Mateus 5:22 - Tradução Bíblica Pacaas Novos22 Ane tomi' pan xuhu' pain i ca' ne: Wari' co mana' ximao non win ma' ca ma', tomi' mi' ac tocwa tara pain ca wap wa pain ca wum co em' ta tocwa. Wari' co tamanain ma ta non win ma' ca pain ca tomi' ximao con ma' quem, o mi' ac tocwa tara cocon oro juiz co tomi' mi' taxipa' nonon oro caracat pain ca wap wa ma'. Wari' co tomi' noro non win ma' ca pain ca iri' tamanain ma, om ca awi camain' ma ta con ma', ximin na co ma' ta. Hohot na pain ca xin mi' tocwa pain cote ne xe ta. Faic an caibideil |
Ta jin' huhun oro wari' me ta. To' parapa' taxi' paxi' nanain ca cwere wa, ane om to' parapa' taxi' cacain ca tamatara wa ne. Iri' Jam iri na ne, ha' non pain ca wap cain ca cwere wa, ha' non pain ca wap cain ca tamatara wa pain cote ne xe quem. Je ca tomi' xuhu' ca': Wirico pan tara co jin' hwe ta.
Taraju iri nonon oro fariseu ma' ne, tomi' ximama' ac cocon na Jeju: Om na, om paxi' na ca hwara' opa pan ca pain ca tomi' jein pin cocon oro caxicon jam ta. Wirico Belzebu ma', co taramaxicon nucucun oro caxicon jam ma', wirico co mi' non pain ca hwara' opa nucun. Je ca ha' con pain ca tomi' jein pin cocon oro caxicon jam ta na ca tomi' ximama' cocon ma'.
Xut hwet ac con na Jeju Pedro ma', tomi' querec ac con na: Taramaxicon ne. Mo ta ara cup capa' co win howa ta' cwa', tomi' xo' ac ton tara, maho' xin ca mana' wa ta ac ton tara. Mo ta ara cup mami' capa', tomi' xo' mami' ac ton tara. Mo ta ara cup mami' capa', tomi' xo' mami' ac ton tara. Mo ta ara cup mami' capa' quem. Cain' xi tomi' xo' mami' ac ton quem? Ma' 7 tara ca tomi' xo' ton pain ca caracat nucun ra na ca tomi' querec con Jeju Pedro.
Je ca tomi' xuhu' ca' ac caparut na Jeju. Mo ta om tomi' xo' xujuhu' pain ca ara cup xujuhu' ma', pain ca xere xujuhu' pain ca howa nuhu' ma', mo ta om maho' xin ca mana' wa ta xujuhu' pain iri' xumuhu' ma'. Wap ac i ma' wap ac i ma' xam' ac cuhu' tara Te co pe pawin cain ta na ca tomi' caparut pane.
Wa inuhu' me oro co ca' na taxipa' nanain ca xirao' nucun Moisés! Wa inuhu' quem oro fariseu! Ximin hwe ta. Ac ca iri'o' xi' ca' tara me hwe. Wap tamana turuhu' Iri' Jam ta. Jain jain paxi' huhun co om judeu nana ma', pain ca pijim' mama' hwein oro xijein macan' ma'. Pan horoho mama' hwein cote ne com, xuruxut mama' ac hwein na oro xijein macan' pain pira. Pijim' xuxun, ma' ta an xiho' cacapari' pain ca howa nexi' ca' hwe. Am ma' xica' pe ca co an xiho' napari', je i ma' ira, xica' pe ma' tarapari' ne, ac i ma' paxi' hwe pain ca jain jain huhun oro wari' pain oro pira. Ma' pin iri na wari' co an xiho' pin nuhu' ne, ara em' pin ac hun na, ac iri' panxica Caxicon Jam pin ac ca na pahu'. Pan tem tiquin' ca' ac cuhu' na pain ca pan teretem nuhu' quem. Wap tamana ac tocwa tara pain cote ne xe ta.
