Tito 3:5 - Tradução Bíblica Pacaas Novos

⁵ to' witan pin ac capari' na. Om ca to' witan capari' pain carawa ca awi ca ara xi' paxi' iri' pane, om na. To' witan e' napari' pain ca xiram pa' pan capari'. Mam' to' witan napari' pain ca hwara' opa nein Tamataracon ca hohoc napari' pain ximixi' ca', ca to' xo' camara' mami' napari' pain ca mi' capari' pain xocori ca e' nucun quem. Mam' to' xocoricon wari' pin napari' pain quem.

Tito 3:5 Iomraidhean Croise

Mateus 3:11

Ja' inuhu' pain com, xi om ne ca cwirin' pin ara hwe ta ac tococwa na. Wara maqui' paxi' ina, ane maqui' ta' pa'ao' ca xucun co hwara' opa tiquin' ca' napa' ne. Iri' wari' na quem. Om ca hohot ne pain ca quep xiho' camain' ton pain ca cut mi' ton pain caji caximacon ma', xi iri' wari' ta' ta. Mo ta cwirin' pin hwein ca caracat nuhu' ma', mi' ac cuhu' tara pain Tamataracon Iri' Jam. Mo ta om cwirin' je na hwein ca caracat nuhu' ma' quem, wixicaracao' mi' ac cuhu' tara pain cote ne xe ta.

Lucas 1:50

Xiram pa' nonon oro wari' co tomi' ha' nonon ma', co querec pin' nonon pain ca Iri' Jam nucun, pain ca xo' ma' ten qui' caca pain cara pane, xiram pa' xiram pa' wet tata waram winacocon cocon mana panxicaca pain xocori ca' quem.

Lucas 1:54

Quep xiho' napari' pain ca waram winacon Israel iri' ca', pain ca taramaja mi' xun ca'. Om ca ji'am pin capari', xiram pa' napari'.

Lucas 1:72

Tomi' pe ca' napari' quem: Om ta ji'am pin tain ca wara tomi' an pe xo' ne pain ca tomi' pe qui' toton oro hwanana nuhu' cara pane, pain ca xiram pa' toton waram winahu' cocon mana panxihwe ta toton pane napari'.

Lucas 1:78

Ac i ma' xim napari' Iri' Jam nexi', xi xiram pa' tamana ara capari' ta. Je ca mam' xim capari' con wari' nucun co an xiho' non xina pain ca xo' hwet pin nucun pain xo' xec. Maqui' toron Iri' Jam co pe nain pawin.

Romanos 11:14

Am to' hehe pin toton, am to' jain jain pin toton, ac i ma' na ca param ne cocon oro win judeu ta' cwa'. Jain jain xirarain ca witan wa na inonon. Tomi' ca' xirara na inonon quem: Win caca oro co om judeu nana ma', witan pin xi' quem, ac i ma' xirara na inonon. Coromicat ca' inonon: Ma' xirara na inonon oro xucucun co to' witan pin ca Iri' Jam pata' na ca coromicat ne cocon oro win judeu ta' cwa'.

Romanos 11:6

Xiram pa' e' tata oro win judeu ta' cwa', mi' e' tata pain ca awi wa pain ca tora' tococwa ma'. Om ca taramaja mi' cacain. Mo xi tomi' ca' tococwa: Querec inain ca ara xo' tamana nuhu' ma', hohot hwe, je i ma' tara ca tora' qui' xuhu' ca', om ca tomi' ac i ma' tococwa. Mo xi om xiram pa' e' tococwa, mo xi mi' e' tococwa pain ca taramaja nucucun ma', om xi mi' e' tococwa pain ca awi wa pain ca tora' tococwa ta.

Romanos 12:2

Ta an xiho' huhun oro wari' co pan teretem nana ma' me ta. To' jimama' xut pain iri' xumuxut ca' me jun Iri' Jam. To' xocori pin rain iri' ca coromicat nuxut ca' me jun. Ma' ta ha' cuhu' pain ca querec pin' hwein oro ca param nucun ca an pe mi' capari' ca', ma' ta ara hwein quem. Param ara xi' nain oro ca awi wa Iri' Jam ta. Param nain carawa ca hohot non. Om ca param ni ca' cain oro ca param nucun

Romanos 3:20

Je ca tomi' xuhu' ca': Om ca ma' camain' ca wari' co tomi' ca' ca Iri' Jam cwa': To' hohot pin inem, xi om ne ca tomi' ha' ara main ca xirao' nucun Moisés ca', om ca ma' camain' ca wari' co tomi' ac i ma' wa. Mam' to' querec pin' e' napari' pain ca caracat nexi' ca xirao' nucun Moisés ta.

