Mateus 8:4 - Tradução Bíblica Pacaas Novos

⁴ Tomi' ac con na Jeju: Taraju wet ne e'. Ta tomi' hwet momon oro wari' pain ca quep xio xim ca' me ta non. Hwet e' ron sacerdote co taramaja pe nain cote ne xiricon Iri' Jam ac con na. Noro rain cwere pain ca xio pin ta' ca' ac mon tara, mi' ac mon tara pain carawa ca tomi' capari' Moisés pain cara pane, pain ca tomi' xo' capari' con wari' co xio pin pain caji nan. Mi' ron pain, tom mi' ron pain Iri' Jam me ac mon tara. Tom tain' iri tarain ne, querec pin' ac quequem tara oro wari' pain ca xio nem ma', je pain ca querec hohot pin quem Iri' Jam ma' quem na ca tomi' con ma'.

Mateus 8:4 Iomraidhean Croise

Mateus 10:18

Cut mi' tuturuhu' cocon oro taramaxicon, tomi' querec ac cucuhu' tara pain oro ca ara hwe ma'. Ara ac i ma' tuturuhu', xi om ne ca howa ara mahu' ta. Je i ma' ira, na e' na pain ca tomi' hwet huhun pain capija oro taramaxicon cocon oro wari' co om judeu nana ta.

Mateus 16:20

Tomi' mip ac caparut na pain ca taxipa' urut con ca'. Ta tomi' hwet mahu' cocon oro wari' pain xocori ca' me, ta tomi' hwet huhun pain ca Cristo ta' ca' me naparut.

Mateus 17:9

Quiji' mama' ac cacain na pacun. Pain ca xuruxut xuruxut wet nucucun ma', tomi' ac tococwa na: Ta tomi' hwet huhun oro wari' pain ca querec hwe pata' me. To' e' mami' cain' tarapa' Te ta. Wata' pain ca Iri' Wari' ta' ca', to' e' mami' cain' tarapa' Te. Tomi' hwet ac huhun pain tara ca querec hwe pata' ta na ca tomi' tococwa ma'.

Mateus 3:15

Je i ma' ira João ac con na. Tomi' ha' ne e', ja' ne e'. Na e' na pain ca tomi' ha' xun Iri' Jam ta non. Ma ac con na, ja' ac con na quem.

Mateus 5:17

Cain' ca coromicat mi' mahu' quem ac tococwa na. Tomi' am pin tarain ca xirao' nucun Moisés ma' mahu' ra? Tomi' am pin tarain ca xirao' to nucucun oro profeta cara pane quem ma' mahu' ra? Je ca maqui' cain macan' ca', ac i ma' na ca coromicat mi' mahu' ra? Om na, om ca maqui' ta' pain ca tomi' am pin tain ca xirao' nucun Moisés ta'. Om ca maqui' ta' pain ca tomi' am pin tain ca xirao' to caca oro profeta ta' quem, om na. Maqui' ina, ma' ta hwet pin ne oro ca xirao' to caca pata' ina, je ca maqui' ta' ca'.

Mateus 6:1

Ma' tara xumuhu' me. Ara iri jein ca awi wa pain ca ara xin hwein ca param nucun Iri' Jam ne, ta ara hwet to hwein cocon oro wari' me ta ac tococwa na. Ta querec ma' tatarapa' pain hwe me. Mo ta querec ma' tatarapa' pain hwe, om ta mi' cuhu' pain oro ca awi wa Cotere' co pe pawin cwain.

Mateus 9:30

Querec mami' ac caca na quem. Tomi' mip ac tococwa na: Ta tomi' hwet huhun pain oro wari' me ta tata.

Marcos 13:9

Ma' tara xumuhu' me, xi quep xim ara cucuhu' oro wari' ta. Cut mi' ac cucuhu' tara cocon oro taramaxicon co juiz nana, wap to ac cucuhu' tara pain oro xirim ca cut in to xucucun ma' quem. Cut mi' tuturuhu' cocon oro taramaxicon, tomi' querec ac cucuhu' tara pain oro ca ara hwe ma'. Ara ac i ma' tuturuhu', xi om ne ca howa ara mahu' ta. Je i ma' ira, na e' na pain ca tomi' hwet huhun pain capija ta.

Marcos 3:12

Ane tomi' in pin tococwa ne. Ta tomi' hwet mahu' cocon oro wari' me ta tata pain ca tomi' mip tococwa ma'.

Marcos 5:43

Tomi' mip ac tacacama na: Ta tomi' hwet huhun pain oro wari' me ta, ta tomi' hwet huhun pain ca to' e' mami' tam ca' me ta tata. Mi' jem pain carawa ca cao' wa ta ac tacacama na quem.

