Tito 2:2 - Tradução Bíblica Pacaas Novos

² Tomi' ca' roron co wara tiquin' mama' cawaxi' nucucun ma': Ma' tara xumuhu' pain ca om ara e' hwein ca param pan nuhu' ta roron. Na e' na pain ca querec pin' cucuhu' oro wari' pain ca xuruxut xo' nuhu' ta roron. Coromicat xo' je roron. Howa xo' jein capijacon Iri' Jam, ta noc camain' huhun oro wari' me, quereme cara jein oro ca to' i'ina nuhu' ta roron quem.

Tito 2:2 Iomraidhean Croise

Marcos 5:15

Jein hwet iri nonon Jeju ne, querec ac cocon na co ma' co mija nana oro caxicon jam co corom to ho' nonon ma' ira. Xao pe pin na. Pe pin na wom. Tamanain tamanain om pin na. Jin' pin ac caca na.

Lucas 8:35

Maji querec xi' e' ac caca na. Jein hwet iri nonon Jeju ne, querec ac cocon na co awi pin ma', xi om ne ca tomi' jein pin ara tococwa oro caxicon jam nucun ma'. Xao pe ho' nain caximacon Jeju. Pe pin na wom. Tamanain tamanain om pin na. Jin' pin ac caca na.

Atos 24:25

Ca pijim' tacacama ma', ca pijim' tacacama ma', tomi' xo' ac tacacama na pain ca xut xo' wa pain ca ara xine oro ca param nucun Iri' Jam. Tomi' xo' tata pain ca om ara e' xine ca param pan nexi', tomi' xo' tata pain ca main tomi' querec xun tococwa oro wari' pain oro carawa ca ara caca pain ca e' e' wet nucucun quem. Pijim' ac i ma' iri nanam Paulo ma' ne, jin' pin ac ca na Félix ma'. Je i ma' ta, in mao cain' ra ta ac con na. Mo ta na capa', mo ta om to' i'ina capa' ca taramaja ne ca', hap ra jun ta mami' toton pum ta non.

Romanos 12:3

Je ca tomi' xuhu' ca': Hu xim inuhu', hu hu pi' pin xim inuhu', xi om ne ca hu roron ara capa' Iri' Jam pahu'. Ta coromicat mi' xujuhu' pain ca awi ina, taxi' tamana ina wa me. Coromicat xo' je, querec pin' jein ca taramaja taxi' wa ca mi' cuhu' Iri' Jam ma', pain ca taramaja mi' taxi' hun ma'. Win ne ca mi' pan cuhu' pain ca howa hun ma' quem.

1 Coríntios 15:34

Ma' tara xumuhu' me. Caracat maho' je. Ma' nana oro win ma' nuhu' co om coromicat xo' camain' nonon Iri' Jam. Om ca querec pin' cocon. Wixipa' xihwe pain ca om coromicat xo' nucucun pain ca om querec pin' cocon Iri' Jam ta.

1 Coríntios 9:25

Win caca oro wari' co jein xi' nana ma', tama' jein querec jein querec nana. Jein in ximama' nana, toin piri' nana, meo meo nanain taparacocon pain aracocon. Miri'om nanain ca param pan ne curucucun, ma' ta an xin carawa ca awi ta nana. Carawa ca an xi' caca ma', main pi' pin tara, main om pin tara. Ane to wet cara ne carawa ca an xi' iri' pain ca howa xun Jeju ne. Win xumu urun Iri' Jam, ma' ta an xin carawa ca awi ca om pi' ra ha' ta iri'.

2 Coríntios 5:13

Am coromicat mi' ca' cacaparut wari' ma', pain ca tamanain nana ta cacaparut ma'. Je i ma' ira, xi param ara urut con Iri' Jam pain ca in ac tocwa ta. Mo ta om tamanain hwe ta maparut, je i ma' ira, xi param ara urut pahu' pain ca quep xiho' xihwe quem.

Gálatas 5:23

Mi' napari' pain ca tomi' wixite xijexi'. Mi' napari' pain ca om ara e' xin ca param pan nexi' quem. Ara iri xin oro ca mi' capari' Tamataracon Iri' Jam ca' ne, om ca tomi' em' capari' ca xirao' nucun Moisés ta.

