Tito 3:3 - Tradução Bíblica Pacaas Novos

³ Tomi' ac i ca' inem, xi coromicat xo' iri' pain cara pane ta, pain ca om howa querec iri' pane. Win caca oro wari' co om howa nana pain xocori ca' quem. Om na ximixi' pane. Om ca tomi' ha' xun Iri' Jam quem. Hehe e' ururun co mixein nanapari', om ca ari xuxun. Ac ca quep xat capari' na oro ca param pan teretem nexi' pain oro ca waraju nexi' ca hohot napari' pane, om ca miri'om ac xixin. Ximin iri'. Pan teretem e' iri' pane, tama' noc mi' xijexi' pain oro ca ara iri' quem. Noc nanapari' oro wari', noc ururun pane quem.

Tito 3:3 Iomraidhean Croise

Mateus 21:29

Noc inain ta ac ca na. Noc inain paxi' na, ane aram aram in ne ximicon ne, mao ac cain na xitot.

Lucas 21:8

Om na, ma' tara xumuhu' me ac tococwa na. Ta howa huhun oro wari' co mixein xim nunuhu' pain oro carawa ca maqui' ta' ma' me. Xi mija xi' ara caca oro wari' co wata' ta nana pain ca an hwet cacain wuxu ca'. Tomi' ca' tatara oro xucucun quem: Wixicam pin na oro xec pain ca pi' pin ta' ne macan' ta tatara. Ta howa huhun me ta ac tococwa na.

João 8:34

Om na, je ca tomi' xuhu' ca', tomi' iri'o' inuhu' ta ac tococwa na. Wari' co caracat ma', ac ca quep con na ca caracat nucun. Ac ca taramaja mi' e' ne con na.

Romanos 11:30

Wahu' pain ca om judeu hwe ma' quem, om ca tomi' ha' hun Iri' Jam pain cara pane, ari hun pane. Ane xiram pa' pin cuhu' pain xocori ca' ne, xi om ne ca ari pan ara caca oro win judeu ta' cwa'.

Romanos 6:12

Je ca tomi' xuhu' ca': Ta hwara' opa pe ho' cuhu' ca caracat wa pain curuhu' me ta. Ta hwara' opa hwara' opa to' i'ina pin cuhu' pain ca tomi' ha' pin hwein oro ca param ximama' nuhu' me ta.

Romanos 6:17

Je ca tomi' xuhu' ca', tomi' querec te tamana urut con Iri' Jam cwa' pahu', xi tomi' ha' pin ara hun pain xocori ca' ta. Taramaja mi' e' paxi' hwein ca caracat wa pain ca tama' tomi' ha' hwein pain cara pane. Ane tomi' ha' pin hwein capijacon Iri' Jam ca iri'o' pain xocori ca' ne. Tomi' ha' na iri' xumuhu' quem, tomi' ha' pin hun Iri' Jam pain oro caramaxicon ca ca' na xihwe ma'.

Romanos 6:22

Ane to' witan pin cuhu' Iri' Jam pain xocori ca' ne. Witan ca' hwein ca caracat wa. Wari' nucun Iri' Jam pin hwe, taramaja mi' e' hun Iri' Jam. Mi' ac cuhu' na pain ca awi wa pain ca iri' wari' ne pin cuhu' ca', ac i ma' na ca quep xiho' cuhu'. Aram aram mi' ac cuhu' tara pain ca om pi' ra ha' ne ca e' wa quem.

Romanos 6:6

Taxi' ara xi' irin i ca' quem: Pain ca tatatain mi' tocwa pain pana Cristo pane, tatatain wi ac xine na wara cwerexi' con. Ma' ta to' om pin xine ca hwara' opa nein wara curuhu' ca caracat taxipa' ma' napari' Iri' Jam. Ma' ta tomi' ha' tomi' ha' om pin hwein ca param ximama' nuhu' pain ca caracat nuhu' ta napari'.

2 Coríntios 12:20

Toron napa' xumu pahu'. Mo ta aram aram hwet pa' xuhu', am om hohot mahu' pain oro ca ara nuhu' ma', am om hohot pan xuhu' pain oro ca ara ne quem. Tara pahu'. Am tomi' mana' caracan xujuhu'. Am noc mi' xujuhu' pain oro ca ara hwe ma'. Am hwerehwet ne mixitahu' pain ca mana' xujuhu'. Am joc in pin xujuhu' pain ca ara e' hwein ca param pan nuhu' ma'. Am tomi' xina hwein waracocon oro win ma' hwe ma'. Am tomi' xec xec hwe pain ca xin to hwe ma'. Am ja' teretem xujuhu' ma' quem.

