Tito 3:2 - Tradução Bíblica Pacaas Novos

² Ta tomi' napat huhun oro wari' me ta roron. Ta tomi' mana' huhun me, tomi' querec te e' jujun, tama' tomi' wixite tomi' wixite pi' pin jujun oro wari' ta roron quem.

Tito 3:2 Iomraidhean Croise

Mateus 11:29

Ja' ja' xine, na ra xine pain ca hu xim xuhu' ca'. Xao to wa ac hwein tara xumuhu'. Xi tomi' wixite ara xuhu' ta. Om ca xec xec ta' pain ca tomi' pan hot e' xuhu' ca'.

Atos 23:5

Na ra ac ca na Paulo. Om ta sacerdote co iri' taramaxicon ca ma' inon ira xere. Mo xi querec pin' ton, om xi tomi' ac i ma' ton ta. Xi xirao' pe ara xine pain capijacon Iri' Jam: Ta tomi' napat mon wari' co taramaxicon pe ho' nem me ta napari'. Ac i ma' na ca tomi' ca ma'.

1 Coríntios 6:10

oro wari' co cut noc xa nanain carawa ma', oro wari' co narain ho' xucucun pain carawa pain ca param ximama' nucucun ma', oro wari' co tama' toc tamanain to nanain caji tocwa ca mana' ma', oro wari' co tomi' ximama' nonon oro win ma' caca ma', oro wari' co quep em' nonon waximain carawa pain ca cut noc xa ca' cocon pain, om ta to ho' cocon Iri' Jam pain ca taramaxicon pe nucun ta.

1 Coríntios 9:19

Om paxi' na xucun wari' co quep xat napa' pain ca taramaja mi' ne ta capa'. Ane taramaja mi' e' toton oro wari' ne, maqui' nain xumu ca', taramaja mi' e' toton ta ina. Ma' ta mija caca co howa nonon Cristo pata' ina.

2 Coríntios 10:1

Wata' pain ca Paulo ta' ca', tomi' ca' inuhu' pain ca an xiho' ton Cristo pain ca tomi' wixite nucun, je pain ca tomi' pan hot nucun ma' quem. Tomi' mip ca' inuhu' cocon oro win ma' nuhu' co tomi' ximama' ca' nana pata': Tomi' iri napari' pain ca pe ho' capari' ca' ne, tomi' pan hot e' napari'. Pe ni ca' iri napari' ne, pan to' ac cain na tarajixi', ac i ma' na ca tomi' ximama' caca pata'.

2 Coríntios 12:20

Toron napa' xumu pahu'. Mo ta aram aram hwet pa' xuhu', am om hohot mahu' pain oro ca ara nuhu' ma', am om hohot pan xuhu' pain oro ca ara ne quem. Tara pahu'. Am tomi' mana' caracan xujuhu'. Am noc mi' xujuhu' pain oro ca ara hwe ma'. Am hwerehwet ne mixitahu' pain ca mana' xujuhu'. Am joc in pin xujuhu' pain ca ara e' hwein ca param pan nuhu' ma'. Am tomi' xina hwein waracocon oro win ma' hwe ma'. Am tomi' xec xec hwe pain ca xin to hwe ma'. Am ja' teretem xujuhu' ma' quem.

Gálatas 5:22

Ane to' jimama' capari' Tamataracon Iri' Jam ne. Mo na oro ca ara mi' capari': Mi' napari' pain ca om noc xijexi'. Ja' tomi' querec te napari'. Mi' napari' pain ca om toron ne ximixi'. Mi' napari' pain ca tomi' pan hot xijexi', je pain ca xiram pa' xijexi' quem. Mi' napari' pain ca awi wa pain ca xuruxut xo' wa. Mi' napari' pain ca om tomi' capijacocon e' iri' pain ca ara taxipa' xin oro ca tomi' pe iri' quem.

Gálatas 6:1

Tomi' xim inuhu' pain ca tomi' ha' taxipa' hwein Tamataracon Iri' Jam ma' xere. Mo ta ma' ca win ma' nuhu' co pan' mao pain ca caracat nucun ma', quep xiho' jun. An in jun, ma' ta xut xo' mami' ca. Tomi' xun iri jun ne, tomi' wixite e' jun. Ma' tara xumuhu' quem. Ma' ta om an xiho' hun pain ca caracat nucun.

Gálatas 6:10

Je ca tomi' xuhu' ca'. Ma' iri nana wari' co ximin nana ma' ne, quep xiho' ac xuxun tara, je cwerexi' mao tara. Oro win ma' nexi' co nari iri' cwa', pain ca howa wi xun Cristo cwa', wiricoco tatara co quep xiho' tamana iri' quem.

Efésios 4:2

Ta xec xec hwe me. Tomi' wixite xujuhu'. An hwet pe jein ca om noc xujuhu' pain ca tomi' pan hot xujuhu' ma'.

Efésios 4:31

An to pin jein oro ca juhum' ne xumuhu'. Oro ca hwerehwet ne mixitahu' ma', oro ca mana' wa ma' quem, an to pi' pin jein. Ta tomi' merem xujuhu' me. Ta tomi' napat xujuhu' me. Ta noc xujuhu' me.

Filipenses 4:5

Tomi' toto e' jujun oro wari', querec pin' querec pin' pi' pin tuturuhu' pain ca tomi' wixite nuhu'. Wixicam pin ara xi' na ca in qui' nucun Taramaxicon nexi' ta.