Filipenses 4:8

Tomi' xim inuhu' pain i ca' quem xere: Coromicat e' jein oro ca iri'o' wa pain ca om mixein wa ma'. Coromicat e' jein oro ca hohot ma'. Coromicat e' jein oro ca ara xo' wa ma'. Coromicat e' jein oro ca om pan tem wa ma'. Coromicat e' jein oro ca om noc wa ma'. Coromicat e' jein oro ca om tomi' napat wa ma'. Oro ca awi ma', oro ca hohot ne pain ca in ac iri', je i ma' tara ca coromicat e' hwe.

1 Tessalonicenses 5:6

Je ca tomi' urut pahu' ca': Ma' tara ximixi' me. Om ta ara e' xin ca param pan nexi'. Om ta an xiho' xuxun oro wari' co om howa nana ma', co ac ca pi'am caca na pain ca om querec pin' cacain carawa ca maqui' pa' cocon ma'.

1 Tessalonicenses 5:8

Wari' iri na ne, pain ca wari' nein xec iri' ca', na e' na pain ca ma' ne ximixi'. Noro jun soldado pain ca pe cain arain too ca tac caho' nain quimacon je waracon ma', pain ca narain ho' xije cocon oro co to' i'ina nanapa' ta ca ma'. Ac i ma' xi' pain ca narain ho' xijexi' con Caxicon Jam ma', pain ca howa cara xun Iri' Jam, je pain ca tomi' querec te caracan xijexi' quem. Noro jun soldado pain ca pe cain caji waji' ca mam' quep caho' cain winacon ma' quem. Ac i ma' xi' pain ca coromicat nexi' quem, pain ca howa cara xun Taramaxicon nexi' pain ca to' witan toton capari' ma' quem.

1 Timóteo 1:10

Co quep nanam oro xequem narima', wiricacam oro narima' co quep xut nonon oro xucun tarama' ma' quem. Co quep tarama' xucucun, wiricacam co quep narima' xequequem quem. Co cut mama' nonon oro wari' pain ca vender tiquin' xun cocon ma' quem. Co tomi' mixein taxipa' nana ma', wiricoco co tomi' an pe mi' mixein nanain ca tomi' nucucun pain ca ara xin cacain ma' quem. Oro wari' co ari nanain oro capijacon Iri' Jam ca pijim' iri' ca' quem. Oro wari' co ara ac i ma' nana ma', wiricoco co em' hwe ta wawa pain ca om tomi' ha' cacain oro ca tomi' nucun Iri' Jam ca tomi' ha' je capari' ca'.

1 Timóteo 1:14

Om xi xiram pa' capa' Taramaxicon nexi' Cristo Jeju pane, xi iri' wari' ta' ta. Ane xiram pa' tamana pan capa' ne. Mi' e' napa' pain ca howa ton. Mi' e' napa' pain ca om noc ton, je pain ca om noc toton oro wari' co howa nonon ma' quem.

1 Timóteo 1:2

Wata' co xirao' mi' nem cwa' Timóteo. Tomi' querec te tamana inem. Ac ca iri' panxita' xim na, xi om ne ca howa ara ma pain ca tomi' hwet xim con Cristo Jeju pane ta. Param inon Cotere' Iri' Jam con Taramaxicon nexi' Cristo Jeju pain ca quep xiho' quequem pain ca mi' quequem pain ca param nucucun. Param inonon pain ca xiram pa' quequem, je pain ca mi' quequem pain ca om toron ne xumum quem.

1 Timóteo 1:5

Je ca tomi' ac i ma' xim ca': Hu xo' roron co pijim' pan teretem nana ma'. Xumu xo' je, querec pin' jein carawa ca param mi' cuhu' Iri' Jam, howa iri'o' jein capijacon ca ca' na xihwe ta roron. Na ac ne tara pain ca om noc xucucun, je pain ca om noc cocon Iri' Jam quem.

1 Timóteo 3:11

Ac i ma' tatara ca narima' nequequem quem. Na e' na pain ca querec pin' tacacama pain ca xuruxut xo' nequequem. Om ta tomi' em' cacam oro win narima' cacama. Ma' tara ximicacam pain ca om ara e' cacamain ca param pan nequequem. Om ta mixein camain' cacama.