Romanos 3:28

Je ca tomi' xuhu' ca': To' hohot pin napari' Iri' Jam, xi om ne ca howa ara xun Jeju ta. Om ca tomi' ca' capari' quem: To' hohot pin inuhu', xi tomi' ha' ara hwein ca xirao' nucun Moisés ta, om ca tomi' ac i ma' capari'. To' hohot pin inuhu', xi howa ara hwe ta napari'.

Romanos 4:5

Ane om ac i ma' ne con wari' co howa e' non Iri' Jam ne, co om howa nain ca ara ara pan nucun ma'. Tomi' ca' na: Howa inon Iri' Jam. Wirico co to' hohot pin non wari' co caracat pain ca miri'om con ma', ac i ma' na ca tomi' nucun. Tomi' ac tocwa na quem, tomi' non Iri' Jam: To' hohot pin inem, xi om ne ca howa ara mapa' ta non.

Romanos 9:11

Tomi' ac cam na Iri' Jam pain ca om camara' querec caca humaxicam pane. Ca' nam pane: Pije' co pan' cain' ma' pum, taramaja mi' toron coxa' ca co pan' qui' pa'ao', ac i ma' nam pane. Om ca camara' querec caca humaxicam, om ca ara querec cacain ca awi wa, om ca ara querec cacain ca pan tem wa quem. Tomi' ac i ma' e' nam Iri' Jam, ma' ta tora' ton co wara coromicat xo' ta' cwa', co wara tora' pe ta' cwa', ac i ma' nam. Je ca tora' con co pan' qui' pa'ao' pane. Param pan inon ta non Iri' Jam. Om ca param ton pain ca ara pan ca ma' non. Param pan inon ta na, je ca tora' ton ca' nam pane.

Romanos 9:16

Je ca tomi' xuhu' ca': Mo ta tora' ton wari' ca Iri' Jam, tora' ac con na co param pan ca. Wari' co tora' wa ma', om ca tora' tocwa pain ca param pan nucun. Om ca tora' tocwa pain ca ara pan nucun quem. Wirico Iri' Jam co tora' pan non, maqui' pan nain ximicon, xi om ne ca quep xiho' pan ton ta ara ca ta.

Romanos 9:30

Je ca tomi' xuhu' ca': Oro win ma' nuhu' pain ca om judeu hwe ma', om paxi' na ca win xumu cacain ca awi wa pain ca to' hohot pin tococwa ma'. Ane to' hohot pin pan cocon Iri' Jam ne, xi om ne ca howa ara cocon Jeju ta.

1 Coríntios 6:11

Ma' paxi' nana win ma' nuhu' co ac i ma' nana pain cara pane. Ane hohoc pin cuhu' pain ca caracat nuhu' Iri' Jam ne. Iri' wari' ne pin inuhu' ta nuhu'. To' hohot pin nuhu'. Xi om ca Taramaxicon nexi' Jeju Cristo pain Tamataracon pahu'.

Gálatas 2:16

Ac i ma' paxi' iri' pain ca judeu iri' ca'. Ane taxi' xin i ca' ne: Om ca to' hohot capari' Iri' Jam pain ca tomi' ha' taxipa' xin oro ca ara je capari' pain ca xirao' nucun Moisés ma', om na. To' hohot napari' pain ca howa xun Jeju Cristo. Je ca howa iri' con Cristo Jeju pain ca judeu iri' ca' quem. Ma' ta to' hohot capari' Iri' Jam pain ca howa xun Cristo ta iri'. Om ca to' hohot capari' pain ca tomi' ha' xin oro ca ara je capari' pain ca xirao' nucun Moisés ta iri'. Xi to' hohot ac tocwa wari' pain ca tomi' ha' e' cain oro ca ara ra con Iri' Jam pain ca xirao' nucun Moisés ta iri', ac i ma' na ca coromicat nexi' pain ca howa pin xun Cristo Jeju ta.

Efésios 2:4

Ane xiram pa' tamana capari' Iri' Jam ne. Om ca noc camain' capari'.

