Mateus 7:13 - Tradução Bíblica Pacaas Novos

^13-14 Ma' 2 na wana ta ac tococwa na. Wanaji cote ne xe ma', hwara' na quimain. Xut hohot na. Mija nana wari' co xuruxut nanain quem. Wana ca mao nain ca e' cara to wa ma' iri na ne, om ca hwara' ne quimain. Om paxi' na ca xut ac xine. Ma' paric ca' e' nana co mam' nanain quem. Je ca tomi' xuhu' ca': Xuruxut mama' jein wijimain wana ca mao nain ca e' cara to wa ta. Ac i ma' na ca tomi' tococwa ma'.

Mateus 7:13 Iomraidhean Croise

Mateus 23:13

Tomi' ac tococwa na: Wa inuhu' me oro co ca' na taxipa' nanain ca xirao' nucun Moisés! Wa inuhu' quem oro fariseu! Ximin hwe ta. Ac ca iri'o' xi' ca' tara me hwe. Wap tamana turuhu' Iri' Jam ta. Xi to' i'ina ara huhun oro wari' pain ca ca' na pan teretem huhun pain capijacon ta. Ac ca narain ho' huhun na pain ca xin ne cocon Iri' Jam pain ca taramaxicon pe ho' xuhu' ta cocon ma'. Om pan na ca xin ne hun pain ca taramaxicon pe ho' xim cuhu' ma', narain ho' huhun pain ca xin ne cocon pain quem.

Mateus 25:41

Tomi' ac toton tara co to nanain paraju quem, co om xuruxut xo' nana quem: Wahu' pain ca tomi' noro cuhu' Te ma', to ni ca' xine. Mama' jein cote ne xe ca om jo' ra ha' cain, ca wara quep awori mi' tocwa pain Caxicon Jam cocon oro jam nucun co taramaja mi' nonon cwain.

Mateus 25:46

Je ca tomi' xuhu' ca' ac caparut na. Oro wari' co om xuruxut xo' nana ma', mama' ac cacain tara ca wap to xun tococwa. Om ta pi' ra ha' ne ca wap cara tococwa ta. Oro wari' co xuruxut xo' nana ma' iri na ne, mama' ac cacain tara ca e' cara to xi' caca quem. Om ta pi' ra ha' ne ca e' cara nucucun ta na ca tomi' caparut pane.

Mateus 3:2

Ca' na ca pijim' nucun: Cwirin' je, xi om ne ca wixicam pin ta' ara ne xec nein ca taramaxicon pe ho' pin ton cocon oro wari' Iri' Jam ta na.

Mateus 3:8

Xi iri'o' hwe ta ac tococwa na. Xucun wari' pin xihwe. Ma' ta querec pin' xine ca cwirin' nuhu' pain ca caracat nuhu' ta.

Lucas 14:33

Je ca tomi' xuhu' ca', tomi' tomi' xam' inuhu' ta ac tococwa na. Mo ta taxipa' xim mahu', na e' na pain ca noro cain' hwein oro carawa ca to' i'ina xim nuhu' pain. Mo ta om an to pin hwein oro carawa ca win xumu hwe ma', om ca ha' ne pain ca taxipa' mahu' ta na ca tomi' tococwa ma'.

Lucas 9:33

In mama' xi' iri nana ne, tomi' ac con na Jeju Pedro. Awi na pain ca to xin i ca' quem Taramaxicon co ca' na taxipa' capijacon Iri' Jam. Quep 3 xut pain wijimain xirim. Mene rain wirain. Mene tarain wirain Moisés ma'. Mene tarain wirain Elias ma' quem na ca tomi' nucun. (Tomi' ximao na Pedro, xi coromicat xo' ca ta.)

João 10:9

Wata' co iri' man ca corom ac wa ca'. Oro wari' co corom ac nanapa' pain ca howa cacapa' ma', witan ac caca tara. Win ne ovelha ma'. Corom na, hwet mao ac ne na, mam' ac nein na tononoin. Ac i ma' tara ca querec wet toton co howa nanapa' ta.

João 14:6

Om na, wata' co Iri' Wanaxicon Te Iri' Jam pan cwa' ta ac ca na Jeju. Wata' co an hwet mi' nuhu' pain ca iri'o' wa con. Wata' co mi' nuhu' pain ca e' cara wa quem. Xica' pe ina pain ca mi' taxi' xuhu' pain ca hwet hun Te ta. Om na xucun.

