ca ma'.

Romanos 8:17

Je ca mi' xim capari' pain oro ca awi wa ca wara tomi' pe mi' capari' pane, xi om ne ca mana panxica ara iri' ta. Main cut xin con, cut wi xin con Cristo. Mo ta an xiho' xun Cristo pain ca jain jain nucun pain macan' ca', mo ta jain jain wi xun, tomi' querec te ac capari' tara Iri' Jam. Tomi' querec te wi ac capari' tara con Cristo, mi' wi ac capari' tara pain ca jao jao ma' xun pain ca awi nucun pain ca hwara' opa nucun quem.

1 Coríntios 6:11

Ma' paxi' nana win ma' nuhu' co ac i ma' nana pain cara pane. Ane hohoc pin cuhu' pain ca caracat nuhu' Iri' Jam ne. Iri' wari' ne pin inuhu' ta nuhu'. To' hohot pin nuhu'. Xi om ca Taramaxicon nexi' Jeju Cristo pain Tamataracon pahu'.

Gálatas 2:16

Ac i ma' paxi' iri' pain ca judeu iri' ca'. Ane taxi' xin i ca' ne: Om ca to' hohot capari' Iri' Jam pain ca tomi' ha' taxipa' xin oro ca ara je capari' pain ca xirao' nucun Moisés ma', om na. To' hohot napari' pain ca howa xun Jeju Cristo. Je ca howa iri' con Cristo Jeju pain ca judeu iri' ca' quem. Ma' ta to' hohot capari' Iri' Jam pain ca howa xun Cristo ta iri'. Om ca to' hohot capari' pain ca tomi' ha' xin oro ca ara je capari' pain ca xirao' nucun Moisés ta iri'. Xi to' hohot ac tocwa wari' pain ca tomi' ha' e' cain oro ca ara ra con Iri' Jam pain ca xirao' nucun Moisés ta iri', ac i ma' na ca coromicat nexi' pain ca howa pin xun Cristo Jeju ta.

Gálatas 3:29

Je ca tomi' xuhu' ca'. Pain ca mene pin cuhu' Cristo ma', iri' hwanana ne pin ac hun na Abraão cara pane. Wara ara mi' xihwe pain oro ca wara tomi' pe nucun Iri' Jam. Win ne ca wara tomi' pe con pain Abraão pane ta.

Gálatas 4:7

Je ca tomi' xuhu' ca'. Om ca an xiho' mami' xuxun oro wari' co taramaja mi' e' nonon xucun wari', co tama' tomi' ha' tomi' ha' je wawa ma'. Mana panxica Iri' Jam pin iri'. Wara mi' napari' pain oro caramaxicon. Xi mana panxita' pin ara capari' ta.

2 Tessalonicenses 2:16

Tomi' mi' urut pahu' con Taramaxicon nexi' Jeju Cristo con Cotere' Iri' Jam. Om ca noc capari' Iri' Jam. Om ca pi' ra ha' ne ca to' hwara' opa cara capari'. Xiram pa' napari' pain ca mi' e' capari' pain ca momon winim' xun pain ca main mi' xim capari' pain carawa ca awi ca wara coromicat an pe xo' mi' capari' quem. Om xi mi' capari' pain, xi iri' wari' iri' ta. Ane xiram pa' pan capari' ne. Je ca mi' e' capari' pain.

Tito 1:2

Ma' ta om tara pum ta'a camain' cacapa' pain ca mi' ton toton pain ca e' cara wa ta napa' cocon. Wara tomi' pe mi' napari' pain ca e' cara wa Iri' Jam. Pain ca om tom ma' querec cain macan' pane, wara tomi' pe mi' napari' pain. Om ca tomi' mixein camain' capari' ta.

Tito 2:11

Na e' na pain ca xuruxut xo' ac i ma' caca co howa nonon Jeju ta. Xi an hwet mi' ara capari' pain ca awi nucun Iri' Jam ma', pain ca mi' capari' pain ca querec pin' xun ca', pain ca xiram pa' e' capari' ca', pain ca to' witan to' witan pi' pin xuhu' ta capari' ca'. Om xi to' witan capari', xi iri' wari' iri' ta. Ane xiram pa' pan capari' ne. To' witan pan xuhu' ta napari'.

Tito 2:13

Xuruxut xo' ac i ma' xi' pain ca winim' xin xec nein ca ja' tomi' querec te tamana xim capari', je xec nein ca main in qui' ta' ca Jeju Cristo pain ca toc meremem tamana nucun ta. Wirico Jeju Cristo co Iri' Jam ne iri' cwa'. Wirico co to' witan napari' cwa'.

Hebreus 1:14

Cain' cain' caca oro jam co taramaja mi' nonon quem? Om ca tomi' ha' tomi' ha' pi' pin cocon Iri' Jam pain ca quep xiho' jujun oro wari' co to' witan xuxun ta tococwa ra? Je i ma' ca taramaja nucucun ma' ira!

Hebreus 11:7

Howa non Iri' Jam Noé cara pane. Tomi' hwet iri ta pain carawa ca om hwet pa' querec nonon ne, tomi' ha' ac con na. Quep ac cain na mam' horoho wa, ma' ta witan pin ta' cocon oro ca nari ne cwa' ta na pane. Howa pan iri na Noé ne, querec pin' ac tococwa na oro win ma' caca pain ca om howa nucucun ma', wap pin ac tococwa na quem. To' hohot pin inem, xi howa ara mapa' ta pan ac con na Iri' Jam quem.

Hebreus 11:9

Howa non Iri' Jam. Tatirim pe ac cain na macan' ca tomi' pe mi' tocwa ma'. Ac macaracocon oro tatirim non. Pe nain caji xirim ca mam' quep xine pain tapari carawa. To nanain caji xirim Isaque con Jacó ma' quem, co tomi' pe mi' wi wawa pain macan' ca tatirim pe ca Abraão ma' quem.

Hebreus 6:17

Ac i ma' na Iri' Jam pane quem. Param napari' pain ca querec pin' xun pain ca om an in tain cain ca wara tomi' an pe xo' nucun ma', pain ca main ara mi' xim xuhu' pain oro ca wara tomi' pe mi' xuhu' ca' capari'. Je ca an hwet pan cain wixicon pain ca tomi' pe mi' capari' pain ca tomi' nucun.

Tiago 2:5

Je ca tomi' xuhu' pain ca tomi' querec te xuhu' ca' xere. Taraju wet je e'. Oro wari' co ximin nana pain macan' ca', wiricoco co tora' pan ca Iri' Jam ma', pain ca howa xine cocon ma'. Tomi' ca' tata: Howa iri mahu' ne, ac ca caramaju tamana hwe na. Main mi' xuhu' pain ca to ho' mahu' pain ca aram aram taramaxicon pe ho' xuhu' ta' ta. Wara tomi' pe ara xi' inuhu' pain, xi om noc ara mahu' ta pan tata.

1Pedro 3:7

Wahu' quem, pain ca ma' cuhu' narima' ma' quem. Ma' tara xumuhu' pain ca to ho' xujuhu' ma'. Tomi' querec te jejem pain ca querec wet xo' hwehwem ma'. Querec pin' jejem pain ca om hwara' opa homa cacama ma', je pain ca om an xiho' cucuhu' pain ca hwara' opa nuhu' ma'. Xi mi' ara cacam pain ca om pi' ra ha' ne ca e' wa Iri' Jam ta. Win cuhu' ma'. Ac i ma' jejem manahu', ma' ta om i'ina hwe pain ca tomi' xun hun Iri' Jam ma' quem.