Efésios 4:23

Tomi' ca' jun Iri' Jam urut pahu' pane: Mi' xut pain ca xocori mami' ne xumuxut pain ca coromicat nuxut ca' jun.

Efésios 5:26

Ma' ta to' hohot cuhu' Iri' Jam xuhu' ta napari'. Ac ca hohoc pin capari' na pain com ma'. Mam' to' om pin napari' pain ca em' nexi' pain capijacon quem.

Colossenses 3:10

Xocoricon wari' pin hwe quem. Tama' to' xocoricon to' xocoricon ac wata' pin hwe ta nuhu' Iri' Jam quem. Ma' ta querec pin' mip mahu' ta nuhu'.

2 Timóteo 1:9

Wirico co to' witan napari', wirico co tora' napari', iri' wari' ne napari' quem. Om ca mam' to' witan capari' pain carawa ca awi ca ara xi' paxi' iri', om na. Mam' to' witan napari' pain ca param pan nucun. Mam' to' witan napari' pain ca xiram pa' pan capari' quem. Om xi xiram pa' capari', xi iri' wari' iri' ta. Ane wara xiram pa' qui' capari' pain cara pane ne, pain ca om tomi' ma' pin querec cain macan' pane, wara coromicat an pe xo' mi' napari' pain ca xiram pa' nucun. Main to' witan turuhu' Cristo Jeju cwa' napari', ac i ma' tara ca xiram pa' xuhu' ta napari' pane.

Tito 3:4

Ac i ma' paxi' iri' pane ira. Ane xiram pa' capari' Iri' Jam co to' witan napari' ne. An hwet mi' iri napari' pain ca xiram pa' nucun ne, je pain ca tomi' querec te tomi' querec te xam' capari' ma',

Hebreus 10:22

Je ca tomi' ca' xuhu' ca': Mam' wixicam pin xun Iri' Jam pain ca win xumu iri'o' xun, je pain ca howa mip xun ca'. Om ta tara con ta'a camain' xun pain ca xic am pin capari' pain ca caracat nexi' ta. Ac ca cam huco' mi' capari' na pain quicon Jeju pain ca coromicat pan teretem nexi' ca', ac ca hohoc xo' capari' na pain com ca awi tamana pain cwerexi' quem.

Hebreus 4:16

Je ta wixicam xun Iri' Jam co xiram pa' taxipa' ma', co quep xiho' taxipa' ma' quem. Om ta jin' xun, ac ca wixicam xun tara pain iri' ca xao pe pe ca pain pawin cain. Ma' ta xiram pa' capari', ma' ta quep xiho' capari' quem. Ximin iri xi' ne, pain ca ma' capari' oro ca to' i'ina napari' ma', xiram pa' hap ac capari' tara, quep xiho' hap ac capari' tara quem.

Hebreus 6:6

Ane an pe pin cocon Iri' Jam ne. Om ca ha' mami' ne pain ca cwirin' je cwirin' je tococwa ta. Xi an xiho' ara cocon co tatatain mi' nonon pain pana Panxica pane ta. Ac ca tatatain mi' mami' pan cocon na pain pana. Oro wari' co querec nonon pain ca om cwirin' nucucun ma', tomi' xirac tomi' xirac pan ac cocon na quem.

1Pedro 1:3

Tomi' hwet xin ca awi tamana nucun Iri' Jam co Te ca Taramaxicon nexi' Jeju Cristo ta. Xiram pa' tamana napari'. Mam' mi' napari' pain xocori ca e' wa pain ca to' e' mami' con Jeju Cristo ta. Je ca om tara con ta'a camain' xun pain ca howa xun ca', pain ca winim' xun pain oro ca mi' xim capari' ma'.

1Pedro 2:10

Om paxi' na ca wari' ne cuhu' Iri' Jam pain cara pane, ane wari' ne pin cuhu' pain xocori ca' ne. Om paxi' na ca xiram pa' cuhu' pane, ane xiram pa' pin cuhu' pain xocori ca' ne.

1Pedro 3:21

Com ca to' witan nanam pane, tomi' joc mam' mi' nain com ca ja' iri' pain ca howa nexi' pain xocori ca' quem. Ja' iri irin com ne, om ca hohoc xin homirixi', om na. An hwet e' irin ca wara tomi' xun Iri' Jam pain ca hohoc pin rain ca caracat ne pain xumu me xun ca'. To' witan pin napari', xi om ne ca to' e' mami' ara con Jeju Cristo ta.