Gálatas 6:3

Tomi' xun wari' co xec xec ma', co coromicat ca' ma': Awi tiquin' ca' inonon oro win ma' ne cwa', ac i ma' na ca coromicat nucun. Cain' cain' xira quem? Om na ximicon, xi awi tiquin' ca' cocon oro win ma' ca ta.

Colossenses 1:21

Wahu' ma', pain ca om howa querec hwe pane, to pira ca' hun Iri' Jam. Noc hun pane. Xi om ne ca pan teretem ara hwe pain ca coromicat nuhu', je pain ca xuruxut nuhu' pane ta.

Colossenses 3:7

Ac i ma' paxi' na ca xuruxut nuhu' pain cara pane, pain ca param ximama' ac i ma' hwe pane.

2 Timóteo 3:13

Oro wari' co caracat nana ma' iri na ne, oro wari' co mixein nana pain ca ac ca iri'o' xi' ca' tara me caca ma' iri na ne, caracat caracat mao ac ne ma' tara cocon, caracat mip pin ac caca tara quem. Mija tara ca mixein caca, mija tara ca mixein tococwa quem.

2 Timóteo 3:6

Wari' co ac i ma' nana ma', tomi' querec te mixein nana, ac ca iri'o' xi' ca' tara me nana, corom corom hwet ac tococwa na oro wari' pain xiricocon, pijim' pan teretem ac tacacama na oro narima' co om coromicat xo' nana ma', co to' i'ina nanam oro ca caracat nequequem. Om ca i'ina tomi' na pin tacacama, xin ne xin ne ac cacama na pain oro ca param ximao wa ca om awi.

Tito 1:16

Taxi' urut con Iri' Jam paxi' nana, ane mixein caca ne. Querec pin' tata pain ca noc cocon ma', xi om ne oro ca ara nucucun pain ca pan teretem pan caca ta. Om ca querec awi cacapa' ta nonon Iri' Jam. Xi tomi' ha' caca ta. Om ca ara taxi' cacain ca awi wa quem.

Tito 2:12

Hu ca' napari' quem: An to pin jein oro ca ara nuhu' ca om hohot napa' ta napari'. An to pin jein oro ca param pan teretem wa ca ara caca oro wari' co om howa nanapa' ta napari'. Coromicat xo' je, xuruxut xo' je, tama' hohot xine ta napari'. Win xumu jein ca param ne pain ca e' e' wet nuhu' pain macan' ta napari' quem.

Tiago 1:26

Wari' co coromicat ca' ma': Xut xo' ina pain ca win xumu ton Iri' Jam ta, mo ta coromicat ac i ma' ca, mo ta om an in an in cain ca tomi' nucun, mo ta tomi' ximao e' ca, om ca quep xiho' camain' con ca xut xo' paxi' nucun. Om na ximicon, xi xut xo' ca ta.

1Pedro 1:14

Tomi' ha' jun Iri' Jam, win ne ca mana panxita' cuhu' ma'. Ta tomi' ha' mami' hwein oro ca param pan teretem nuhu' ca ara taxipa' hwe pane, pain ca om querec pin' querec hun Iri' Jam pane.

Apocalipse 12:9

Xin hwet pin ac tocwa na co ma' co ac cote ne caji hop ma'. Wirico co ma' co caxicon em' cara pane, co mixein nonon hwanana pain cara pane. Wirico co Caxicon Jam ma', co Satanás na xijein wixicon ma', wirico co mixein taxipa' nonon oro wari' pain macan' ca'. Xin pan' hwet pin ac tocwa na pain macan'. Wixicaracao' camara' hwet pin ac tococwa na pain macan' oro caxicon jam co taramaja mi' nonon ma' quem.

Apocalipse 13:14

Mixein mixein pi' pin tata oro wari' co to nanain oro xijein macan', xi om ne oro ca ara ca ma', ca om ara taxi' ne ca wari' wa ma', ca ara ra pan con co hwet qui' cain' ma'. Tomi' ac tococwa na oro wari': Quep jein caji pacun ma', ara an xiho' jein curucun co ma' co hwet qui' cain' ma', co to' pa' pin paxi' wa pain cote ne quit ma', co e' mami' ma'. Pe torotop mi' querec te ac hwein tara ta, ac i ma' na ca tomi' tococwa oro wari'.

Apocalipse 18:2

Merem mip ac ca na: Om pin na, om pin na Babilônia co hwara' opa tamana nana oro wari' nein ma'. Ma' e' nana oro caxicon jam co om querec awi nana ma', wiricoco co xaraxa to nanain Babilônia pain xocori ca'. Oro caji me co om querec awi ma', co noc tamana ca Iri' Jam, je ca xaraxa to nain quem.