1 Timóteo 3:2

Je ca tomi' xim ca': Wari' co querec wet nonon co howa nana ma', om ca na camain' ne pain ca hwet ne wixicon pain ca caracat wa. Xica' pe tara manacon. Ma' tara ximicon pain ca om ara e' cain ca param pan nucun. Coromicat xo' tara. Xut xo' tara. Tomi' querec te totoron oro wari' co hwet nonon pain xiricon. Ca' na taxi' totoron pain capijacon Iri' Jam co howa nana ma'.

1 Timóteo 3:4

Querec wet xo' taxi' tataram mana panxica cam jicacam mana panxica. Hu taxi' tataram quem. Ma' ta tomi' ha' pan cocon. Ma' pan tara ximicacam, om ta tomi' ximama' cacama.

1 Timóteo 3:8

Ac i ma' tatara oro diácono co quep xiho' nonon co howa nana ma' quem. Na e' na pain ca querec pin' tococwa pain ca xuruxut xo' nucucun. Om ta tomi' capijacocon e' caca. Om ta toc tamanain to cacain comi uva ca mana'. Om ta tama' param cacain dinheiro.

1 Timóteo 5:1

Mo ta ma' cocon carawa ca to' i'ina nonon co howa nana co querec wet ma ma', tomi' xo' ac momon tara pain ca hu toton momon ma'. Ac ca te momon tara pain ca tomi' xo' momon ma'. Tomi' wixite roron co xo' horon nana ma' quem. Ac ca xere momon tara.

Tito 1:13

Iri'o' na ca tomi' nucun quem. Je ca tomi' xim ca'. Tomi' mip rain taraxicocon co howa ximama' nonon ma'. To' querec pin' roron pain ca pan teretem nucucun co pijim' ximama' nana ma' quem. Ma' ta howa xo' caca.

Tito 1:8

Om ca na camain' ne pain ca ara ac i ma' ca ma'. Ara ca' e' tara: Tomi' querec te totoron oro wari' co hwet nonon pain xiricon. Param e' tarain ca awi wa. Coromicat xo' tara. Xut xo' tara. Win xumu e' tarain oro ca param nucun Iri' Jam. Ma' tara ximicon pain ca om ara e' cain ca param pan nucun.

Tito 2:7

Wum quem Tito, an hwet mi' roron pain ca awi wa, tama' ara xo' ra. Ma' ta win ca ne quequem pain oro ca ara nem ma'. Pijim' iri roron pain capijacon Iri' Jam ne, om ta tomi' capijacon e' ma pain. Na e' na pain ca maqui' nein iri' xumum ca pijim' nem. Na e' na pain ca querec pin' quequem pain ca xut xo' nem pain ca pijim' momon quem.

Filemom 1:9

Ane tomi' toto e' xim pain ne, xi om ne ca tomi' querec te ara xim ta. Wata' pain ca Paulo ta' ca', pain ca horon pin ta' ca', pain ca tao' pe pin cacapa' pain ca taramaja mi' ton Cristo Jeju ca',

1Pedro 1:13

Je ca tomi' xuhu' ca'. Coromicat xo' je. Wara awori xo' je pain ca ara xin hwein ca param nucun Iri' Jam. Ma' tara xumuhu'. Howa mip jun Iri' Jam pain ca xiram pa' xim cuhu' ma', pain ca to' witan e' xim cuhu' pain ca in qui' ta' nucun Jeju Cristo ta.

1Pedro 4:7

Wixicam pin na xec nein ca pi' pin ta' ne macan' je oro carawa jimao quem. Je ta coromicat xo' qui' hwe ta. Ma' tara xumuhu' quem. Ma' ta ha' cuhu' pain ca tomi' hun Iri' Jam ta.

1Pedro 5:8

Ma' tara xumuhu' con Caxicon Jam ma', co noc nuhu' ma'. Pirao' nuhu', an xiho' non copacao' co xararac ma', co tama' xut in xut in pain ca pirao' cain carawa ca cao' wa ma'. Ac i ma' nuhu' Caxicon Jam quem. Quep xim nuhu'.

2 Pedro 1:6

Querec pin' iri jun Iri' Jam ne, miri'om ac hwein tara ca param pan nuhu'. Miri'om iri jein ca param pan nuhu' ne, quereme cara ac hwein tara oro ca to' i'ina nuhu'. Quereme cara iri jein oro ca to' i'ina nuhu' ne, xuruxut xo' ac hwe tara pain ca win xumu hwein ca param pan nucun Iri' Jam.