Tomi' xo' ac xucucun na oro taramaxicon nucucun oro sacerdote ma', cocon oro xucucun taramaxicon co cut in xucucun pain ca Sinédrio caca ma'. Pirao' xuxun wari' co xina ximama' napari' con Jeju ta. Querec inon pain ca caracat nucun, pan tem tamana na, tomi' mixein ac i ma' tatarapari'. Taraju iri xuxun ne, ha' ac capari' tara pain ca tomi' hwet xuxun pain oro taramaxicon nucucun oro romano ma', to' pa' pin ac cocon tara ta, ac i ma' paxi' na ca tomi' xo' pan xucucun.
Tomi' xo' ac xucucun na oro taramaxicon nucucun oro sacerdote ma', cocon oro xucucun taramaxicon co cut in xucucun pain ca Sinédrio caca ma'. Pirao' xuxun oro wari' co xina ximama' nanapari' con Jeju ta. Querec inon pain ca caracat nucun, pan tem tamana na, tomi' mixein ac i ma' tatarapari'. Taraju iri xuxun ne, ha' ac capari' tara pain ca tomi' hwet xuxun pain oro taramaxicon nucucun oro romano ma', to' pa' pin ac cocon tara ta, ac i ma' paxi' na ca tomi' xo' pan xucucun. Ane om mam' tocwa wari' co tomi' hwet xo' nain con ne.
Xec pin iri na ne, pain iri' xo' xec ma', tomi' xo' ac xucucun na oro taramaxicon pain ca Sinédrio caca ma'. Mo nana: Oro taramaxicon nucucun oro sacerdote ma', oro xucucun taramaxicon nuxut pain ca judeu urut ca', oro co ca' na taxipa' nanain ca xirao' nucun Moisés ma' quem, tomi' xo' tomi' xo' pi' pin ac xucucun na. Pao' pe ac cocon na Jeju, an mao ac cocon na, o mi' ac cocon na con taramaxicon Pilatos.
Cut in xijexi' ta ac xucucun na oro taramaxicon nucucun oro sacerdote cocon oro fariseu ma', tomi' cut in ac cocon na oro win taramaxicon caca ma', pain ca Sinédrio caca ma'. Cain' cain' xuxun Jeju quem ac caca na. An hwet pe tamana ara xi' nain ca hwara' opa nucun pain ca ara cain ca om ara taxi' ne ca wari' wa ta nana.
Ma' nana co ca' na taxipa' nanain oro xijein ca howa ximama' wa ma', co howa nanain ca coromicat nucun Epicuro, ma' nana co howa nanain ca coromicat nucucun oro estoico ma' quem. Taraju iri nonon Paulo pain ca pijim' ca con Jeju ne, ma' ac caca na co tomi' ximama' ca' nana: Cain' cain' ca co cwa' ne ta? Ma' carawa ca tomi' ca quem? Para tomi' ximao ca ne nana. Oro win ma' caca ma' iri nana ne, tomi' ac caca na: Om na, ac ca pijim' hwet cocon na oro xucucun jam ma' quem nana, xi pijim' hwet pan ara cocon pain capijacon Iri' Jam con Jeju Paulo ta. Mi' pin iri na Jeju ne, e' mami' ac ca na quem na ca pijim' cocon con Jeju.
Para mana' cocon Paulo oro judeu cwa' ne na comandante ma' quem. Para tomi' em' cocon ne, ac i ma' na ca coromicat nucun. Xec pin iri na ne, tomi' ac tococwa na oro soldado nucun: Tacom' pin jun Paulo ta tata. Cut in xujuhu' quem ac tococwa na oro taramaxicon nucucun oro sacerdote cocon oro taramaxicon co cut in xucucun pain ca Sinédrio caca ma' quem. Cut in iri xucucun ne, o qui' jun Paulo ma' quem ac tococwa na. Mon cwa' ta ac tococwa na oro taramaxicon.