Atos 3:19

Je ca tomi' xuhu' ca' ac tococwa na. Cwirin' pin je. Coromicat ni pin je. Howa jun Iri' Jam, ma' ta xic am pin cain ca caracat nuhu'.

Romanos 9:22

Je ca ara ca Iri' Jam quem. An hwet pe tain ca mana' ne pain ca wap toton oro caracat ta paxi' na. Querec tatarapa' pain ca hwara' opa ne oro wari' ta paxi' na quem. Ane winim' cara tococwa oro wari' co wara mana' ta' ca cwa' ne, co wara to' om pin ta' ca cwa' ne. Om ca wap hap tococwa.

2 Coríntios 4:4

Wirico Caxicon Jam co ac Iri' Jam nonon oro co om howa nonon Cristo ma', wirico co to' i'ina nonon pain ca coromicat xo' nucucun. Ac ca to' om pin cain na tococon pain ca om coromicat nucucun. Ma' ta om taraju pa' hwe ta nonon. Ma' ta om querec pin' hwein naran nein capijacon Iri' Jam ca an hwet pe nain ca toc meremem nucun Cristo pain ca hwara' opa tamana nucun ma' nonon. Wirico Cristo ara xi' na co an tan pan non Iri' Jam ma', iri' wirico na.

2 Coríntios 6:17

Je ca xirao' pe xine i ca', pain capijacon quem: Tomi' ca' inuhu' pain ca Taramaxicon Iri' Jam ta' ca'. Paca' jujun oro co om howa nanapa'. In ca' jujun. Ein jein oro ca em' wa, ta wixicam camain' hwein me. Mo ta tomi' ha' mahu' pain ca tomi' xuhu' ca', tomi' querec te ac xuhu' tara ta. Ac i ma' na ca xirao' pe xine pain capijacon.

Gálatas 5:24

Wari' cwa', pain ca wari' ne pin capari' Cristo Jeju cwa', om ca ara mami' xin ca param pan nexi'. Ac ca to' pa' pin xin na ca param pan nexi'. Oro ca param ximama' nexi' ca', je oro ca win xumu ximama' xin ca om awi wa ca', ac ca tatatain mi' xin na pain panaxicon Cristo.

Filipenses 3:19

Mama' tatarain cote ne xe, xi om ne ca win xumu ara cacain ca param pan nucucun ta. Ac ca iri' jam ne cacain na ca param pan nucucun. Xec xec nana pain ca pan teretem nucucun, xi wixipa' pan caca pain ta. Coromicat e' nanain oro caramaji macan'.

1João 5:19

Taxi' xijexi' pain ca mana panxita' capari' Iri' Jam. Taxi' ururun oro co caracat taxipa' nana ma' quem, pain ca taramaxicon pe ho' pan cocon Caxicon Jam ma'.

Apocalipse 12:9

Xin hwet pin ac tocwa na co ma' co ac cote ne caji hop ma'. Wirico co ma' co caxicon em' cara pane, co mixein nonon hwanana pain cara pane. Wirico co Caxicon Jam ma', co Satanás na xijein wixicon ma', wirico co mixein taxipa' nonon oro wari' pain macan' ca'. Xin pan' hwet pin ac tocwa na pain macan'. Wixicaracao' camara' hwet pin ac tococwa na pain macan' oro caxicon jam co taramaja mi' nonon ma' quem.

Apocalipse 13:8

Co ma' co ac Wijimain Taramaji Ovelha ma', co wara coromicat an pe xo' ca Iri' Jam pain cara pane, pain ca om tomi' ma' pin querec cain macan' pane, co main to' pa' pin xim nenem oro caracat ta ca pane, ma' non tapari carawa ca xirao' to xine wixicocon oro co e' cara xi' nana ma'. Oro wari' co to nanain oro xijein macan' ma', co om xirao' to wa wixicocon pain tapari carawa nucun co ma' co ac Wijimain Taramaji Ovelha ma', wa wa wa wa xam' totoron co ma' co ac caji carawa ma'. Pe torotop mi' querec te totoron quem.

Apocalipse 20:15

Oro wari' co om xirao' to wa wixicocon pain tapari carawa ca xirao' to xine wixicocon co e' cara xi' nana ma', wixicaracao' mi' ac tococwa na pain cote ne xe ca ac xuterem' ta.