1 Tessalonicenses 2:7

Hohot paxi' xira pain ca in ac xut urut pahu' pain ca quep xiho' xut urut pahu' pane, xi om ne ca apóstolo ara urut pain ca pijim' jein capija caparut Cristo Jeju ta. Ane om ac i ma' urut pahu' pain ca to ho' urut pahu' pane ne. Tomi' pan hot e' urut pahu' pane. Win cama jicacam hwijima' pain ca tomi' pan hot cacam humaxicacam ma', ac i ma' urut pahu' pane.

1 Timóteo 3:11

Ac i ma' tatara ca narima' nequequem quem. Na e' na pain ca querec pin' tacacama pain ca xuruxut xo' nequequem. Om ta tomi' em' cacam oro win narima' cacama. Ma' tara ximicacam pain ca om ara e' cacamain ca param pan nequequem. Om ta mixein camain' cacama.

1 Timóteo 3:3

Om ta toc tamanain pe cain caji tocwa ca mana'. Om ta to' xitoton na cocon co tomi' taparam' nonon ma'. Ara xite e' totoron oro wari'. Om ta tomi' mana' ximao cocon quem. Om ta tama' param cain dinheiro.

Tiago 3:17

Ane jimao ne ca coromicat xo' wa ca maqui' nain pawin ne. Mo ta coromicat xo' iri', to ni ca' ac xin na ca caracat wa pain ca win xumu cain' xun Iri' Jam. Ca' ac iri' na quem: Quep xiho' ururun oro win ma' nexi' pain ca mana' caracan xucucun ma'. Tomi' querec te caracan xijexi'. Tomi' wixite xijexi' pain ca win xumu xin ca param pan nucucun oro win ma' nexi'. Xiram pa' tamana xijexi' pain ca ara mi' xijexi' pain oro ca awi wa. Om ca tomi' querec te paxica' xijexi', om ca tomi' capijacocon e' xijexi', tomi' iri'o' xijexi'.

Tiago 4:11

Ta tomi' napat xujuhu' me xere. Wari' co tomi' napat non win howa ca ma', am tomi' em' con quem, wirico co tomi' napat nain capijacon Iri' Jam ca tomi' ha' je capari'. Tomi' in pin nain quem. Je ca tomi' xuhu' ca', tomi' inon wari' co tomi' in pin nain capijacon Iri' Jam ca tomi' ha' je capari'. Mo ta tomi' in pin main capijacon Iri' Jam, om ca tomi' ha' main. Joc in pin main, ac juiz ma pain ca joc in pin main quem.

1Pedro 2:1

Je ca tomi' xuhu' ca'. An to an to pi' pin jein oro ca pan teretem wa je oro ca mixein wa ma'. An to pin jein ca ac ca iri'o' xi' ca' tara me hwe ma'. An to pin jein ca noc mi' caracan xujuhu' pain oro ca ara nuhu' ma'. An to pin jein ca tomi' napat xujuhu' ma' quem.

1Pedro 3:10

Je ca xirao' pe xine pain capijacon Iri' Jam quem: Wari' co param nain ca tomi' querec te wa ma', co hohot tarapa' oro carawa ca hwet pa' xim napa' ma', om ta tomi' ximao cain carawa ca om awi, om ta tomi' mixein ca quem.

1Pedro 3:8

Tomi' xim inuhu' pain i ca' quem: Je je ari tara ca coromicat nuhu' pain ca tomi' querec te xujuhu' ta. Quep xiho' xujuhu'. Ta noc camain' xujuhu' me, win ne ca xere xujuhu' ma'. Xiram pa' xujuhu', ta xec xec hwe pain ca quep xiho' xujuhu' me.

1Pedro 4:4

Cain' cain' xira cocon ne nunuhu' oro co ara ara wet nanain i ma', tomi' xirac tomi' xirac ac cucuhu' na quem. Xi jao jao ma' mami' huhun pain oro ca quep ximama' nucucun pain ca ara pan teretem nucucun ta.

2 Pedro 2:10

Wap xun paxi' tata oro caracat, ane wap tamana pan xun tococwa oro co xuruxut pan teretem nana pain ca win xumu e' cacain ca quep ximama' wa ne, je pain ca tomi' napat cocon Iri' Jam pain ca om tomi' ha' jun na caca ma' quem. Oro co ca' na mixein nunuhu' ma', tomi' xec xec e' nana. Om ca ara jin' cacain ca param pan nucucun. Tomi' napat nonon oro jam co hwara' opa nana cwain, co to nanain pawin cain. Om ca jin' cocon quem.

Judas 1:10

Oro wari' co caracat nana pain ca miri'om cocon Iri' Jam ma' iri nana ne, tomi' napat ximama' ac cacain na oro ca om taraju pa' pan caca ma'. Ma' paxi' na oro carawa ca taraju pa' paxi' caca pain ca an xiho' cacain oro carawa nein mi ca om ximi ma'. Je i ma' ca mam' to' em' pan xucucun ta.

Judas 1:8

Oro wari' co corom hwet nunuhu' ma', pan teretem ac i ma' nana quem. Tomi' ca' nana: Om na, tohwein' ina, tomi' napa' pain ca tohwein' ne Iri' Jam ta nana, ara ximama' ac caca na, to' em' pin ac xucucun na pain ca caracat nucucun. Om ca tomi' ha' jun Iri' Jam na caca, tomi' napat nonon oro jam co hwara' opa nana cwain, co to nanain pawin cain quem.