Xec pin iri na ne, corom mama' ac cacain na ca tao' caho' nein cote ne xiricon Iri' Jam. Pijim' ac cocon na oro wari'. Win ne ca tomi' capari' jam co taramaja mi' non Taramaxicon nexi' ne nana. Sacerdote co iri' taramaxicon ma', cocon oro win ma' ca ma' quem, wara tomi' cut in nonon oro win taramaxicon caca pain ca Sinédrio caca ma'. Tomi' ac tococwa na oro guarda co taramaja to nanain cote ne xiricon Iri' Jam: Mama' jein xirinain ca tao' to tao' to to wa ma'. O qui' ac huhun tara oro apóstolo ta, ac i ma' na ca tomi' tococwa ma'.
Ac i ma' na ca ja' teretem tococwa oro wari' cocon oro taramaxicon nucucun oro judeu cocon oro co ca' na taxipa' nanain ca xirao' nucun Moisés ma'. Maji quep xun Estêvão ta ac caca na, mo hwet ac cocon na, quep ac cocon na, an mi' ac cocon na con oro taramaxicon pain ca cut in to nucucun pain ca Sinédrio caca ma'.
oro wari' co cut noc xa nanain carawa ma', oro wari' co narain ho' xucucun pain carawa pain ca param ximama' nucucun ma', oro wari' co tama' toc tamanain to nanain caji tocwa ca mana' ma', oro wari' co tomi' ximama' nonon oro win ma' caca ma', oro wari' co quep em' nonon waximain carawa pain ca cut noc xa ca' cocon pain, om ta to ho' cocon Iri' Jam pain ca taramaxicon pe nucun ta.
Ta mam' ara cup xujuhu' pain ca param ximama' wa me. Ta mam' mixein camain' xujuhu' pain me. Ma' tara xumuhu' me. Taramaxicon nexi' ma', wap toton nonon oro wari' co quep nanam xequem narima'. Wap tatam nanam oro narima' co quep ne nonon xucun tarama' ma' quem. Wara tomi' ac i ma' urut pahu' pain ca hu mip urut pahu' pane ta.
Ma' tara xumuhu' me. Taraju wet jun Iri' Jam co tomi' nuhu' cwa', ta ari hun me. Noro jujun oro hwanana nexi' cara pane, co om taraju wet jun na nonon pain ca hu to tococwa pain macan' pane. Wap tata, om ca witan ca' cocon Iri' Jam pain ca wap toton cocon pane. Wari' pain xocori ca' iri na ne, mo ta om taraju wet xun Iri' Jam co pe pawin cain, mo ta ari xun pain ca hu capari' ca', ma' tara ca witan ca' ac xun pain ca wap xim capari' ra? Om na ta. Wap tamana tarapari' ta.
Mo ta querec xun win howa iri' pain ca caracat ca ma'. Querec iri xun pain ca caracat ca ne, pain ca hohot na pain ca om mi' pin ca pain ca caracat nucun ta wa ma', tomi' mi' ac xun tara con Iri' Jam, mi' ac tocwa tara pain ca e' wa. Pain ca tomi' ac i ma' xuhu' ca', tomi' e' inuhu' cocon oro co caracat nana pain ca hohot na pain ca om cono' caca pain ca caracat nucucun ta wa ma'. Ane ma' ca wari' co caracat ma' ne, pain ca hohot na pain ca mi' pin ca pain ca caracat nucun ta wa ma'. Om ca tomi' xuhu' pain ca tomi' mi' jun con Iri' Jam xuhu' con co caracat ac i ma' ma'.
Om xi tomi' napat cocon quem, xi tomi' napat con Caxicon Jam Miguel co taramaxicon pe ho' nonon oro jam co taramaja mi' nonon Iri' Jam pane ta. Mi' pin iri na Moisés cara pane ne, tomi' caracan ac xucucun na Caxicon Jam con Miguel. Pe ho' pan tarapa' curucun Moisés cwa' ne iri na Caxicon Jam ne, om na ta pan ac ca na Miguel. Om ca tomi' napat xiton na con, om na. Tomi' e' non: Pan to' pan tarain tarajum Taramaxicon Iri' Jam ta non.