Tito 1:6 - Tradução Bíblica Pacaas Novos

⁶ Wari' co querec wet nonon co howa nonon Jeju ma', om ca na ne pain ca hwet ne wixicon pain ca caracat wa ta. Na e' na pain ca xica' pe cama manacon. Mana panxica ma', na e' na pain ca howa cocon Iri' Jam. Om ta hwet ne wixicocon pain ca tamanain to wa pain ca om tomi' ha' wa ta.

Tito 1:6 Iomraidhean Croise

Lucas 1:5

Pain oro xec nein ca taramaxicon pe ho' qui' cocon oro wari' nein Judeia Herodes cara pane, ma' ac ca na wari' co sacerdote. Zacarias na wixicon. Taramaja wi na cocon oro win sacerdote ca pain ca iri' hwanana ne cocon hwanana Abias cara pane. Je ca oro wari' nucun Abias tococwa pane. Hwanana ne non Arão manacon Zacarias quem. Isabel na wixicam.

Efésios 5:18

Ta quep cuhu' comi uva ca mana' me. To' em' pin ara xi' napari' comi uva ca mana' ta. Param pan jein Tamataracon Iri' Jam. Pe ho' mip turuhu' ca hwara' opa nein ta.

1 Tessalonicenses 5:14

Hu ca' urut pahu' pain i ca' quem xere: Tomi' jujun co jam' curucucun ma', co noc nanain ca taramaja wa ma'. Tomi' toto jujun co naro curucucun pain ca tomi' xaxa' nucucun ma'. Quep xiho' jujun co om hwara' opa nana pain ca howa nucucun ma'. Tomi' pan hot tomi' pan hot xam' jujun oro wari' ma' quem.

1 Timóteo 1:9

Taxi' irin i ca' quem: Pain ca hu cocon oro wari' Iri' Jam ma', pain ca tomi' ha' je cocon ma', om ca em' hwe ta tococwa co xuruxut xo' nana, om na. Mo nana co em' hwe ta wawa ma': Co miri'om nanain oro ca tomi' nucun Iri' Jam. Co ari nonon. Co om howa nonon. Co caracat taxipa' nana. Co miri'om nanain oro caramaxicon Iri' Jam. Co om win xumu nanain oro ca param nucun quem. Co to' pa' pin nonon mana cote caca cacam waram jicocon. Co to' pa' pin nonon oro win ma' caca quem.

1 Timóteo 3:12

Wari' co diácono ma', xica' pe tara manacon. Querec wet xo' taxi' tataram mana panxica cam jicacam mana panxica. Hu xo' taxi' tataram quem.

Tito 1:10

Xi mija ara caca co ari nanain capijacon Iri' Jam ca ca' na xo' iri' ca'. Om ca tomi' ha' je na caca. Pijim' iri tata oro win ma' caca ne, tomi' ximama' e' ac tococwa na. Om ca quep xiho' tococwa pain ca pijim' nucucun. Mixein e' tata. Caram ma' co tomi' ha' nanain oro ca xirao' nucun Moisés ma', co howa paxi' nonon Jeju ma', wiricoco nana co pijim' tamana ac i ma' nana ma'. Mo ta om tomi' ha' hwein ca xirao' nucun Moisés ma', om ta to' witan cuhu' Jeju ta tata oro win ma' caca ma'.