Marcos 6:11

Mo ta hwet xun huhun xucucun wari' co to nanain oro ca paric to ne xirim ma' quem, mo ta om tomi' querec te cucuhu'. Mo ta om ma' camain' ca wari' co taraju xin nanain ca pijim' nuhu' ma', paca' ac huhun tara, wap camara' ac hwein tara ximirinain macaracocon pain caximahu' pain ca paca' huhun ma'. Ma' ta querec pin' xujuhu' pain ca pan teretem nuhu' pain ca noc hwein ca taraju wa ta ac huhun tara quem. Ac i ma' na ca tomi' xo' tococwa pane.

Marcos 7:36

Ta tomi' hwet huhun oro wari' pain ca quep xio ton co cwa' ta ac tococwa na. Tomi' caho' paxi' tata pain ca tomi' hwet wa ma', ane tomi' hwet cacain ne. Ca tomi' caho' tococwa pain ca tomi' hwet wa ma', ca tomi' hwet tomi' hwet tiquin' pan ac cacain na quem.

Marcos 8:30

Tomi' mip ac tococwa na: Ta tomi' hwet mahu' cocon oro wari' pain xocori ca' me, ta tomi' hwet huhun pain ca Cristo ta' ca' me tata.

Marcos 9:9

Quiji' mama' ac cacain na pacun. Pain ca xuruxut xuruxut wet nucucun ma', tomi' ac tococwa na: Ta tomi' hwet huhun pain oro wari' ca querec hwe pata' me. To' e' mami' cain' tarapa' Te ta. Wata' pain ca Iri' Wari' ta' ca', to' e' mami' cain' tarapa' Te. Tomi' hwet ac huhun pain tara ca querec hwe pata' ta na ca tomi' tococwa ma'.

Lucas 17:14

Querec iri tata ne, tomi' ac tococwa na: Jein hwet jujun oro sacerdote co taramaja to nanain cote ne xiricon Iri' Jam cain. Noro jein curuxut ca' ac huhun tara na ca tomi' tococwa ma'. Mama' ac caca na. Pain ca xuruxut xuruxut wet nucucun ma', om pin nonon caji nan. To' xio pin tata.

Lucas 21:13

Je i ma' ira, na e' na pain ca tomi' hwet huhun pain capija ta.

Lucas 4:41

Mija nana oro wari' co corom to ho' nonon caxicon jam ma' quem. Tomi' jein pin iri tata ne, hwerehwet ca' ac cocon na. Hwerehwet ca' iri tata ne, merem merem ac cocon na Jeju: Panxica Iri' Jam ma ta nonon. Ane tomi' in pin tococwa ne. Narain ho' tata pain ca tomi' wa, xi om ne ca taxi' ara cocon pain ca Cristo ca ma', pain ca wirico co wara tomi' pe ca Iri' Jam pane.

Lucas 5:14

Tomi' ac con na Jeju, tomi' mip non: Taraju wet ne e'. Miri'om roron oro wari' ma'. Ta tomi' hwet momon pain ca quep xio xim ca' me ta non. Hwet e' ron sacerdote co taramaja pe nain cote ne xiricon Iri' Jam ac con na. Noro rain cwere pain ca xio pin ta' ca' ac mon tara, mi' ac mon tara pain carawa ca tomi' capari' Moisés pain cara pane, pain ca tomi' xo' capari' con wari' co xio pin pain caji nan. Mi' ron pain, tom mi' ron pain Iri' Jam me ac mon tara. Tom tain' iri tarain ne, querec pin' ac quequem tara oro wari' pain ca xio pin nem ma', je pain ca querec hohot pin quem Iri' Jam ma' quem na ca tomi' con ma'.

Lucas 8:56

Wa wa na cote ca cam jicam ma'. Ane tomi' tacacama ne: Ta tomi' hwet huhun pain oro wari' me ta, ta tomi' hwet huhun pain ca to' e' mami' tam ta tata.

Lucas 9:21

Tomi' mip ac tococwa na: Ta tomi' hwet mahu' cocon oro wari' pain xocori ca' me, ta tomi' hwet huhun pain ca Cristo ta' ca' me tata.

João 5:41

Om ca ma' xirapa' na ton wari' co wa wa napa' quem ac tococwa na.

João 7:18

Wari' co pijim' e' nain ca coromicat pan nucun ma', param e' tata oro win ma' ca pain ca in ac pan cocon ma'. Wata' iri na ne, param inonon oro win ma' ne pain ca in ac pan cocon Iri' Jam co pijim' ra napa'. Iri'o' na oro ca tomi' ne quem. Om ca mixein camain' ta'.

João 8:50

Om paxi' na ca jain jain toton oro wari' pain ca awi na ta cacapa' ca'. Ane ma' ca xucun co jain jain nonon oro wari' pain ca awi na ta cacapa' ma' ne. Wirico Te na co awi na jun ta nonon pata'. Wirico co Juiz. Wirico co querec pin' napari' pain ca tomi' nexi'.